ഹാലിയുടെ വാൽനക്ഷത്രം – ഏഴര പതിറ്റാണ്ടിന്റെ വിരുന്നുകാരൻ

1980 കളിലെ, ശാസ്ത്രസാഹിത്യ പരിഷത്തിന്റെ പുഷ്കലകാലത്താണ് ബഹിരാകാശവും വാനശാസ്ത്രവുമൊക്കെ ആവേശമായി അന്നത്തെ ഹൈസ്കൂൾ വിദ്യാർത്ഥിയുടെ മനസ്സിലും ചിന്തകളിലും പടർന്ന് കയറിയത്. വൈകാതെ ബഹിരാകാശ ശാസ്ത്രജ്ഞർ ദൈവങ്ങളെ പോലെയായി. ആര്യഭട്ടയും ഭാസ്കരയും സ്പുട്നിക്കും സോയൂസും അപ്പോളോയുമെല്ലാം കൂടപ്പിറപ്പുകളായി. ബഹിരാകാശ ദുരന്തങ്ങൾ കുടുംബത്തിലുണ്ടായ മരണങ്ങൾ പോലെ കണ്ണീരിൽ കുതിർന്നു.

അങ്ങനെയൊരു ദിനമാണ് പരിഷത്തിന്റെ ഒരു ശാസ്ത്ര കലാജാഥയിൽ നിന്നും ഹാലിയുടെ വാൽ നക്ഷത്രം എന്നാദ്യം കേട്ടത്. പ്രത്യേകതയൊന്നും തോന്നാത്ത ഒരു പേരാണെങ്കിലും അത് ഉള്ളിലെവിടയോ തറച്ചു. 76 വർഷത്തിലൊരിക്കൽ ഭൂമിയുടെ സമീപത്ത് കൂടി കടന്നു പോകുന്ന ആ വാൽനക്ഷത്രം 1986 മാർച്ച് മുതൽ രണ്ടുമാസത്തേക്ക് നഗ്നനേത്രങ്ങൾക്ക് ദൃശ്യമാകാൻ പോകുന്നു എന്ന വാർത്ത മനസ്സിൽ നിറച്ച ആവേശം ജീവിതത്തിലെ എറ്റവും വലിയ ഒരു മുതൽക്കൂട്ടായി.

എസ്‌എസ്‌എല്‍‌സി പരീക്ഷ കഴിഞ്ഞ ആരവം ഉള്ളിലും പുറത്തും തിരതല്ലുന്ന ഒരു സായന്തനത്തിൽ ആകാശവാണിയിലൂടെ ആ വാർത്ത ഒഴുകിയെത്തി ഹാലി ദൃഷ്ടിഗോചരമായിരിക്കുന്നു. അതിരാവിലെ തെക്കുകിഴക്കേ ചക്രവാളത്തിൽ ഹാലിയെ കാണാം. ഉറക്കം വരാത്ത ഒരു രാത്രി ഒരു വിധം തള്ളിനീക്കി മാർച്ച് 23 ന്റെ സരസ്വതീയാമത്തിൽ ജീവിതത്തിലെ എറ്റവും അസുലഭമായ ആ കാഴ്ച കൺനിറയെ കണ്ടു.

കൃത്യമായി തെക്കുകിഴക്കേ ചക്രവാളത്തിലെ തെളിഞ്ഞ മാനത്ത് യശോദയോട് പിണങ്ങി നീലക്കടമ്പിൽ നിന്ന് ചാടാനൊരുങ്ങുന്ന കണ്ണനെപ്പോലെ ഹാലി കീഴ്കാം തൂക്കായി തിളങ്ങി വിളങ്ങുന്നു. ജീവിതത്തിലാദ്യമായി സന്തോഷം കൊണ്ട് കണ്ണുനിറഞ്ഞ സന്ദർഭമായി ആ മാർച്ച് 23 ന്റെ പുലർകാലം. തലമുറകൾക്ക് പകർന്ന് നല്‍‌കാനുള്ള അനുഭവത്തിന്റെ മഹാനിധിയായി.

പിറ്റേന്ന് സ്കൂളിൽ നിന്നുള്ള ഒരു പോസ്റ്റ്‌ കാർഡ്. ശാസ്ത്രസാഹിത്യ പരിഷത്ത് നടത്തുന്ന ഹാലിമേളയോട് അനുബന്ധിച്ചുള്ള ക്വിസ് മത്സരത്തിൽ പങ്കെടുക്കാനെത്തുക. ബഹിരാകാശവും ജ്യോതിശാസ്ത്രവുമെല്ലാം അരങ്ങുതകർത്ത ആ ക്വിസ് മത്സരത്തിൽ ഒന്നാം സമ്മാനമായി ലഭിച്ച റഷ്യൻ നിർമ്മിത ടെലസ്കോപ്പുമായി സ്കൂളിൽ മടങ്ങിയെത്തിയപ്പോഴുണ്ടായ ആഹ്ലാദത്തിനു സമമായി പിന്നീടൊന്നുണ്ടായിട്ടില്ല.

ഭൂമിയുടെ അന്തരീക്ഷത്തിലുണ്ടാകുന്ന പലവിധ അസ്വസ്ഥതകളാണ് വാല്‍നക്ഷത്ര രൂപത്തിൽ ദൃഷ്ടിഗോചരമാകുന്നത് എന്നായിരുന്നു അരിസ്റ്റോട്ടിലിന്റെ സിദ്ധാന്തം. വാൽ നക്ഷത്രങ്ങൾ, ചന്ദ്രന് പിന്നിലെവിടെയോ ആണ് കിടക്കുന്നത്. ഭൂമിയിൽ കഷ്ടകാലം വരുന്നതിന്റെ സൂചനയായാണ് ഇവ പ്രത്യക്ഷപ്പെടുന്നതെന്നും വിശ്വസിക്കപ്പെട്ടിരുന്നു. പേരിലൊരു നക്ഷത്രമുണ്ട് എന്നതൊഴിച്ചാൽ ഇവന് നക്ഷത്രവുമായി ഒരു ബന്ധവുമില്ല.

കടലാടിയിലെ കടൽ പോലെ തന്നെ ശൂന്യാകാശത്തിന്റെ ഇരുണ്ട അഗാധതകളിൽ ഗതികിട്ടാപ്രേതങ്ങളെ പോലെ അലഞ്ഞു തിരിഞ്ഞു നടക്കുന്ന പ്രപഞ്ചവസ്തുക്കളാണിവ. സാന്ദ്രതകുറഞ്ഞ പൊടിപടലങ്ങൾ ഖരരൂപത്തിലായ കാർബൺ ഡയോക്സൈഡ് തുടങ്ങിയവയെല്ലാം കൂടി ചേർന്ന ഒരു വലിയ പാറയാണ് വാൽ നക്ഷത്രത്തിന്റെ ന്യൂക്ലിയസ്.

ഇത് ചുറ്റിത്തിരിഞ്ഞു സൂര്യനും നക്ഷത്രങ്ങൾക്കും സമീപമെത്തുമ്പോൾ ഇതിലെ സാന്ദ്രത കുറഞ്ഞ വസ്തുക്കളും വാതകങ്ങളും ചൂടായി ബാഷ്പീകരിക്കപ്പെട്ടു ന്യൂക്ലിയസ്സിനു ചുറ്റും കോമ എന്ന ഭാഗവും വാതകങ്ങളും പൊടിപടലങ്ങളും പിന്നിൽ അടിഞ്ഞു കൂടുകയും ചെയ്യുന്നു. വേഗത്തിലോടുന്ന ഒരു അത്‌ലറ്റിന്റെ മുടി പിന്നിലേക്ക് നിൽക്കുന്നത് പോലെ, ഓടുന്ന ഒരു ബോട്ടിന് പിന്നിൽ നീളത്തിൽ ഓളപ്പാത്തികൾ രൂപപ്പെടുന്നതുപോലെ. പ്രകാശമേൽക്കുമ്പോൾ ഇത് മനോഹരമായ ഒരു വാലായി തിളങ്ങുന്നു. അപൂർവമായി മാത്രം നക്ഷത്രങ്ങളുടെയിടയിൽ പ്രത്യക്ഷപ്പെടുന്ന ഈ അഭൗമ വസ്തുവിനെ ആരോ എപ്പോഴോ വാൽനക്ഷത്രം എന്ന് വിളിച്ചു. അതിന്നും തുടരുന്നു.

അതായത് വാൽനക്ഷത്രത്തിന്റെ വാൽ എന്ന് പറയുന്നത് സൂര്യന് സമീപമെത്തുമ്പോൾ മാത്രമുണ്ടാകുന്ന ഒരു പ്രതിഭാസമാണ്. അകന്ന് പോകുന്തോറും വാൽ ചെറുതായി ചെറുതായി ഒരു പാറക്കഷണം മാത്രമായി അനന്ത ശൂന്യതയിലേക്ക് വിലയം പ്രാപിക്കും.

വിഖ്യാതമായ “പ്രിൻസിപ്പിയ മാത്തമാറ്റിക്ക”യിലാണ് ഐസക് ന്യൂട്ടൻ ഗുരുത്വാകർഷണ സിദ്ധാന്തവും പ്രപഞ്ചഗോളങ്ങളുടെ ചലന നിയമങ്ങളും വിശദീകരിച്ചത്. പക്ഷെ അതിൽ മനപൂർവമെന്നോണം വാൽനക്ഷത്രങ്ങളെ അദ്ദേഹം വിട്ടു കളഞ്ഞു. തന്റെ ആത്മസുഹൃത്ത് എഡ്മണ്ട് ഹാലി നടത്തുന്ന വാൽനക്ഷത്രങ്ങളെപ്പറ്റിയുള്ള ഗവേഷണങ്ങൾ അറിയാമായിരുന്ന ന്യൂട്ടൻ ആ കണ്ടെത്തലുകളുടെ ക്രഡിറ്റ് തന്റെ സുഹൃത്തിന് തന്നെ കിട്ടട്ടെ എന്ന് കരുതിയിരിക്കണം. അങ്ങനെ 1705 ൽ പുറത്തിറങ്ങിയ ഹാലിയുടെ Synopsis of the Astronomy of Comets എന്ന പുസ്തകത്തിൽ ന്യൂട്ടന്റെ ഗുരുത്വനിയമങ്ങൾ അടിസ്ഥാനമാക്കി വാൽനക്ഷത്രങ്ങളുടെ സഞ്ചാരപഥങ്ങൾക്ക് വിശദീകരണം ഉണ്ടായി. ഗവേഷണത്തിനിടയിൽ നൂറ്റാണ്ടുകൾക്ക് പിന്നിലേക്ക് സഞ്ചരിച്ച ഹാലി കൃത്യമായ ഇടവേളകളിൽ ഭൂമിയിൽ ദൃശ്യമായ ഒരു വാൽ നക്ഷത്രത്തിനെപ്പറ്റിയുള്ള പരാമർശങ്ങൾ ശ്രദ്ധിച്ചു.

കൂടുതൽ വിശദാംശങ്ങളിലേക്ക് ഇറങ്ങിച്ചെന്നപ്പോൾ 1531, 1607, 1682 എന്നീ വർഷങ്ങളിൽ പ്രത്യക്ഷപ്പെട്ട വാൽ നക്ഷത്രങ്ങളുടെ സ്വഭാവം ഒരേപോലെയായിരുന്നു എന്ന് മനസ്സിലായി. അതിൽ നിന്നും ഈ മൂന്ന് വാൽനക്ഷത്രങ്ങളും ഒന്ന് തന്നയാണെന്ന നിഗമനത്തിൽ അദ്ദേഹമെത്തി. അങ്ങനെ ഭ്രമണപഥം കൃത്യമായി കണക്കാക്കി 76 വർഷങ്ങൾക്ക് ശേഷം 1758ൽ ഈ വാൽനക്ഷത്രം ഭൂമിയെത്തെടി എത്തും എന്ന് അദ്ദേഹം പ്രവചിച്ചു.

പക്ഷേ 1758 ഡിസംബർ വരെ ഇവനെ കാണാതിരുന്നപ്പോൾ ശാസ്ത്രലോകം പതുക്കെ ഹാലിയെ മറക്കാൻ തുടങ്ങി. യാത്രാമധ്യേ വ്യാഴത്തിന്റെയും ശനിയുടെയും സമീപത്ത് കൂടി കടന്നു പോയപ്പോഴുണ്ടായ വൻ ഗുരുത്വ വ്യതിയാനങ്ങളായിരുന്നു വാൽ നക്ഷത്രത്തെ വൈകിച്ചത്. ഒടുവിൽ വാനശാസ്ത്ര മോഹികളുടെ പ്രതീക്ഷകളുടെ നീലാകാശത്തെ പ്രകാശമാനമാക്കി 1759 മാർച്ചിൽ അവൻ വന്നെത്തുക തന്നെ ചെയ്തു. തന്റെ മഹത്തായ പ്രവചനം യാഥാർഥ്യമാകുന്നത് കാണാൻ കാത്തുനിൽക്കാതെ 1742 ൽ തന്നെ എഡ്മണ്ട് ഹാലി യാത്രയായിരുന്നു. മനുഷ്യചരിത്രത്തിലെ എറ്റവും വലിയ ഈ വാനശാസ്ത്ര അത്ഭുതത്തിന് മഹാനായ ശാസ്ത്രജ്ഞന്റെ പേര് തന്നെ നല്കിയാണ് ലോകം ആദരിച്ചത്. പിന്നീട് 1835 ലും 1910 ലും ഹാലി ഭൂമിയുടെ ആകാശം ചുംബിച്ചു. 1910ൽ ആദ്യമായി ഹാലി ക്യാമറയിലും പതിഞ്ഞു.

ഹാലിയുടെ വാല്‍നക്ഷത്രം

1910 നും 1986 നും ഇടക്കുള്ള 76 വർഷത്തിൽ ചരിത്രത്തിന്റെ ചക്രം തിരിഞ്ഞത് അതിവേഗത്തിലാണ്. ചിറകുകൾ മുളച്ച മനുഷ്യൻ ഭൂഖണ്ഡങ്ങൾ താണ്ടി പറന്നു. അണുശക്തിയുടെ കരുത്ത് ഹിരോഷിമയുടെ മുകളിൽ തീമഴയായി പെയ്തിറങ്ങി. രണ്ടു ലോകമഹായുദ്ധങ്ങളിലൂടെ രാജ്യാതിർത്തികൾ മാത്രമല്ല മനുഷ്യന്റെ ചിന്താരീതികൾ പോലും മാറിമറിഞ്ഞു. ന്യൂട്ടൻ എന്ന വടവൃക്ഷം ഐൻസ്റ്റീൻ എന്ന സൗമ്യതക്ക് മുൻപിൽ കടപുഴകി. മനുഷ്യന്റെ വിജ്ഞാനതൃഷ്ണയും കഠിനാധ്വാനവും അമ്പിളിമാമനിൽ വരെ വിജയക്കൊടി നാട്ടി. നിതാന്ത ജാഗ്രതയുമായി നമ്മുടെ ആകാശ ദൂതന്മാരായ കൃത്രിമോപഗ്രഹങ്ങൾ സൗരയൂഥം വരെ താണ്ടി.

1986ൽ ഹാലിയെ വരവേൽക്കാൻ നാസയും യൂറോപ്യൻ സ്പേസ് ഏജൻസിയും സോവിയറ്റ് യൂണിയനും വൻ തയ്യാറെടുപ്പുകൾ തന്നെ നടത്തിയിരുന്നു. 1986 ജനുവരിയിലെ ചലഞ്ചർ ദുരന്തം കാരണം നാസ ദൗത്യങ്ങളിൽ നിന്നും പിന്മാറി. ഒരു താഴ്ന്ന ഭ്രമണപഥത്തിൽ സഞ്ചരിക്കുന്ന ഷട്ടിലിൽ നിന്നും ഹാലിയെ നിരീക്ഷിക്കാനായിരുന്നു അവരുടെ പദ്ധതി. പക്ഷെ ചാലഞ്ചർ ദുരന്തം കാരണം ഷട്ടിൽ ദൗത്യങ്ങൾ താത്കാലത്തെക്ക് നിർത്തി വച്ചു.

പിന്നെയുണ്ടായിരുന്നത് യൂറോപ്പിന്റെ ഗിയോട്ടോയും(Giotto ) സോവിയറ്റ് യൂണിയന്റെ വേഗയുമയിരുന്നു. ഇത് രണ്ടും ഹാലിയുടെ ന്യൂക്ലിയസ്സിനു 8000 കിലോമീറ്റർ വരെ സമീപമെത്തി അപൂർവ ചിത്രങ്ങൾ പകർത്തി. വാൽനക്ഷത്രങ്ങളെപ്പറ്റിയുള്ള പഠനം പ്രപഞ്ചൊത്പത്തിയിലേക്ക് വരെ നീളുന്നതാണ് എന്നത് കൊണ്ടുതന്നെ ഹാലിയുടെ വരവിനു അതീവ പ്രാധാന്യമുണ്ടായിരുന്നു. ഇത്രയടുത്ത് ഇത്രയുംസമയം ഒരു വാൽ നക്ഷത്രത്തെ കിട്ടുക എന്നത് ഇനിയും 76 കൊല്ലത്തിനപ്പുറമാണ് എന്നത് പ്രാധാന്യം വർദ്ധിപ്പിച്ചു.

ഒരു മാസത്തോളം പുലർകാല ഗഗനത്തെ പ്രകാശമാനമാക്കി ഹാലി താത്കാലത്തെക്ക് കണ്ണിൽ നിന്ന് മറഞ്ഞു. ഇഷ്ടൻ ഭ്രമണത്തിനിടയിൽ സൂര്യന് പിന്നിൽ ഒരു ഒളിച്ചു കളി നടത്തിയതാണ്. മൂന്നാഴ്‌ച്ചക്ക് ശേഷം സന്ധ്യ മയങ്ങിയ ആകാശത്ത് വീണ്ടും ഹാലിയുടെ പ്രപഞ്ചനാടകം തുടങ്ങി. ഇത്തവണ വാൽ പിന്നിലൊളിപ്പിച്ച് ചന്ദ്രനേക്കാൾ ഇത്തിരികൂടി വലിയ ഒരു പ്രകാശമായി.

1986 മെയ് പകുതിയോടെ പുലരിയുടെ പതിനേഴാമത്തെ കാറ്റിൽ മാഞ്ഞുപോകുന്ന പത്മരാജന്റെ ഗന്ധർവനെപ്പൊലെ ഹാലി കണ്ണിൽ നിന്ന് മറഞ്ഞു. ഒരു ജന്മസാഫല്യത്തിന്റെ നെടുവീർപ്പുകൾ ഈ ചെറുഗോളത്തിലെ വനശാസ്ത്രഭ്രാന്തന്‍മാർക്ക് നല്കിക്കൊണ്ട്. 1986 ജനുവരിയിൽ അറ്റ് ലാന്റിക്കിന്റെ ആഴങ്ങളിലേക്ക് കൂപ്പുകുത്തിയ സ്പേസ് ഷട്ടിൽ ചലഞ്ചറിന്റെ കണ്ണീരോർമകൾ മൂന്നുമാസത്തിന് ശേഷം ആനന്ദാശ്രുക്കൾക്ക് വഴിമാറിയ ഈശ്വരനിയോഗം.

ഈ തലമുറയിൽ ജനിക്കാൻ സാധിച്ചതിനു ഈശ്വരനോട് നന്ദി പറയാനുള്ള കാരണങ്ങളിൽ പ്രഥമസ്ഥാനം തന്നെയുണ്ട്‌ ഹാലിയുടെ വാൽനക്ഷത്രത്തിന്. എത്ര പറഞ്ഞാലും മതിയാവില്ല ആ മീനമാസവാനം നല്‍കിയ കോരിത്തരിപ്പുകൾ.