നേപ്പിയര്: ലോകകപ്പ് ക്വാര്ട്ടര് ഫൈനലില് ഇടം പിടിക്കാനായി പാക്കിസ്ഥാനും അയര്ലന്ഡും വിന്ഡീസും ഇന്ന് ഇറങ്ങുന്നു. നിലവില് പൂള് ബിയില് അഞ്ച് കളികളില് ആറ് പോയിന്റുമായി പാക്കിസ്ഥാന് മൂന്നാമതും അയര്ലന്ഡ് നാലാമതുമാണ്. നാല് പോയിന്റുള്ള വെസ്റ്റിന്ഡീസ് അഞ്ചാമതാണ്. നാല് ടീമുകളാണ് ക്വാര്ട്ടറില് കടക്കുക.
നേപ്പിയറില് നടക്കുന്ന മത്സരത്തില് വിന്ഡീസിന് യുഎഇയാണ് എതിരാളികള്. കളിച്ച അഞ്ച് കളികളില് രണ്ടെണ്ണത്തില് മാത്രമാണ് വിന്ഡീസിന് ജയിക്കാന് കഴിഞ്ഞത്. ഇന്നത്തെ കളിയില് വിന്ഡീസ് തോറ്റാല് പാക്കിസ്ഥാനും അയര്ലന്ഡും ക്വാര്ട്ടറില് കടക്കും. മറിച്ച് വെസ്റ്റിന്ഡീസ് യുഎഇക്കെതിരെ വമ്പന് വിജയം നേടിയാലും അവര്ക്ക് ക്വാര്ട്ടര് ഉറപ്പില്ല.
അഡ്ലെയ്ഡില് പാക്കിസ്ഥാനും അയര്ലന്ഡും തമ്മിലുള്ള മത്സരം കഴിയും വരെ കാത്തിരിക്കുകയും വേണം. പാക്കിസ്ഥാന് അയര്ലന്ഡിനോട് തോല്ക്കുകയോ മറിച്ചോ സംഭവിച്ചാല് വിജയിച്ച ടീം ക്വാര്ട്ടറില് പ്രവേശിക്കും.
പിന്നീട് നാലാമത്തെ ടീമിനെ നിശ്ചയിക്കുന്നത് മികച്ച റണ് ശരാശരിയുടെ അടിസ്ഥാനത്തിലായിരിക്കും. നിലവില് മികച്ച റണ്റേറ്റിന്റെ അടിസ്ഥാനത്തില് പാക്കിസ്ഥാന് മൂന്നാമതും അയര്ലന്ഡ് നാലാമതുമാണ്. ഇന്ന് പാക്കിസ്ഥാന് ജയിച്ചാല് ക്വാര്ട്ടറില് ഓസ്ട്രേലിയയുമായി ഏറ്റുമുട്ടും.
