കല്‍പ്പറ്റ : ഭരണത്തിലേറിയപ്പോള്‍ അധികാരത്തിന്റെ മുഖം മൂടിയണിഞ്ഞ് പെന്‍ഷന്‍കാരുടെ നിരന്തര ആവശ്യങ്ങള്‍ മറന്നുകൊണ്ട് നിശബ്ദത പാലിക്കുന്ന ഇടതു പക്ഷ സംഘടനകള്‍ പെന്‍ഷനേഴ്‌സിനോടുള്ള കടമ മറക്കുകയാണെന്ന് പെന്‍ഷനേഴ്‌സ് സംഘ് കുറ്റപ്പെടുത്തി.
ഒറ്റത്തവണ പെന്‍ഷന്‍ കുടിശ്ശിക തരാതെ നാല് ഗഡുക്കളാക്കി രണ്ട് വര്‍ഷം കൊണ്ട് തരത്തക്ക രീതിയില്‍ മുന്‍ ഗവണ്‍മെന്റ് എടുത്ത നിലപാടിനെതിരെ ഇടതു പെന്‍ഷനേഴ്‌സ് സംഘടനകള്‍ സമരരംഗത്തുണ്ടായിരുന്നു. എന്നാല്‍ സമരത്തില്‍നിന്നും പൂര്‍ണ്ണമായും പിന്‍മാറി ഇടതു സര്‍ക്കാറിന് പിന്തുണ നല്‍കുകയാണ് ഇവരിപ്പോള്‍. ഇത് എല്ലാപെന്‍ഷന്‍കാരും തിരിച്ചറിയണമെന്നും അതിനെതിരെ ശബ്ദമുയര്‍ത്തണമെന്നും പെന്‍ഷനേഴ്‌സ് സംഘ് ജില്ലാ സെക്രട്ടറി എ.സി.രവീന്ദ്രന്‍ ആവശ്യപ്പെട്ടു.
വെറും ധനസമാഹരണത്തിനു വേണ്ടിയുള്ള ഇടതുപക്ഷ യൂണിയനുകളുടെ പ്രവര്‍ത്തനം ലജ്ജാകരമാണെന്ന് പെന്‍ഷനേഴ്‌സ് സംഘ് സംസ്ഥാന സമിതിയംഗം പി.സുന്ദരന്‍ പറഞ്ഞു.
പെന്‍ഷനേഴ്‌സ് സംഘ് ജില്ലാ പ്രസിഡന്റ് സി.പി.വിജയന്‍ അദ്ധ്യക്ഷത വഹിച്ച യോഗത്തില്‍ ഡോ.രാഘവവാര്യര്‍, സി.പ്രതാപന്‍ ,ടി.ജി. ബാബു രാജേന്ദ്രനാഥ്, പി.പി. ശശീന്ദ്രന്‍, പി.കെ.ശശിധരന്‍ ,എം.ഈശ്വരന്‍ എന്നിവര്‍ പ്രസംഗിച്ചു.കെ.ടി.ബാലകൃഷ്ണന്‍ നന്ദി പ്രകടനം നടത്തി
പ്രതികരിക്കാൻ ഇവിടെ എഴുതുക: