ഗാന്ധിതൻ സന്ദേശമാകണം ജീവിതം
ശാന്തിതൻ സംഗീത ധാരയായ് തീരണം
ഭാരതഭൂമി തൻ സൂര്യദളങ്ങളിൽ
ബാപ്പുവിൻ ആത്മപ്രകാശം ജ്വലിക്കണം
സത്യം ഹൃദയത്തിൻ സ്പന്ദനമാക്കിയ
സദ് ഗുരുനാഥനാണീ യുഗനായകൻ
ത്യാഗപ്രഭാമയൻ-ജ്ഞാനപ്രചാരകൻ
ബാപ്പുവെൻ രാഷ്ട്രത്തിൻ സ്വാതന്ത്ര്യദായകൻ
ധർമ്മനിലാവെഴും കർമ്മപഥങ്ങളിൽ
നന്മ വിടർത്തിയ വന്ദ്യവയോധികൻ
സാധുജനപ്രിയൻ-സാമൂഹ്യ സേവകൻ
ബാപ്പു നിരാലംബരായവർക്കീശ്വരൻ
ജാതിമതങ്ങളിൽ നീറും ജനതയ്ക്ക്
സാന്ത്വനമേകിയ ദീനദയാപരൻ
മാനവജാതിയെ ഒന്നാക്കി മാറ്റുവാൻ
ജീവൻ സമർപ്പിച്ച സ്നേഹസനാതനൻ
