മലപ്പുറം: നിലമ്പൂര്‍- നഞ്ചന്‍കോട് റെയില്‍പ്പാത സാധ്യമാവുമെന്ന് ഡി.എം.ആര്‍.സി. ചെയര്‍മാന്‍ ഇ.ശ്രീധരന്‍ പറഞ്ഞു. വയനാട് സിവില്‍ സ്റ്റേഷനിലെ ആസൂത്രണഭവനില്‍ റെയില്‍പ്പാത നിര്‍മാണവുമായി ബന്ധപ്പെട്ട് ചേര്‍ന്ന ജനപ്രതിനിധികളുടെയും ഉദേ്യാഗസ്ഥരുടെയും യോഗത്തില്‍ സംസാരിക്കുകയായിരുന്നു അദ്ദേഹം. ഈ പാതയുടെ നിര്‍മ്മാണച്ചെലവ് കൂടുതലാണെന്ന വാദം ശരിയല്ലെന്നും അദ്ദേഹം പറഞ്ഞു. പുതിയ അലൈന്‍മെന്റില്‍ പാതയുടെ നീളം 236 കിലോമീറ്ററില്‍ നിന്ന് 162 കിലോമീറ്ററായി കുറയ്‌ക്കാന്‍ കഴിയും. സര്‍വെ നടത്താനുള്ള പൂര്‍ണ അനുമതി ലഭിച്ചാല്‍ ഒന്നര വര്‍ഷത്തിനുള്ളില്‍തന്നെ ഫൈനല്‍ ലൊക്കേഷന്‍ സര്‍വ്വെ പൂര്‍ത്തിയാക്കാനാകും.
പാതയുടെ നിര്‍മാണം കേരളം, കര്‍ണാടക സംസ്ഥാനങ്ങളില്‍ യാതൊരുവിധ പാരിസ്ഥിതിക പ്രശ്‌നങ്ങളുമുണ്ടാക്കില്ലെന്ന് പ്രാഥമിക പാരിസ്ഥിതിക പഠനത്തില്‍ വ്യക്തമായതായും അദ്ദേഹം പറഞ്ഞു. യഥാര്‍ത്ഥ നിര്‍മാണച്ചെലവ് അന്തിമ സര്‍വ്വെയ്‌ക്ക് ശേഷമേ കൃത്യമായി കണക്കാക്കാനാവു. പാതയുടെ നിര്‍മാണം പ്രതേ്യകം കമ്പനി രൂപവത്കരിച്ചാവും നടത്തുക. പദ്ധതിയുടെ പൂര്‍ത്തീകരണത്തിന് ഏകദേശം 5000 കോടി രൂപ ചെലവ് പ്രതീക്ഷിക്കുന്നുണ്ട്. ഇതില്‍ 2500 കോടി രൂപ പൊതു കടമെടുപ്പിലൂടെയും 2500 കോടി കേരള-കര്‍ണ്ണണാടക സംസ്ഥാന സര്‍ക്കാറുകളും റെയില്‍വെയും കൂടി മുതല്‍മുടക്കിയും കണ്ടെത്താം. 162 കിലോമീറ്റര്‍ ദൈര്‍ഘ്യമുള്ള പാതയില്‍ 22 കിലോമീറ്റര്‍ അണ്ടര്‍ ഗ്രൗണ്ട് പാതയായിരിക്കും. കേരളത്തില്‍ 22 കിലോമീറ്ററും കര്‍ണ്ണാടകത്തില്‍ 13.5 കിലോമീറ്ററും മാത്രമാണ് സംരക്ഷിത വനത്തിലൂടെ കടന്ന് പോവുന്നത്. 10 കിലോമീറ്റര്‍ സമതലവും 55 കിലോമീറ്റര്‍ മലയോര മേഖലയുമാണുള്ളത്. സമതല പ്രദേശം 85 കിലോമീറ്ററാണ്. ഇതില്‍ ഭൂരിഭാഗവും കര്‍ണ്ണാകടത്തിലെ ആള്‍പ്പാര്‍പ്പില്ലാത്ത പ്രദേശങ്ങളാണ്. കൂടാതെ അധികം തരിശ് പ്രദേശങ്ങളുമാണ്. പാത സംസ്ഥാനങ്ങളിലൂടെ കടന്ന് പോകുന്നതിന്റെ ദൈര്‍ഘ്യമനുസരിച്ച് മൂലധന നിക്ഷേപാനുപാതം നിശ്ചയിച്ചാല്‍ കര്‍ണാടക 40 ശതമാനവും കേരളം 60 ശതമാനവും വഹിച്ചാല്‍ മതിയാകും. ഈ അനുപാതത്തിലാണെങ്കില്‍ കേരളം 800 കോടി രൂപ മുതല്‍ മുടക്കിയാല്‍ മതിയാകും. സര്‍വെ പൂര്‍ത്തിയാക്കിയാല്‍ അഞ്ച് കൊല്ലംകൊണ്ട് നിര്‍മ്മമാണം പൂര്‍ത്തിയാക്കാനാവും. സര്‍വെ ആരംഭിക്കുന്നതിന് മുമ്പായി രണ്ട് സംസ്ഥാനങ്ങളും സര്‍വെ സംബന്ധിച്ച് വിജ്ഞാപനം ചെയ്ത് ജനങ്ങളെ വിവരമറിയിക്കേണ്ടതുണ്ട്. റെയില്‍വെയും സംസ്ഥാന സര്‍ക്കാറുകളും പൊതുജനങ്ങളും ഒന്നിച്ച് പ്രവര്‍ത്തിച്ചാല്‍ നിലമ്പൂര്‍ നഞ്ചന്‍കോട് റെയില്‍പാത യാഥാര്‍ഥ്യമാകുമെന്നും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: