കുമളി: തേക്കടി പാര്ക്കിങ് ഗ്രൗണ്ടുമായി ബന്ധപ്പെട്ട് തമിഴ്നാടിന്റെ അവകാശ വാദങ്ങള് സുപ്രീംകോടതി തള്ളി. തങ്ങളുടെ പാട്ടഭൂമിയില് കേരളം അനധികൃതമായി പാര്ക്കിങ് ഗ്രൗണ്ട് സംവിധാനം ഏര്പ്പെടുത്തിയെന്നും, പ്രസ്തുത സ്ഥലത്ത് അനുമതിയില്ലാതെ അനധികൃത നിര്മ്മാണ പ്രവര്ത്തനങ്ങള് നടത്തുന്നത് തടയണം എന്നുമായിരുന്നു തമിഴ്നാട് ഇതുമായി ബന്ധപെട്ട് സുപ്രീം കോടതി മുന്പാകെ ഉന്നയിച്ച വാദങ്ങള്.
എന്നാല് ഹരിത ട്രിബ്യൂണല് നല്കിയ ഇടക്കാല ഉത്തരവ് പ്രകാരം വന്യ ജീവി സങ്കേതത്തില് നിന്ന് വാഹനങ്ങളുടെ പാര്ക്കിങ് പുറത്തേക്കു മാറ്റി സ്ഥാപിക്കുക മാത്രമാണ് ചെയ്തിട്ടുള്ളതെന്ന് കേരളം അറിയിച്ചു. പാരിസ്ഥിതിക പ്രശ്നം ഉണ്ടാക്കുന്ന നിര്മ്മാണ പ്രവര്ത്തങ്ങള് നടത്തുന്നില്ലെന്നുള്ള കേരളത്തിന്റെ വാദം തത്വത്തില് സുപ്രീം കോടതി അംഗീകരിച്ചു.
പ്രതിവര്ഷം മൂന്നു ലക്ഷത്തോളം വലുതും ചെറുതുമായ വാഹനങ്ങള് മുന്പ് തേക്കടി വന്യജീവി സങ്കേതത്തില് പ്രവേശിച്ചിരുന്നു. ഇവ പുറന്തള്ളുന്ന പുക മൂലം ഗുരുതരമായ പാരിസ്ഥിതിക പ്രശ്നം സംഭവിക്കാം എന്ന തിരിച്ചറിവാണ് പാര്ക്കിങ് ഗ്രൗണ്ട് വനത്തില് നിന്ന് പുറത്തേക്ക് മാറ്റണമെന്ന നിര്ദ്ദേശം നല്കാന് ഹരിത ട്രൈബ്യൂണലിന് പ്രേരണയായത്.
തുടക്കം മുതല് തടസവാദങ്ങള് ഉന്നയിച്ചിരുന്ന തമിഴനാടിന് സുപ്രീം കോടതി തീരുമാനം എതിരായതോടെ ഈ വിഷയത്തില് പ്രാദേശികമായി നില നില്ക്കുന്ന തെറ്റിധാരണകള് മാറുമെന്നാണ് കരുതുന്നതെന്ന് വനം വകുപ്പ് ഉദ്യോഗസ്ഥര് ‘ജന്മഭൂമി’യോടു പറഞ്ഞു.
