തൃശൂര്: കേരള സംഗീത നാടക അക്കാദമി സംഘടിപ്പിച്ച സംസ്ഥാന അമേച്വര് നാടക മത്സര അവാര്ഡുകള് പ്രഖ്യാപിച്ചു. മികച്ച നടനായി ‘കാളഭൈരവനി’ലെ കുഞ്ഞാടി എന്ന കഥാപാത്രത്തെ അവതരിപ്പിച്ച പാര്ത്ഥസാരഥിയും നടിയായി ‘ബോബെ ടെയ്ലേഴ്സിലെ’ മുത്തുമൊഴിയെ അവതരിപ്പിച്ച സുരഭിയും തെരഞ്ഞെടുക്കപ്പെട്ടു.
പാലക്കാട് അത്ലറ്റ് കായിക നാടക വേദി അവതരിപ്പിച്ച ‘ഒരു എന്തിന് എന്തിന് പെണ്കുട്ടി’ മികച്ച അവതരണത്തിനുള്ള അവാര്ഡും ആ നാടകത്തിന്റെ സംവിധായകന് അലിയാര് മികച്ച സംവിധായകനുമുള്ള പുരസ്കാരവും നേടി. മികച്ച നാടകത്തിന് 50,000 രൂപയും രണ്ടാമത്തെ നാടകത്തിന് 25, 000 രൂപയും സംവിധായകന് 20,000 രൂപയും മികച്ച നടന്, നടി എന്നിവര്ക്ക് 15,000 രൂപ വീതവും ക്യാഷ് അവാര്ഡായി ലഭിക്കും. അമേച്വര് നാടകമത്സരത്തിനായി 43 രചനകളാണ് അക്കാദമിയില് ലഭിച്ചത്.
ആലപ്പുഴയിലെ കലവൂര്, കാസര്കോട്ടെ തൃക്കരിപ്പൂര് എന്നീ രണ്ടുമേഖലകളിലായി മത്സരിച്ച 12 നാടകങ്ങളില് നിന്ന് വിധിനിര്ണ്ണയത്തിലൂടെ യോഗ്യത നേടിയ ആറ് നാടകങ്ങളാണ് സംസ്ഥാനമത്സരത്തില് പങ്കെടുത്തത്. ഈ മാസം 22 മുതല് 27 വരെ അക്കാദമി തിയേറ്ററിലാണ് മത്സരങ്ങള് നടന്നത്. അക്കാദമി സെക്രട്ടറി എന്.രാധാകൃഷ്ണന് നായര് പത്രസമ്മേളനത്തിലാണ് അവാര്ഡുകള് പ്രഖ്യാപിച്ചത്. ജൂറി അംഗങ്ങളായ ശശിധരന് നടുവില്, ജ്യോതിഷ് എം.ജി, ജെ. ശൈലജ എന്നിവരും സന്നിഹിതരായിരുന്നു.
മറ്റ് അവാര്ഡുകള് ചുവടെ
രണ്ടാമത്തെ അവതരണം കാളഭൈരവന് (കലാപാഠശാല, ആറങ്ങോട്ടുകര), ‘ബോംബെ ടെയ്ലേഴ്സ്’ ( അതീതി സ്കൂള് ഓഫ് പെര്ഫോമന്സ്, എറണാകുളം),രണ്ടാമത്തെ സംവിധായകന് റിയാസ് (ഗന്ധകം),രണ്ടാമത്തെ നടന് പി.പി. ശ്രീധരന് (കാളഭൈരവനിലെ മായീന്),ബിനോയ് (ബോബെ ടെയ്ലേഴ്സിലെ പീരുഭായ്),രണ്ടാമത്തെ നടി ദീപിക (ഒരു എന്തിന് എന്തിന് പെണ്കുട്ടിയിലെ മൊയ്ന),രചന ദിനേശ്കുമാര്. ഇ.സി. (കാളഭൈരവന്),രണ്ടാമത്തെ രചന വിനോദ് കുമാര് (ബോംബെ ടെയ്ലേഴ്സ്).
