വാഷിങ്ടണ്: ലോകത്തിന്റെ മുക്കിലും മൂലയിലും ഓരോരുത്തരുടേയും വീട്ടിലെ രഹസ്യങ്ങള് വരെ ചോര്ത്താന് പാകത്തിന് വിപുലമായ ഹാക്കിങ് പ്രോഗ്രാമാണ് അമേരിക്കയുടെ രഹസ്യാന്വേഷണ ഏജന്സിയായ സിഐഎ ഒരുക്കിയതെന്ന അമ്പരപ്പിക്കുന്ന യാഥാര്ഥ്യത്തിലേക്കാണ് വിക്കിലീക്സ് വെളിപ്പെടുത്തല് നയിക്കുന്നത്.
നിത്യോപയോഗ സാമഗ്രികള് എന്നു തന്നെ വിശേഷിപ്പിക്കാവുന്ന സ്മാര്ട്ട്ഫോണുകളും കംപ്യൂട്ടറുകളും ടെലിവിഷനുകളുമായിരുന്നു സിഐഎയുടെ ടാര്ജറ്റുകള്. വിര്ജീനിയയിലെ സിഐഎ ആസ്ഥാനത്തുള്ള സെന്റര് ഫോര് സൈബര് ഇന്റജിലന്സ് എന്ന പ്രത്യേക വിഭാഗത്തിന്റെം എഞ്ചിനീയറിങ് ഡെവലപ്മെന്റ് ഗ്രൂപ്പാണ് ഈ തന്ത്രങ്ങള്ക്കു രൂപം നല്കിയത്.
ഇതെക്കുറിച്ചുള്ള സിഐഎയുടെ രഹസ്യ രേഖകള്ക്ക് വിക്കിലീക്സ് നല്കിയ പേര് വോള്ട്ട്7 എന്ന്. ഇതില്ത്തന്നെ ഇയര് സീറോ എന്ന പേരില് ആദ്യത്തെ ചില ഭാഗങ്ങളാണ് കഴിഞ്ഞ ദിവസം പുറത്തുവിട്ടത്. അതീവ രഹസ്യ രേഖകള് പുറത്തു വിട്ട് മുന്പു ം അമേരിക്കയെ ഞെട്ടിച്ചിട്ടുണ്ട് ജുലിയന് അസാഞ്ചിന്റെ വിക്കിലീക്സ്. സിഐഎയുടെ മുന് ഉദ്യോഗസ്ഥരില് നിന്നു കിട്ടിയത് എന്ന പേരിലാണ് ഈ രേഖകള് പുറത്തുവിട്ടിരിക്കുന്നത്.
രേഖകള് സിഐഎ നിഷേധിച്ചിട്ടില്ല എന്നത് വെളിപ്പെടുത്തലിനെ കൂടുതല് ഗൗരവമുള്ളതാക്കുന്നു. ജര്മനിയിലെ ഫ്രാങ്ക്ഫര്ട്ടിലെ പ്രധാനപ്പെട്ട ഹാക്കിങ് ബേസാക്കി സിഐഎ മാറ്റിയിരുന്നു എന്നാണ് മറ്റൊരു നിര്ണായക വെളിപ്പെടുത്തല്. ലോകത്തിന്റെ മറ്റു ഭാഗങ്ങളിലുള്ള അമേരിക്കന് കോണ്സുലേറ്റുകളെക്കൂടി സംശയത്തിന്റെ നിഴലിലാക്കുകയാണ് ഇത്. ഫ്രാങ്ക്ഫര്ട്ടിലെ യുഎസ് കോണ്സുലേറ്റില് നയതന്ത്ര ഉദ്യോഗസ്ഥരുടെ പരിരക്ഷയിലാണ് ഹാക്കര്മാര് പ്രവര്ത്തിച്ചിരുന്നത്.
രഹസ്യങ്ങള് ചോര്ത്താന് ഐഫോണുകളെ ഉപയോഗിച്ചിട്ടുണ്ടെങ്കില് എത്രയും വേഗം പരിശോധിക്കുമെന്നാണ് വിക്കിലീക്സ് രേഖകളോടു ആപ്പിള് പ്രതികരിച്ചത്. ആപ്പിള് ഐഫോണില് നിന്ന് രഹസ്യങ്ങള് ചോര്ത്താനുള്ള സംവിധാനങ്ങള് സിഐഎയുടെ ഹാക്കര്മാര് തയാറാക്കിയിരുന്നു എന്നതാണ് വിക്കിലീക്സിന്റെ രേഖകളിലെ പ്രധാനപ്പെട്ട ഭാഗം. വിക്കിലീക്സ് രേഖകളില് പറയുന്ന ആപ്ലിക്കേഷനുകള് നേരത്തേ തന്നെ സ്മാര്ട്ട്ഫോണുകളിലുള്ളവയാണ്. അവ സിഐഎയുടെ ടാര്ജറ്റുകളായിട്ടുണ്ടോ എന്നു പരിശോധിക്കും, ആപ്പിളിന്റെ വക്താവ് പറഞ്ഞു. ഏതാണ്ട് ഇതേ തരത്തിലാണ് മൈക്രോസോഫ്റ്റിന്റേയും നിലപാട്.
സാംസങ് ടെലിവിഷനുകളില് ഫേക്ഓഫ് എന്ന സംവിധാനം സിഐഎ ഒരുക്കിയിരുന്നു എന്ന വെളിപ്പെടുത്തലിനോട് കരുതലോടെയാണ് കമ്പനി പ്രതികരിച്ചത്. ഉപഭോക്താവിന്റെ സ്വകാര്യതയ്ക്കാണ് എപ്പോഴും മുന്ഗണന നല്കിയിട്ടുള്ളത്. വിക്കിലീക്സ് രേഖകള് ശ്രദ്ധയില്പ്പെട്ടിട്ടുണ്ട്. പരിശോധിക്കും, സാംസങ് വക്താവ് പറഞ്ഞു.
അമേരിക്കയുടെ തന്നെ നാഷണല് സെക്യൂരിറ്റി ഏജന്സിയെപ്പോലും തുടക്കത്തില് അറിയിക്കാതെയാണ് സിഐഎ വിപുലമായ ഹാക്കിങ്ങിന് കളമൊരുക്കിയത്. വിക്കിലീക്സിന്റെ വെളിപ്പെടുത്തലിനോട് ഡൊണാള്ഡ് ട്രംപ് ഭരണകൂടം കൃത്യമായി പ്രതികരിച്ചിട്ടില്ല. ട്രംപ് അധികാരത്തിലെത്തിയതു മുതല് സിഐഎയുമായി നിലനില്ക്കുന്ന അഭിപ്രായ ഭിന്നതയെ ഇതുമായി ബന്ധപ്പെടുത്തുകയാണ് രാഷ്ട്രീയ നിരീക്ഷകര്.
തെരഞ്ഞെടുപ്പു കാലത്ത് ബരാക് ഒബാമയ്ക്കു വേണ്ടി തന്റെ രഹസ്യങ്ങള് സിഐഎ ചോര്ത്തിയിരുന്നു എന്നു ട്രംപ് പല തവണ ആരോപിച്ചു കഴിഞ്ഞു. വോള്ട്ട്7 വെളിപ്പെടുത്തലിനെ സിഐഎയെ നേരിടാനുള്ള ആയുധമായി ട്രംപ് ഉപയോഗിക്കുമോ എന്നാണ് കാത്തിരുന്നു കാണേണ്ടത്. നിലപാട് പിന്നീട് അറിയിക്കാം എന്നാണ് വൈറ്റ്ഹൗസിന്റെ പ്രസ് സെക്രട്ടറി സീന് ല്പൈസര് പറഞ്ഞത്.
