ഭിന്നശേഷിക്കാര് അരൂര് ഗ്രാമപഞ്ചായത്ത് ഓഫീസ് ഉപരോധിക്കുന്നു
അരൂര്: പഞ്ചായത്ത് ബങ്ക് അനുവദിക്കണമെന്ന് ആവശ്യപ്പെട്ട് ഭിന്നശേഷിക്കാര് സാന്ത്വനം ഫൗണ്ടേഷന്റെ നേതൃത്വത്തില് അരൂര് ഗ്രാമ പഞ്ചായത്ത് ഓഫീസ് ഉപരോധിച്ചു. ബങ്ക് അനുവദിക്കണമന്നാവശ്യപ്പെട്ട് മാസങ്ങള് മുമ്പ് ഭിന്നശേഷിക്കാര് പഞ്ചായത്ത് സെക്രട്ടറിക്ക് അപേക്ഷ സമര്പ്പിച്ചിരുന്നു.
മറുപടി ലഭിക്കാതിരുന്നതിനെത്തുടര്ന്നാണ് കുത്തിയിരുപ്പ് സമരം നടത്തിയത്.രാവിലെ പത്തിന് ആരംഭിച്ച സമരം ഒരുമണിക്ക് സമാപിച്ചു. സമരം നടക്കുമ്പോള് പഞ്ചായത്ത് ഭരണാധികാരികളോ, ജനപ്രതിനിധികളോ ആരും തന്നെ ഓഫീസില് എത്തുകയോ സമരക്കാരുമായി സംസാരിക്കുകയോ ചെയ്തില്ല.
വീടിന്റെ അകത്തളങ്ങളില് മാത്രം കഴിഞ്ഞിരുന്ന ഭിന്നശേഷിക്കാരായവര്ക്ക് ഉപജീവന മാര്ഗ്ഗമായി സോപ്പുപൊടി നിര്മ്മാണം തുടങ്ങിയിരുന്നു. ഇതിന്റെ വില്പ്പനയ്ക്കും ഇവരെ പുറം ലോകത്തേയ്ക്കും കൊണ്ടുവരുന്നതിനും വേണ്ടിയാണ് ഭിന്നശേഷിക്കാരുടെ സംഘടനയായ സാന്ത്വനം ഫൗണ്ടേഷന് രംഗത്തിറങ്ങിയത്. എന്നാല് അരൂര് പഞ്ചായത്ത് അധികൃതര് ഭിന്നശേഷിക്കാരുടെ അപേക്ഷ പാടെ അവഗണിക്കുകയായിരുന്നു.
അരൂര് ക്ഷേത്രം കവലയ്ക്കു സമീപം പുറമ്പോക്കില് ഭിന്നശേഷിക്കാര്ക്കും പട്ടികജാതിക്കാരായ പാവപ്പെട്ടവര്ക്കുംവേണ്ടിയാണ് വര്ഷങ്ങള്ക്കു മുമ്പ് ബങ്കുകള് പഞ്ചായത്ത് നിര്മ്മിച്ചത്. എന്നാല് ഇപ്പോള് ഭിന്നശേഷിക്കാരെ മറികടന്ന് രാഷ്ട്രീയക്കാരുടെ ബിനാമികള്ക്കും ഉന്നതസാമ്പത്തിക സ്ഥിതിയുള്ളവര്ക്കും പതിച്ചു നല്കി.പഞ്ചായത്തിലെ തന്നെ ചില അംഗങ്ങളും ഇതിനു പിന്നിലുണ്ടെന്ന് ആരോപണമുയര്ന്നിട്ടുണ്ട്.
ഒരാള് ഒന്നില്ക്കൂടുതല് ബങ്കുകള് കയ്യടക്കി വച്ചിട്ടുള്ളതായും ഭിന്നശേഷിക്കാര് ആരോപിക്കുന്നു. ഇക്കാര്യത്തില് പഞ്ചായത്തിന്റെ നിഷേധാത്മകമായ നിലപാടിനെതിരെ 23 മുതല് അനിശ്ചിതകാല നിരാഹാര സമരം നടത്തുവാനും തദ്ദേശ മന്ത്രി, ഭിന്നശേഷി കമ്മീഷണര്, കളക്ടര് തുടങ്ങിയവര്ക്ക് പരാതി നല്കാനും തീരുമാനിച്ചു. വി.ആര്.ദിലീപ് കുമാര്,അജി,വിന്സി,സുനിത,സുധാകരന് എന്നിവര് സംസാരിച്ചു.
