തിരുവനന്തപുരം: ശബരിമല ക്ഷേത്രത്തിലെ പുതിയ ധ്വജ നിര്മ്മാണത്തിന്റെ ആധാരശിലാ സ്ഥാപനം ഏപ്രില് 7 ന് രാവിലെ 10.45 നും 12 നും മദ്ധ്യേ മകം നക്ഷത്രത്തില് മിഥുനം രാശിയില് നടക്കും.
ചെങ്ങന്നൂര് സദാശിവന് ആചാരിയുടെ പണിശാലയില് നിന്ന് അലങ്കരിച്ച വാഹനത്തില് ഏപ്രില് 5 ന് രാവിലെ ദേവസ്വം ഉദ്യോഗസ്ഥരുടെയും ഭക്തജനങ്ങളുടെയും തീര്ത്ഥാടകരുടെയും വാഹനങ്ങളുടെ അകമ്പടിയോടെ ഘോഷയാത്രയായി വൈകിട്ടോടെ പമ്പയില് എത്തിക്കും.
ആധാരശില അയ്യപ്പഭക്തര്ക്ക് കണ്ടുതൊഴാന് വിവിധ ക്ഷേത്രങ്ങളില് സൗകര്യമൊരുക്കും.
തൃച്ചാട്ടൂര്, പന്തളം വലിയ കോയിക്കല്, വണ്ടിമല, ചെങ്ങന്നൂര് മഹാദേവന്, തിരുവാറന്മുള പാര്ത്ഥസാരഥി, പുന്നംതോട്ടം, നെടുംപ്രയാര് തേവര്കുന്ന്, കാട്ടൂര് മഹാവിഷ്ണു, കീക്കൊഴൂര് ചെറുവള്ളിക്കാവ്, ഇടക്കുളം, വടശ്ശേരിക്കര, പ്രയാര്, മാടമണ്, പെരുനാട്, ഇലയാട്ടം പുറട്ടിക്കാവ്, തലപ്പാറമല, നിലയ്ക്കല് എന്നീ ക്ഷേത്രങ്ങള് വഴിയാണ് പമ്പ ഗണപതി ക്ഷേത്ര സന്നിധിയിലെത്തുക. അവിടെ നിന്ന് അന്നുതന്നെ ആധാരശില സന്നിധാനത്തെത്തിക്കും. ജൂണ് 25 നാണ് പുതിയ സ്വര്ണക്കൊടിമരം സന്നിധാനത്ത് സ്ഥാപിക്കുന്നത്.
പങ്കുനി ഉത്രം ചടങ്ങുകള്ക്കായി ശബരിമല ക്ഷേത്രം മാര്ച്ച് 30 ന് വൈകിട്ട് 5 ന് തുറന്ന് ഏപ്രില് 9 ന് രാത്രി 10 ന് അടയ്ക്കും. തുടര്ന്ന് മേട വിഷുവിനായി ഏപ്രില് 10 ന് വൈകിട്ട് 5 ന് വീണ്ടും തുറന്ന് 18 ന് രാത്രി 10 ന് അടയ്ക്കും. ഏപ്രില് 14 നാണ് മേടവിഷു.
