ചാത്തന്നൂര്: കല്ലുവാതുക്കല് പഞ്ചായത്തിലെ ഭൂരിഭാഗം വഴിവിളക്കുകളും രാത്രിയില് പ്രകാശിക്കാതെ പ്രദേശത്തെ ഇരുട്ടിലാക്കുന്നു. പഞ്ചായത്തിലെ 23 വാര്ഡുകളിലെയും അവസ്ഥ ഏകദേശം ഇതുതന്നെയാണ്.
ഇലക്ട്രിക്കല് ജോലിചെയ്യുന്നതിനായി കരാര് അടിസ്ഥാനത്തില് രണ്ട് ജോലിക്കാരാണ് പഞ്ചായത്തിലുള്ളത്. അവരുടെ ശമ്പളത്തിലും മുടക്കമുള്ളതിനാല് പലപ്പോഴും ജോലിയില് നിന്നും മാറിനില്ക്കാറുണ്ടെന്നാണ് അറിയുന്നത്.
പൊതുജനങ്ങള് വാര്ഡ്മെമ്പറന്മാരോട് പറയുമ്പോള് പഞ്ചായത്തിന്റെ ഭാഗത്തുനിന്നും നടപടിയൊന്നും ഉണ്ടാകുന്നില്ലെന്നാണ് മറുപടി. മഴക്കാലമായതിനാല് വഴിവിളക്കുകളില് മിക്കവയും ഫ്യൂസായതും തകരാറിലായതുമാണ് പഞ്ചായത്തില് നിന്നും ട്യൂബുകളും, സിഎഫ്എലുകളും മറ്റ് സാമഗ്രികളും വഴിവിളക്കുകള്ക്കായി മാറ്റിവച്ചിട്ടുണ്ടെങ്കിലും ഫലത്തില് ഒന്നും പ്രയോജനപ്പെടുന്നില്ല. പഞ്ചായത്തിന്റെ പല ഭാഗങ്ങളിലും ജോലികഴിഞ്ഞു രാത്രിയില് തിരിച്ചെത്തേണ്ടിവരുന്ന സാധാരണക്കാരുടെ ആശ്രയം ഈ വഴിവിളക്കുകളാണ്. ഇടുങ്ങിയ വഴികളിലും, വയലോരങ്ങളിലും തപ്പി തടയേണ്ടുന്ന അവസ്ഥയാണ് ഇപ്പോഴുള്ളത്. ചില മെമ്പര്മാരെങ്കിലും സ്വന്തം കയ്യില് നിന്നും കാശ് ചിലവാക്കി റിപ്പയര് ചെയ്യിക്കാറുണ്ടെന്നാണ് അവകാശപ്പെടുന്നത് . പഞ്ചായത്ത് ഉടനടി വേണ്ട നടപടികള് സ്വീകരിക്കണമെന്നാണ് നാട്ടുകാരുടെ ആവശ്യം.
