തൊടുപുഴ: റവന്യു ജില്ലാ സ്കൂള് കലോത്സവം മൂന്നാം ദിനം പിന്നിടുമ്പോള് തൊടുപുഴ ഉപജില്ല മുന്നേറുന്നു. ഒരു പടി മാത്രം അകലെ തൊടുപുഴ കിരീടം ഏതാണ്ട് ഉറപ്പിച്ചിരിക്കുകയാണ്. യുപി, ഹൈസ്കൂള്, ഹയര്സെക്കന്ഡറി വിഭാഗങ്ങളില് വ്യക്തമായ ലീഡോടെയാണ് തൊടുപുഴയുടെ മുന്നേറ്റം.
ഹയര്സെക്കന്ഡറി വിഭാഗത്തില് 70 ഇനങ്ങള് പൂര്ത്തിയായപ്പോള് തൊടുപുഴയ്ക്ക് 274 പോയിന്റാണു ലഭിച്ചത്. തൊട്ടുപിന്നിലുള്ള അടിമാലിക്ക് 234 പോയിന്റു ലഭിച്ചു. ഹൈസ്കൂള് വിഭാഗത്തില് 68 ഇനങ്ങള് പൂര്ത്തിയാപ്പോള് 288 പോയിന്റു നേടി തൊടുപുഴ മുന്നേറുകയാണ്. 251 പോയിന്റുമായി കട്ടപ്പനയാണ് രണ്ടാം സ്ഥാനത്ത്. യുപി വിഭാഗത്തില് 31 ഇനങ്ങള് പൂര്ത്തിയാപ്പോള് 140 പോയിന്റു നേടി തൊടുപുഴ കിരീടം ഉറപ്പിച്ചു. തൊട്ടുപിന്നിലുള്ള കട്ടപ്പനയ്ക്ക് 122 പോയിന്റു ലഭിച്ചു.
യുപി വിഭാഗം സംസ്കൃത കലോത്സവത്തിലും തൊടുപുഴയ്ക്കാണ് മുന്നേറ്റം. എച്ച്എസ് വിഭാഗം സംസ്കൃത കലോത്സവത്തില് 55 പോയിന്റുമായി തൊടുപുഴയും 43 പോയിന്റുമായി അടിമാലിയും പിന്നിലുണ്ട്. യുപി വിഭാഗം അറബിക് കലോത്സവത്തില് മത്സരങ്ങള് എല്ലാം പൂര്ത്തിയാപ്പോള് 65 പോയിന്റുമായി തൊടുപുഴ കിരീടം ചൂടി. 54 പോയിന്റു നേടി കട്ടപ്പന രണ്ടാം സ്ഥാനത്തെത്തി. എച്ച്എസ് അറബി കലോത്സവത്തില് 91 പോയിന്റുനേടി നെടുങ്കണ്ടം ഓവറോള് ചാമ്പ്യന്മാരായി.
സ്കൂള് തലത്തില് ഹൈസ്കൂള് ഹയര്സെക്കണ്ടറി വിഭാഗങ്ങളില് കുമാരമംഗലം എംകെഎന്എംഎച്ച്എസ്എസ് കിരീടം ഉറപ്പിച്ച നിലയിലാണ്. ഹയര്സെക്കന്ഡറിയില് കുമാരമംഗലം 125 പോയിന്റു നേടിയപ്പോള് തൊട്ടുപിന്നിലുള്ള മുതലക്കോടം സെന്റ് ജോര്ജ് എച്ച്എസ് 53 പോയിന്റു നേടി. ഹൈസ്കൂള് തലത്തില് കുമാരമംഗലം 110 പോയിന്റുമായി മുന്നേറുമ്പോള് തൊട്ടുപിന്നിലുള്ള കട്ടപ്പന ഓസാനത്തിന് 83 പോയിന്റാണുള്ളത്. യുപി വിഭാഗത്തില് ഇഞ്ചോടിഞ്ച് പോരാട്ടമാണ് നടക്കുന്നത്.
