പാലക്കാട് : ഭാരതപ്പുഴയെ ജൈവ സമ്പുഷ്ടമാക്കുക എന്ന ലക്ഷ്യത്തോടെ ജില്ലാ പഞ്ചായത്തിന്റെ ആഭിമുഖ്യത്തില്‍ ഭാരതപുഴ പരിപാലന പദ്ധതി നടപ്പാക്കുന്നു.
നദീതടത്തിലെ ജനവാസം , സംസ്‌കാരം, കാര്‍ഷിക -വ്യവസായ പ്രവര്‍ത്തനങ്ങളുടെ നിലനില്‍പ്പ്, കുടിവെള്ള ലഭ്യത, ടൂറിസം സാധ്യത തുടങ്ങിയവ ഉറപ്പാക്കികൊണ്ട് വനം, മണ്ണ്, കൃഷി, ജലസേചനം, വാട്ടര്‍ അതോറിറ്റി, ഭൂഗര്‍ഭജലവിഭാഗം, ബ്ലോക്ക് -ഗ്രാമപഞ്ചായത്തുകളുടെ സഹകരണത്തോടെയാണ് പദ്ധതി നടപ്പാക്കുക. 2022-ഓടെ ഭാരതപ്പുഴയെ സമ്പൂര്‍ണ്ണ ജീവധാരയാക്കുകയാണ് ലക്ഷ്യം.
പൊതുജനപങ്കാളിത്തത്തോടെ നടപ്പാക്കാന്‍ ഉദ്ദേശിക്കുന്ന പദ്ധതിയുമായി ബന്ധപ്പെട്ട് നഗരവത്കരണത്തിന്റെ തീവ്രത, വിഭവ ചൂഷണം, കാലാവസ്ഥാ വ്യതിയാനങ്ങള്‍, ക്വാറികളുടെ പ്രവര്‍ത്തനം, അമിതമായ ജലചൂഷണം എന്നിവയുടെ നിയന്ത്രണം സംബന്ധിച്ച് പഠനം നടത്തും. ജില്ലാ പഞ്ചായത്ത് പ്രസിഡന്റ് കെ.ശാന്തകുമാരി ചെയര്‍പേഴ്സണും തൊഴിലുറപ്പ് പദ്ധതി ജോയിന്റ് കോഡിനേറ്റര്‍ കെ.എസ്.അബ്ദുള്‍ സലിം കണ്‍വീനറുമായി കോര്‍കമ്മിറ്റി രൂപീകരിച്ചു.
വൈസ് പ്രസിഡന്റ് ടി.കെ നാരായണദാസ് അധ്യക്ഷനായി. പരിസ്ഥിതി പ്രവര്‍ത്തകരേയും വിദഗ്ധരെയും ഉള്‍പ്പെടുത്തി പ്രസിഡന്റ് ചെയര്‍മാനായി ഉപസമിതിയും രൂപീകരിക്കും.
ഭാരതപുഴസംരക്ഷണ പദ്ധതി സംസ്ഥാനതലത്തില്‍ തന്നെ മാതൃകാ പദ്ധതിയായി ആവിഷകരിക്കും. ജൂണ്‍ അഞ്ചിന് പരിസ്ഥിതി ദിനം ഭാരതപ്പുഴ ദിനമായി ആചരിക്കും.
‘ എന്റെ പുഴ, നമ്മുടെ നിള’ -വീണ്ടെടുപ്പിന്റെ സമഗ്ര യജ്ഞം’ മുദ്രാവാക്യത്തോടെ നടപ്പാക്കുന്ന പദ്ധതിയുമായി ബന്ധപ്പെട്ട ജില്ലാതല പരിശീലന പരിപാടി രണ്ടിന് നടക്കും.
പ്രതികരിക്കാൻ ഇവിടെ എഴുതുക: