കോഴിക്കോട്: സിപിഎമ്മിന്റെ അക്രമത്തിന് മുന്നില് മുട്ടുമടക്കില്ലെന്ന് ബിഎംഎസ് സംസ്ഥാന ജനറല് സെക്രട്ടറി എം.പി. രാജീവന് പറഞ്ഞു. സിപിഎം അക്രമത്തില് പ്രതിഷേധിച്ച് സംഘപരിവാര് സംഘടനകളുടെ നേതൃത്വത്തില് നഗരത്തില് നടന്ന പ്രതിഷേധ യോഗത്തില് സംസാരിക്കുകയായിരുന്നു അദ്ദേഹം. അക്രമത്തിലൂടെ ദേശീയ പ്രസ്ഥാനങ്ങളെ തകര്ക്കാമെന്നത് സിപിഎമ്മിന്റെ വ്യാമോഹമാണ്. കള്ളപ്രചരണങ്ങള് അഴിച്ചുവിട്ട് ഓഫീസുകള്ക്കും സ്ഥാപനങ്ങള്ക്കും നേരെ നടത്തുന്ന അക്രമങ്ങള് അവസാനിപ്പിക്കാന് തയ്യാറാകണം.
തൊഴിലാളികളുടെ പാര്ട്ടി എന്ന് പറയുന്നവര് തന്നെ മറ്റൊരു തൊഴിലാളി സംഘടനയുടെ ഓഫീസ് അക്രമിച്ചതിന് എന്തു മറുപടിയാണ് പറയാനുള്ളത്. അദ്ദേഹം ചോദിച്ചു. ബിഎംഎസ് ജില്ലാ വൈസ് പ്രസിഡന്റ് വെള്ളാരക്കല് ചന്ദ്രന് അദ്ധ്യക്ഷത വഹിച്ചു. സംസ്ഥാന സെക്രട്ടറി പി. ശശിധരന്, ജില്ലാ പ്രസിഡന്റ് പി. ദിവാകരന്, ജില്ലാ സെക്രട്ടറി ഒ.കെ. ധര്മ്മരാജ്, യുവമോര്ച്ച സംസ്ഥാന പ്രസിഡന്റ് അഡ്വ. കെ.പി. പ്രകാശ് ബാബു, ഹിന്ദു ഐക്യവേദി ജില്ലാ സംഘടനാ സെക്രട്ടറി ബൈജു കൂമുള്ളി, സി.പി. ഗോപികൃഷ്ണന് തുടങ്ങിയവര് സംസാരിച്ചു. ലിങ്ക് റോഡ് പരിസരത്ത് നിന്നാരംഭിച്ച പ്രകടനം കിഡ്സണ് കോര്ണറില് സമാപിച്ചു.
ബിജെപി ജില്ലാ ജനറല് സെക്രട്ടറി പി. ജിജേന്ദ്രന്, ബിഎംഎസ് ജില്ലാ ജോയിന്റ് സെക്രട്ടറി കെ.കെ. പ്രേമന്, പ്രജീഷ്, എബിവിപി ജില്ലാ സംഘടനാ സെക്രട്ടറി ഡി. അഭിരാം തുടങ്ങിയവര് നേതൃത്വം നല്കി.
