ഇരിങ്ങാലക്കുട : കൂടല്മാണിക്യം ഉത്സവത്തോടനുബന്ധിച്ചു നടന്ന എക്സിബിഷന് ഗ്രൗണ്ട് ലേലത്തിനെടുത്ത കരാറുകാരന് ഒരു ലക്ഷത്തോളം രൂപ നല്കാതെ മുങ്ങി. എക്സിബിഷനില് പങ്കെടുക്കാനെത്തിയ സര്ക്കസുകാരെ ഗ്രൗണ്ടില് നിന്നും പോകാന് അനുവദിക്കാതെ ദേവസ്വം രണ്ടാഴ്ചയില് അധികമായി തടങ്കലില് വച്ചിരിക്കുന്നതായി പരാതി.
സര്ക്കസും അമ്യൂസ്മെന്റ് പാര്ക്കും നടത്താന് മെയ് 6 ന് എത്തിയ ഈ സംഘം മെയ് 16 ന് ഉത്സവം കഴിഞ്ഞിട്ടും ദേവസ്വം എക്സിബിഷന് നടന്ന കൊട്ടിലായ്ക്കല് പറമ്പിന്റെ ഗേറ്റുകള് അടച്ചതിനാല് സര്ക്കസ് സാധന സാമഗ്രികള് കൊണ്ടു പോകാനാവാതെ ഇരുപതിലധികം ജീവനക്കാരുമായി യാതന അനുഭവിക്കുകയാണ്. മഴ ആരംഭിച്ചതോടെ ഇവരുടെ യന്ത്ര ഊഞ്ഞാലും മോട്ടോറും ഉള്പ്പെടെയുള്ള സാധനസാമഗ്രികളും മഴ നനഞ്ഞു കേടാവുന്ന അവസ്ഥയിലാണ്.
കൊടുങ്ങല്ലൂര് സ്വദേശിയായ മൊയ്തീന് എന്ന കോണ്ട്രാക്ടര് ആണ് ദേവസ്വം കൊട്ടിലയ്ക്കല് പറമ്പ് എക്സിബിഷനായി ലേലത്തില് എടുത്തത്. ഉത്സവം കഴിഞ്ഞയുടനെ എക്സിബിഷന് പങ്കെടുത്ത പല സ്ഥാപനങ്ങളും കൊട്ടിലായ്ക്കല് വിട്ടു പോയിരുന്നു. കൂടുതല് സാധനസാമഗ്രികള് ഉള്ളതിനാല് പ്രധാന വേദിയിലെ ഇരുമ്പ് ഷെഡ് നിര്മ്മിച്ചവരും ജനറേറ്ററുകാരനും മാത്രമേ അവശേഷിച്ചിരുന്നുള്ളു.
ഇവരുമായി ദേവസ്വത്തിന് നേരിട്ട് കരാറുകളോ മറ്റു ബന്ധങ്ങളോ ഇല്ലെങ്കിലും ഇവര് പ്രധാന കരാറുകാരനുമായി ബന്ധം ഉള്ളതിനാല് ദേവസ്വം അഡ്മിനിസ്ട്രേറ്റര് എക്സിബിഷന് ഗ്രൗണ്ടിന്റെ ഗേറ്റ് അടച്ചിടുകയായിരുന്നു.
അടുത്ത പരിപാടി നടക്കുന്ന സ്ഥലത്തേക്ക് ഇവരുടെ സാധനസാമഗ്രികള് കൊണ്ടുപോകാനാവാതെ ഇവര് ബുദ്ധിമുട്ടുകയാണ്. ഇവരുടെ ദുരവസ്ഥ നേരില് കണ്ട ചില നാട്ടുകാര് ഇവര്ക്ക് ഭക്ഷണത്തിനുള്ള പച്ചക്കറിയും മറ്റു ഭക്ഷ്യവസ്തുക്കളും നല്കി സഹായിക്കുകയാണ്.
ദേവസ്വത്തിന് അടയ്ക്കേണ്ട പൈസ കരാറുകാരന് നല്കിയാല് ഇവരെ പോകാന് അനുവദിക്കുമെന്നും അഡ്മിനിസ്ട്രേറ്റര് പറഞ്ഞു.
