ആലപ്പുഴ: സംസ്ഥാന സര്ക്കാരിന്റെ മുഖം രക്ഷിക്കാന്, പനി ബാധിച്ച് മരിച്ച യുവാവിനെയും പാര്ട്ടി കുടുംബത്തെയും അപമാനിച്ച് സിപിഎം മുഖപത്രം. നടപടി പാര്ട്ടി നേതൃത്വത്തിന്റെ അറിവോടെയെന്ന് ആക്ഷേപം. കഞ്ഞിക്കുഴി പഞ്ചായത്ത് പതിനഞ്ചാം വാര്ഡ് എസ്എന് പുരം പുത്തന്വെളി ദിവാകരന്റെ മകന് ജയപ്രസാദിനെ(36)യാണ് ദേശാഭിമാനി അപമാനിച്ചത്.
കടുത്ത പനിയെ തുടര്ന്ന് ചേര്ത്തല താലൂക്ക് ആശുപത്രിയിലും, പിന്നീട് ആലപ്പുഴ മെഡിക്കല് കോളേജ് ആശുപത്രിയിലും പ്രവേശിപ്പിച്ച ജയപ്രസാദ് ബുധനാഴ്ച വൈകിട്ടാണ് മരിച്ചത്. മെനഞ്ചൈറ്റീസ് ബാധിച്ചാണ് മരണമെന്നാണ് ആശുപത്രി രേഖകളിലുള്ളത്. വ്യാഴാഴ്ച സിപിഎം മുഖപത്രം ഉള്പ്പടെ എല്ലാ പത്രങ്ങളിലും ജയപ്രസാദ് പനി ബാധിച്ചു മരിച്ചു എന്നാണ് വാര്ത്ത വന്നത്. എന്നാല് ജയപ്രസാദ് സ്ഥിരം മദ്യപാനിയായിരുന്നുവെന്നും മദ്യം പെട്ടന്ന് ഉപേക്ഷിക്കുമ്പോള് ഉണ്ടാകുന്ന ‘വിത്ത്ഡ്രോവല് സിന്ഡ്രോം’ മുലമാണ് മരിച്ചതെന്നും ഇന്നലെ ദേശാഭിമാനിയില് വലിയ പ്രാധാന്യത്തോടെ വാര്ത്ത വന്നു.
ഡിഎംഒയെ അധികരിച്ചാണ് ദേശാഭിമാനി വാര്ത്ത. ആശുപത്രി രേഖകളിലും, മരണ സര്ട്ടിഫിക്കറ്റിലും മരണ കാരണം മെനഞ്ചൈറ്റീസ് ആണെന്ന് വ്യക്തമാക്കുമ്പോള് പാര്ട്ടിപത്രം മരിച്ച യുവാവിനെ മദ്യത്തിനടിമയാക്കി ചിത്രീകരിച്ചതില് വ്യാപക പ്രതിഷേധം ഉയര്ന്നു. ജയപ്രസാദിന്റെ സഹോദരന് വിപിന്ദാസ് സിപിഎം ബ്രാഞ്ച് സെക്രട്ടറിയും മറ്റും കുടുംബാംഗങ്ങള് സജീവ സിപിഎം പ്രവര്ത്തകരുമാണ്.
ജില്ലയില് പനി മരണമില്ലെന്ന് വരുത്തിത്തീര്ത്ത് സര്ക്കാരിന്റെ മുഖം രക്ഷിക്കാന് പാര്ട്ടി കുടുംബത്തെ ഇത്തരത്തില് അപമാനിക്കരുതായിരുന്നു എന്നാണ് വിപിന്ദാസും, അമ്മാവന് സുഗുണനും പറയുന്നത്. ഞങ്ങള്ക്കാരുടെയും സഹായം വേണ്ട, മരിച്ചയാളെയും കുടുംബത്തെയും അപമാനിച്ചതിനെതിരെ നിയമനടപടി സ്വീകരിക്കുമെന്നും അവര് വ്യക്തമാക്കി. ടിപ്പര് ഡ്രൈവറായിരുന്ന ജയപ്രസാദ് മദ്യത്തിനടിമയ്യല്ലായിരുന്നു. ഇക്കാര്യം പരിസരവാസികള്ക്കും ബന്ധുക്കള്ക്കും അറിയാം.
കഴിഞ്ഞ 15 മുതല് മുഹമ്മ സാമൂഹ്യാരോഗ്യകേന്ദ്രത്തില് പനിക്ക് ചികിത്സയിലായിരുന്നു ജയപ്രസാദ്. സംസ്ഥാനത്തെ ആരോഗ്യരംഗം മെച്ചപ്പെട്ടതാണെന്നും പനി മരണങ്ങള് ഇല്ലെന്നും വരുത്തിത്തീര്ക്കാന് സിപിഎമ്മും, മുഖപത്രവും എത്രമാത്രം തരംതാഴും എന്ന് വ്യക്തമാക്കുന്നതാണ് സിപിഎം കുടുംബത്തിനുണ്ടായ ദുരനുഭവം. ഭര്ത്താവ് അമിതമദ്യപാനം മുലം മരിച്ചതെന്ന് പ്രചരിച്ചതോടെ ഭാര്യ മോനിഷയ്ക്കും, മകള് അഞ്ചു വയസ്സുകാരി പവിത്രയ്ക്കും ഉണ്ടാകുന്ന അപമാനം ചെറുതല്ല.
പ്രതികരിക്കാൻ ഇവിടെ എഴുതുക: