കൊല്ലം: കൊല്ലം നഗരസഭയിലെ കൗണ്സിലര് കോകില എസ്. കുമാറും പിതാവ് സുനില് കുമാറും വാഹനാപകടത്തില് മരിച്ചു. ഇന്നലെ രാത്രി 10:20നു ആയിരുന്നു അപകടം. ശക്തികുളങ്ങര ഭാഗത്ത് ഓണാഘോഷപരിപാടിയില് പങ്കെടുത്തശേഷം രാത്രി വീട്ടിലേയ്ക്ക് സ്കൂട്ടറില് മടങ്ങുന്ന വഴി ദേശീയപാതയില് കാവനാട് ജങ്ഷനടുത്തുവച്ച് അമിതവേഗതയില് വന്ന കാറിടിക്കുകയായിരുന്നു. കോകില (23) സംഭവസ്ഥലത്തുവെച്ചും അച്ഛന് സുനില് കുമാര് (50) ആശുപത്രിയില് വച്ചുമാണ് മരിച്ചത്.
അപകടമുണ്ടാക്കിയ കാര് നിര്ത്താതെ പോയി. ഓടിക്കൂട്ടിയ നാട്ടുകാര് ഇരുവരെയും ആശുപത്രിയില് എത്തിച്ചെങ്കിലും കോകില അതിനകം മരിച്ചിരുന്നു. ഇന്ന് രാവിലെയാണ് സുനില് കുമാര് മരിച്ചത്. പരവൂര് ഫയര് സ്റ്റേഷനിലെ ഡ്രൈവറാണ് സുനില്കുമാര്.
ബിജെപി സ്ഥാനാര്ഥിയായി തേവള്ളി ഡിവിഷനില് നിന്ന് കൊല്ലം കോര്പ്പറേഷനിലേയ്ക്ക് തെരഞ്ഞെടുക്കപ്പെട്ട കൗണ്സിലറാണ് കോകില. കൊല്ലം കോര്പ്പറേഷനിലെ 55 കൗണ്സിലര് മാരില് ഏറ്റവും പ്രായം കുറഞ്ഞ കൗണ്സിലറാണ്.
കൊല്ലം എസ്.എന്. വനിതാകോളേജില് നിന്ന് ഇക്കണോമിക്സില് ബിരുദം നേടിയ ശേഷം കൊല്ലം കര്മ്മലറാണി ട്രെയിനിംഗ് കോളേജില് ബി.എഡ്. പഠിക്കുകയായിരുന്നു കോകില.
കോകില എസ്. കുമാറിന്റെ അകാല വിയോഗത്തില് ബിജെപി സംസ്ഥാന പ്രസിഡന്റ് കുമ്മനം രാജശേഖരന് അഗാധ ദുഃഖം രേഖപ്പെടുത്തി.
ഇന്ന് വൈകിട്ട് അഞ്ചു മണിയ്ക്ക് മുളങ്കാടകം ശ്മശാനത്തിലാണ് സംസ്കാരം.
