നെയ്യാറ്റിന്കര: ക്വാറി ഉടമകളുടെ സ്വാധീനത്തില് സിപിഎം വീണു; പാണ്ഡവന്പാറയില് ഖനനാനുമതി. അനുമതി നല്കിയ സിപിഎമ്മിനെതിരെ പ്രതിഷേധവുമായി ഡിവൈഎഫ്ഐ.
പെരുങ്കടവിള ഗ്രാമപഞ്ചായത്തില് സ്ഥിതി ചെയ്യുന്ന ചരിത്ര, സംരക്ഷിത സ്മാരകമായ പാണ്ഡവന്പാറയില് ഖനനം നടത്താന് സിപിഎം നേതൃത്വത്തിലുള്ള ഗ്രാമപഞ്ചായത്ത് ഭരണസമിതി നല്കിയ അനുമതിക്കെതിരെയാണ് വ്യാപക പ്രതിഷേധം.
ക്വാറി ഉടമകള് കുറെനാളായി ഇവിടെ ഖനനം നടത്തുന്നുണ്ട്. ഇതിനെതിരെ നാട്ടുകാരുടെ നേതൃത്വത്തില് പ്രക്ഷോഭവും തുടങ്ങി. എന്നാല്, ക്വാറി ഉടമകള് നാട്ടുകാരെ ഭീഷണിപ്പെടുത്തി രാത്രിയില് ഖനനം തുടര്ന്നു. പാണ്ഡവന്പാറ സംരക്ഷിക്കാനുള്ള നാട്ടുകാരുടെ ശ്രമത്തിനു പിന്തുണയുമായി വിവിധ സംഘടനകളെത്തിയതോടെ സമരം കനത്തു.
അതിനിടെയാണ്, സിപിഎം ഭരണസമിതിയുടെ നടപടി. ക്വാറി ഉടമകള് കൈയയച്ച് സഹായിച്ചപ്പോള് ഖനനത്തിന് അനുമതി നല്കിയെന്നാണ് ആരോപണം. ഭരണസമിതിയില് ഈ ആവശ്യം വന്നപ്പോള് ബിജെപിയുടെ മൂന്ന് അംഗങ്ങളും എതിര്ത്തു. ഇതിനൊപ്പം സിപിഎമ്മിലെ ഒരംഗവും ചേര്ന്നു. പിന്നാലെയാണ് ഡിവൈഎഫ്ഐ പ്രവര്ത്തകര് രംഗത്തെത്തിയത്.
ഇവിടെ സിപിഎമ്മിനെതിരെ ബിജെപിയോടൊപ്പം പരസ്യ പ്രതിഷേധത്തിനൊരുങ്ങുന്നു ഡിവൈഎഫ്ഐ. പെരുങ്കടവിള പഞ്ചായത്തിലെ വിവിധ സ്ഥലങ്ങളില് സിപിഎമ്മിനെതിരായ ഫ്ളക്സ് ബോര്ഡുകളും ഡിവൈഎഫ്ഐ സ്ഥാപിച്ചു. കഴിഞ്ഞ ദിവസങ്ങളില് ചേര്ന്ന സിപിഎം യോഗങ്ങള് ഇതിന്റെ പേരില് കൂട്ടത്തല്ലില് കലാശിച്ചു. സിപിഎമ്മിലെ ഒരു വിഭാഗം പ്രവര്ത്തകര് കൂട്ടരാജിക്കൊരുങ്ങുന്നു.
