ഗോത്ര വിദ്യാര്‍ത്ഥികള്‍ക്കായി ഒപ്പം ഒപ്പത്തിനൊപ്പം

മാനന്തവാടി : വിദ്യാലയങ്ങളില്‍ പാഠ്യേതരപ്രവര്‍ത്തനങ്ങളില്‍ എന്നും അവഗണിക്കപ്പെടുന്ന ഗോത്രവിദ്യാര്‍ത്ഥികളില്‍ ആത്മവിശ്വാസം നിറച്ച് വിജയ തീരങ്ങളിലെത്തിക്കാന്‍ തൊണ്ടര്‍നാട് ഗ്രാമപഞ്ചായത്തിന്റെ തനത് പരിവാടി ഒപ്പം ഒപ്പത്തിനൊപ്പം അവസാന ഘട്ടത്തിലേക്ക്. 2016 ജൂലൈ മാസത്തില്‍ പഞ്ചായത്തിലെ എല്ലാ വിദ്യാലയങ്ങളിലും ഗോത്ര ക്ലബ്ബ് രൂപീകരിച്ച് തനത് കലകളില്‍ പരിശീലനം കൊടുത്ത് സന്തോഷകരമായ വിദ്യാലയ അനുഭവങ്ങള്‍ പ്രദാനം ചെയ്യാന്‍ പദ്ധതിക്കായി. ഓരോ വിദ്യാലയത്തിനും ഗോത്രകലാമേള സംഘടിപ്പിച്ച് ഗോത്ര വിഭാഗത്തിലെ കുട്ടികള്‍ വേദികളില്‍ നിറഞ്ഞാടിയത് തികച്ചും പുതിയ അനുഭവമായിരുന്നു. 2017 ജനുവരി 20 ന് തേറ്റമല ജി.എച്ച്.എസില്‍ വെച്ച് പഞ്ചായത്ത് തല ഗോത്ര കലാമേള നടക്കുകയാണ്. കലാമേള വമ്പിച്ച വിജയമാക്കാന്‍ സംഘാടക സമതി എല്ലാ ഒരുക്കങ്ങളും പൂര്‍ത്തിയാക്കിയിട്ടുണ്ട്. 2016 നവംബര്‍ മാസം നടന്ന പഞ്ചായത്ത്തല ഗോത്ര കായിക മേള വന്‍ വിജയമായിരുന്നു. ഫെബ്രുവരി മാസത്തില്‍ പഞ്ചായത്തിലെ നിര്‍ദ്ധരായ ആദിവാസി കുട്ടികളെ പഠനയാത്രയ്‌ക്ക് കൊണ്ടുപോകാന്‍ ഒന്നര ലക്ഷംരൂപ പദ്ധതിയില്‍ വകയിരുത്തിയിട്ടുണ്ട് ജീവിതാന്ത്യം വരെ വിനോദയാത്ര പോകാന്‍ കഴിയാത്ത പണിയ വിഭാഗം കുട്ടികള്‍ക്ക് മുന്‍ഗണന നല്‍കിയാണ് പദ്ധതി ആസൂത്രണം ചെയ്തിരിക്കുന്നത് ജനുവരി 27, 28 തീയ്യതികളില്‍ ട്രൈബല്‍ വിഭാഗത്തിലെ നൂറ് കുട്ടികളെ പങ്കെടുപ്പിച്ചുകൊണ്ട് കുഞ്ഞോം ഗവ.യുപിയില്‍ നടക്കുന്ന സഹവാസ ക്യാമ്പില്‍ വിദഗ്ധരായ അധ്യാപക പരിശിലനം നല്‍കും ആകെ അഞ്ച് ലക്ഷം രൂപ പഞ്ചായത്ത് ചിലവഴിക്കന്ന ഈ പദ്ധതി വഴി ഗോത്ര വിഭാഗം കുട്ടികളില്‍ ആത്മവിശ്വാസം വളര്‍ത്താനും തങ്ങളും അംഗീകരിപ്പെടുകയാണെന്ന പ്രതീതി സൃഷ്ടിക്കാനും കഴിഞ്ഞിട്ടുണ്ട്. ഗ്രാമ പഞ്ചായത്ത് പ്രസിഡണ്ട് പി.എ.ബാബു, വൈസ് പ്രസിഡണ്ട് സലോമി ഫ്രാന്‍സിസ്, വിദ്യഭ്യാസ സ്റ്റാറ്റിംഗ് കമ്മിറ്റി ചെയര്‍മാന്‍ പി.കേശവന്‍, തേറ്റമല സ്‌കൂള്‍ ഹെഡ്മിസ്ട്രസ് ജെസ്സി, കേളോത്ത് അബ്ദുള്ള, സന്തോഷ് എന്നിവര്‍ പത്രസമ്മേളനത്തില്‍ പങ്കെടുത്തു.