കല്‍പ്പറ്റ : കല്‍പ്പറ്റ ജിവിഎച്ച്എസ്എസിനെ അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന്റെ ഔദ്യോഗിക പ്രഖ്യാപനം നാളെ മുഖ്യമന്ത്രി പിണറായി വിജയന്‍ നിര്‍വഹിക്കുമെന്ന് സി.കെ.ശശീന്ദ്രന്‍ എംഎല്‍എ, കല്‍പ്പറ്റ നഗരസഭാ ചെയര്‍പേഴ്‌സണ്‍ ഉമൈബമൊയ്തീന്‍കുട്ടി എന്നിവര്‍ പത്രസമ്മേളനത്തില്‍ അറിയിച്ചു. പൊതുവിദ്യാഭ്യാസ മേഖലയെ അടിമുടി നവീകരിച്ച് ആകര്‍ഷകമാക്കാനുള്ള സര്‍ക്കാര്‍ നടപടിയുടെ ഭാഗമായാണ് കല്‍പ്പറ്റ ജിവിഎച്ച്എസ്എസിനെ അന്താരാഷ്ട്ര നിലവാരത്തിലേക്ക് ഉയര്‍ത്തുന്നത്. ഭൗതികസാഹചര്യങ്ങളും പഠനനിലവാരങ്ങളുമെല്ലാം മാറും. കമ്പ്യൂട്ടര്‍ അടിസ്ഥാനത്തില്‍ പാഠ്യരീതിയെ മാറ്റുമ്പോള്‍ തന്നെ കാര്‍ഷിക വിദ്യാഭ്യാസത്തിനും ഊന്നല്‍ കൊടുക്കും. സ്‌കൂള്‍ അന്തരീക്ഷത്തില്‍ വലിയ മാറ്റമാണ് പുതിയ പ്രഖ്യാപനത്തോടെ വരാന്‍പോകുന്നത്. പ്രശസ്ത ആര്‍കിടെക്റ്റ് ആര്‍.ശങ്കറാണ് നിര്‍മ്മാണ പ്രവര്‍ത്തനങ്ങളുടെ രൂപകല്‍പ്പന ചെയ്യുന്നത്. സംസ്ഥാന സര്‍ക്കാര്‍ അഞ്ച് കോടി രൂപ അനുവദിച്ചിട്ടുണ്ട്. ആവശ്യമായ തുക മറ്റ് സംവിധാനങ്ങളിലൂടെ സമാഹരിക്കും. ഹരിജനങ്ങളുടെ വിദ്യാഭ്യാസ ആവശ്യാര്‍ഥം 1929ലാണ് മുണ്ടേരിയില്‍ സ്‌കൂള്‍ ആരംഭിക്കുന്നത്. ഏകാധ്യാപക വിദ്യാലയമായി നാല് വര്‍ഷത്തിനുള്ളില്‍ എല്‍പി സ്‌കൂളായി മാറുകയും 1943ല്‍ പുതിയ കെട്ടിടത്തിലേക്ക് സ്ഥാ പിക്കുകയുമായിരുന്നു. 1980ല്‍ യുപി സ്‌കൂളും 1983ല്‍ ഹൈസ്‌കൂളും 1988ല്‍ വിഎച്ച്എസ്ഇയും 2010ല്‍ ഹയര്‍സെക്കന്‍ഡറിയും നിലവില്‍ വന്നു. എന്‍എസ്എസ്, എസ്പിസി, ജെആര്‍സി തുടങ്ങിയ വിവിധ സന്നദ്ധ സംഘടനാ പ്രവര്‍ത്തനങ്ങള്‍ മികച്ച നിലയില്‍ വിദ്യാലയത്തില്‍ നടക്കുന്നുണ്ട്. പത്രസമ്മേളനത്തില്‍ നഗരസഭാ വൈസ് ചെയര്‍മാന്‍ പി.പി.ആലി, ഹെഡ്മാസ്റ്റര്‍ എന്‍.ഡി.തോമസ്, പിടിഎ പ്രസിഡന്റ് സി.എന്‍.ചന്ദ്രന്‍, കെ.സുഗതന്‍, ദിവാകരന്‍ തുടങ്ങിയവര്‍ പങ്കെടുത്തു.
Friday, January 31, 2025
കല്‍പ്പറ്റ ജിവിഎച്ച്എസ്എസ് അന്താരാഷ്ട്ര നിലവാരത്തിലേക്ക്
ബന്ധപ്പെട്ട വാര്‍ത്തകള്‍
പുതിയ വാര്‍ത്തകള്‍
പ്രതികരിക്കാൻ ഇവിടെ എഴുതുക: