കല്‍പ്പറ്റ: വനംവകുപ്പിന്റെ തെറ്റായ നടപടി മൂലം തെരുവില്‍ കഴിയുന്ന കാഞ്ഞിരത്തിനാല്‍ കുടുംബത്തിന് നീതി ലഭ്യമാക്കണമെന്ന് ആവശ്യപ്പെട്ട് കാഞ്ഞിരത്തിനാല്‍ കുടുംബ സമരസഹായ സമിതി ഇന്ന് കല്‍പ്പറ്റയില്‍ രാപകല്‍ ഉപവാസ സമരം നടത്തും. രാവിലെ 10ന് ആരംഭിച്ച് 18ന് രാവിലെ 10ന് സമാപിക്കും. വിജിലന്‍സ് റിപ്പോര്‍ട്ടും സബ് കലക്ടര്‍ അധ്യക്ഷനായ സമിതി തയാറാക്കിയ റിപ്പോര്‍ട്ടും കാഞ്ഞിരത്തിനാല്‍ കുടുംബത്തിന് അനുകൂലമായിരിക്കെ യാഥാര്‍ത്ഥ്യത്തിന് നേരെ കണ്ണടച്ച് അധികൃതര്‍ നീതി നിഷേധിക്കുന്നതില്‍ സമൂഹ മനസാക്ഷി ഉണര്‍ത്താനാണ് ഉപവാസ സമരം നടത്തുന്നത്. 2015 ആഗസ്റ്റ് ഒന്നിന് വയനാട് കലക്ടറേറ്റ് പടിക്കല്‍ അനിശ്ചിതകാല സമരമിരിക്കുന്ന കാഞ്ഞിരത്തിനാല്‍ കുടുംബത്തിനു വേണ്ടി നിയമപോരാട്ടം നടത്താനും പ്രക്ഷോഭ പരിപാടികള്‍ നടത്താനും കുടുംബ സമരസഹായ സമിതി തീരുമാനിച്ചിട്ടുണ്ട്. വനംവകുപ്പിന്റെ കള്ളക്കളികള്‍ അക്കമിട്ട് നിരത്തുന്നതാണ് വിജിലന്‍സ്, സബ് കലക്ടര്‍ എന്നിവരുടെ റിപ്പോര്‍ട്ടുകള്‍. വനംമന്ത്രി, നിയമസഭ, ഹൈക്കോടതി, ഫോറസ്റ്റ് ട്രിബ്യൂണല്‍ തുടങ്ങിയവരെ വനപാലകര്‍ തെറ്റിദ്ധരിപ്പിക്കുകയായിരുന്നു. ഈ വിഷയത്തില്‍ വനംവകുപ്പ് ഉദ്യോഗസ്ഥര്‍ക്കെതിരേ നടപടിക്ക് വിജിലന്‍സ് റിപ്പോര്‍ട്ടില്‍ ശിപാര്‍ശ ചെയ്തുവെങ്കിലും പൂഴ്‌ത്തിവെക്കുകയാണുണ്ടായത്. നീതിയുടെ കാവലാളുകള്‍ തന്നെ വേട്ടക്കാരായി മാറുന്നത് അതിഭീകരമാണ്. കാഞ്ഞിരത്തിനാല്‍ കുടുംബത്തിനുണ്ടായ നിതി നിഷേധത്തില്‍ പൊതു സമൂഹം ശക്തമായി പ്രതികരിച്ചില്ലെങ്കില്‍ നാളെ മറ്റ് പല കുടുംബങ്ങളെയും വനംവകുപ്പ് തെരുവിലിറക്കാം.
പൊതുസമൂഹം നിസംഗത തുടര്‍ന്നാല്‍ അത് വേട്ടക്കാരുടെ മനോവീര്യം വര്‍ധിപ്പിക്കുമെന്നും സമാന ചിന്താഗതിയുള്ള ആര്‍ക്കും ഉപവാസ സമരത്തില്‍ പങ്കെടുക്കാമെന്നും സമരസഹായ സമിതി ഭാരവാഹികള്‍ അറിയിച്ചു.
പ്രതികരിക്കാൻ ഇവിടെ എഴുതുക: