കൊച്ചി: കേരള പ്രീമിയര് ലീഗില് കേരള പോലീസിന് ആദ്യ ജയം. കൊച്ചി അംബേദ്കര് സ്റ്റേഡിയത്തില് നടന്ന പോരാട്ടത്തില് സെന്ട്രല് എക്സൈസിനെ മറുപടിയില്ലാത്ത രണ്ട് ഗോളുകള്ക്കാണ് പോലീസ് തകര്ത്തത്. കളിയുടെ 17-ാം മിനിറ്റില് ജിംഷാദും 46-ാം മിനിറ്റില് ഫിറോസും വിജയ ടീമിന്റെ ഗോള് നേടി. പോലീസിന്റെ ആദ്യ വിജയമാണിത്. ആദ്യ കളിയില് എഫ്സി തൃശൂരിനോടാണ് പോലീസ് ടീം പരാജയപ്പെട്ടത്. സെന്ട്രല് എക്സൈസിന്റെ തുടര്ച്ചയായ രണ്ടാം പരാജയം.
കളിയുടെ തുടക്കം മുതല് സെന്ട്രല് എക്സൈസിനായിരുന്നു മുന്തൂക്കം. മികച്ച പന്തടക്കവും മുന്നേറ്റങ്ങളും തുടര്ച്ചയായി പോലീസ് ബോക്സിലേക്ക് നടത്തിയെങ്കിലും സ്ട്രൈക്കര്മാര്ക്ക് പിഴച്ചതാണ് അവര്ക്ക് തിരിച്ചടിയായത്. തുറന്ന അവസരം പോലും ലക്ഷ്യത്തിലെത്തിക്കാന് അവര്ക്കായതുമില്ല. കളിയുടെ 17-ാം മിനിറ്റില് പോലീസ് ടീം നടത്തിയ പ്രത്യാക്രമണത്തിനൊടുവിലാണ് മത്സരത്തിലെ ആദ്യ ഗോള് പിറന്നത്.
ബോക്സിന്റെ വലതുമൂലയില് നിന്ന് എക്സൈസ് ബോക്സിലേക്ക് വന്ന പന്ത് നല്ലൊരു ഷോട്ടിലൂടെ ജിംഷാദ് വലയിലെത്തിച്ചു. ലീഡ് നേടിയതോടെ പോലീസ് ടീം കൂടുതല് ഒത്തിണക്കം കാണിച്ചു തുടങ്ങി. തുടര്ന്ന് നല്ല ചില മുന്നേറ്റങ്ങളും അവരുടെ ഭാഗത്തുനിന്നുണ്ടായി. എന്നാല് ഗോളവസരങ്ങള് തുറന്നെടുക്കുന്നതില് പരാജയപ്പെട്ടതോടെ ആദ്യപകുതിയില് കൂടുതല് ഗോളുകള് പിറന്നില്ല.
രണ്ടാം പകുതി ആരംഭിച്ച് ആദ്യ മിനിറ്റില് തന്നെ പോലീസ് രണ്ടാം ഗോളും നേടി. എക്സൈസ് ബോക്സിലുണ്ടായ കൂട്ടപ്പൊരിച്ചിലിനിടയില് ഫിറോസ് പന്ത് വലയിലേക്ക് തട്ടിയിടുകയായിരുന്നു. രണ്ട് ഗോളിന് പിന്നിലായതോടെ എക്സൈസ് ടീം തിരിച്ചടിക്കാന് മികച്ച മുന്നേറ്റങ്ങള് നടത്തിയെങ്കിലും ഗുണം ചെയ്തില്ല. എക്സൈസ് നിരയില് മെല്വിനോ ഫെര്ണാണ്ടസ് അദ്ധ്വാനിച്ചു കളിച്ചെങ്കിലും സഹതാരങ്ങളില് നിന്ന് കാര്യമായ പിന്തുണ ലഭിച്ചതുമില്ല.
തിരുവനന്തപുരത്തു നടന്ന മത്സരത്തില് തിരൂര് സാറ്റിനെതിരെ ഏജീസിന് മികച്ച ജയം.
ഒന്നിനെതിരെ രണ്ട് ഗോളുകള്ക്കാണ് എജീസ് ഹോം മത്സരത്തില് വിജയം നേടിയത്. ഒരു ഗോളിന് പിന്നിട്ടുനിന്നശേഷമായിരുന്നു ഏജീസിന്റെ തിരിച്ചുവരവ്. കളിയുടെ 24-ാം മിനിറ്റില് ഷഹീദ് ആണ് തിരൂര് സാറ്റിനായി ഗോള് അടിച്ചത്. എന്നാല് 66-ാം മിനുറ്റില് നസറുദ്ദീനും പരിക്കുസമയത്ത് വൈ. ഡാനിയും ലക്ഷ്യം കണ്ടതോടെ വിജയം ഏജീസിനൊപ്പമായി.
