ഹൈസ്കൂള് വിഭാഗം പരിചമുട്ട് കളിയില് സംസ്ഥാന തലത്തില് മത്സരിക്കാന്
യോഗ്യത നേടിയ വടകര എസ്എന്എച്ച്എസ്എസ് ടീം
കോഴിക്കോട്: കേരളനടനവും പരിചമുട്ടുകളിയും പാഠകവുമായി കലയുടെ സര്ഗോത്സവത്തിന് ജില്ലാസ്കൂള് കലോത്സവത്തിന് തിരശ്ശീല ഉയര്ന്നു. സ്റ്റേജിതര മത്സരങ്ങള്ക്കൊപ്പം പതിനൊന്ന് വേദികളിലും മത്സരങ്ങള് ആരംഭിച്ചതോടെ ജില്ലാ സ്കൂള് കലോത്സവത്തിന്റെ ആദ്യദിനം താളരാഗലയഭാവ സാന്ദ്രമായി.
ഒന്നാം ദിവസത്തിന്റെ ആലസ്യം മിക്ക വേദികളിലും മത്സര പരിപാടികള് വൈകുന്നതിന് കാരണമായി. സാധാരണ കൃത്യസമയത്ത് ആരംഭിക്കുന്ന സ്റ്റേജിതര മത്സരങ്ങളും ഇന്നലെ രണ്ടു മണിക്കൂറോളം വൈകിയാണ് ആരംഭിച്ചത്. വിധികര്ത്താക്കള് എത്താന് വൈകിയതാണ് എന്ജിഒ ക്വാര്ട്ടേഴ്സ് എച്ച്എസ്എസില് നടന്ന വിവിധ സ്റ്റേജിതര മത്സരങ്ങള് വൈകാന് കാരണമായത്. പ്രധാനവേദിയില് വിധികര്ത്താക്കള് എത്തിയിരുന്നെങ്കിലും ഇവര്ക്ക് പരിപാടി നടക്കുന്നിടത്തേക്ക് എത്താനുള്ള വാഹനം വൈകിയതാണ് മത്സരം ആരംഭിക്കുന്നത് വൈകാന് കാരണമായതെന്നും ആക്ഷേപമുണ്ട്.
പ്രധാന വേദിയില് നടന്ന പരിചമുട്ടുകളിയും ചവിട്ടു നാടകവും വിധിനിര്ണ്ണയത്തിന്റെ പേരില് ഒന്നാം ദിവസത്തെ നിറം കെടുത്തി. വിധി നിര്ണ്ണയത്തെക്കുറിച്ച് ആക്ഷേപവുമായി ടീമുകള് രംഗത്തെത്തിയതോടെ സംഘാടകസമിതി ജനറല് കണ്വീനര് കൂടിയായ ഡിഡിഇക്ക് വേദിയില് എത്തി മത്സരാര്ത്ഥികളുമായി സംസാരിക്കേണ്ടതായും വന്നു. ഒന്നാം ദിവസമായിട്ടും അപ്പീലുകള്ക്ക് കുറവുണ്ടായില്ല. 254 അപ്പീലുകളാണ് വിവിധ വിദ്യാഭ്യാസ ജില്ലാ ഓഫീസര് മുഖേന ഇന്നലെ എത്തിയത്.
