പാലക്കാട് : ജില്ലയില് മുട്ടയുത്പാദനത്തില് 2016ല് 40 ലക്ഷത്തോളം വര്ധനവുണ്ടായി. പാല്, ഇറച്ചി ഉത്പാദനത്തിലും ഗണ്യമായ വര്ധനവുണ്ടായതായി ജില്ലാ മൃഗസംരക്ഷണ ഓഫീസര് ഡോ: വേണുഗോപാലന് നായര് അറിയിച്ചു.
കര്ഷകര്ക്ക് വിവിധ മേഖലകളില് ശാസ്ത്രീയമായ അവബോധം നല്കിയതിലൂടെയാണ് കടുത്ത വരള്ച്ചയ്ക്കിടയിലും നേട്ടം കൈവരിക്കാനായത്. നിലവിലുള്ള കര്ഷകരെ കൂടാതെ പുതുതലമുറയില് മൃഗസംരക്ഷണത്തില് ആഭിമുഖ്യം വളര്ത്തുന്നതിനായി വിവിധ പദ്ധതികളും ഈ കാലയളവില് നടപ്പാക്കി. പൗള്ട്രി ക്ലബ് പദ്ധതി പ്രകാരം 55 സ്കൂളുകളിലെ 50 വീതം കുട്ടികള്ക്ക് കോഴികളെ വിതരണം ചെയ്തു.
അനിമല് വെല്ഫെയര് സ്കീം പ്രകാരം കുട്ടികള്ക്ക് ഈ മേഖലയുമായി ബന്ധപ്പെട്ട് വിവിധ മത്സരങ്ങള് നടത്തിയത് കൂടാതെ വളര്ത്തുമൃഗങ്ങളെ വിതരണം ചെയ്തു. മികച്ച അനിമല് വെല്ഫെയര് ക്ലബ്ബായി തിരഞ്ഞെടുത്ത സ്കൂളിന് 10,000 രൂപ അവാര്ഡ് നല്കി. പ്രത്യേക ഘടക പദ്ധതി പ്രകാരം നാല് പഞ്ചായത്തുകളിലെ 500 പട്ടികജാതി കുടുംബങ്ങള്ക്ക് 10 കോഴി വീതം നല്കി.
ആടുവളര്ത്തല് പ്രോത്സാഹിപ്പിക്കുന്നതിന് 57 ഗുണഭോക്താക്കള്ക്ക് അഞ്ച് പെണ്ണാടുകളെ നല്കി. മരുതറോഡ് ഗ്രാമപഞ്ചായത്തില് മോഡല് ഗ്രാമപഞ്ചായത്ത് നടപ്പാക്കിയതിനെ തുടര്ന്ന് 20 പേര്ക്ക് അഞ്ച് ആട് വീതം നല്കി. അട്ടപ്പാടി ആടുവളര്ത്തല് കേന്ദ്രം പുനരുദ്ധാരണത്തിന് 20 ലക്ഷം വകയിരുത്തി.
മലമ്പുഴയിലെ റീജനല് പൗള്ട്രി ഫാമിന്റെ വികസനത്തിന് 59 ലക്ഷം കൈമാറി. ക്ഷീരസംഘങ്ങള് മുഖേനെ ബോധവത്കരണ ക്ലാസും ക്യാമ്പും നടത്തി. 58 ക്ഷീരകര്ഷകര്ക്ക് ചെറുകിട ഫാമുകളുടെ ശാക്തീകരണത്തിന്റെ ഭാഗമായി കറവയന്ത്രം സ്ഥാപിക്കാന് ധനസഹായം നല്കി.
ക്ഷീരകര്ഷകര്ക്ക് മൃഗാശുപത്രി വഴി രാത്രികാല സേവനം ലഭ്യമാക്കുന്നതിന് ആറ് ബ്ലോക്കുകളില് ഡോക്ടര്മാരേയും നിയമിച്ചിട്ടുണ്ട്. എല്ലാ മൃഗാശുപത്രികളുടെയും ശുചീകരണവും നടത്തി.
താറാവ് വളര്ത്തല് പദ്ധതിയില് 12 പഞ്ചായത്തുകളിലെ 120 കുടുംബങ്ങള്ക്ക് ആനുകൂല്യം നല്കിയതായും ജില്ലാ മൃഗസംരക്ഷണ ഓഫീസര് അറിയിച്ചു.
