ശബരിമല: ദര്ശനത്തിനെത്തി സന്നിധാനത്തുവച്ച് അച്ഛനില് നിന്ന് ഒറ്റപ്പെട്ട പെണ്കുട്ടിയെ തിരികെ നാട്ടിലെത്തിച്ചു. തമിഴ്നാട് വെല്ലൂര് തിരുപ്പത്തൂര് സിഎസ്ഐ മെട്രിക്കുലേഷന് സ്കൂളിലെ വിദ്യാര്ത്ഥിനി വൈഷ്ണവിയാണ് തിങ്കളാഴ്ച വൈകിട്ട് ഒറ്റപ്പെട്ടത്. വൈകിട്ട് ദീപാരാധന സമയമാണ് ഇരുവരും ദര്ശനം നടത്തിയത്. തുടര്ന്ന് കുട്ടിയെ തുലാഭാരതട്ടിന് സമീപത്ത് ഇരുത്തിയ ശേഷം അച്ഛന്് മധുരപലഹാരം വാങ്ങാനായി പോയി.
രാത്രി പതിനൊന്നിന് നട അടച്ചിട്ടും അച്ഛന് എത്താത്തിനാല് ദേവസ്വം ഗാര്ഡ് റൂമില് കുട്ടിയെ ഇരുത്തി. നേരം പുലര്ന്നിട്ടും കുട്ടിയെ തേടി പിതാവെത്തിയില്ല. തുടര്ന്ന് ദേവസ്വം ഗാര്ഡായ സനിത് കുട്ടിയുടെ സ്കൂള് വിലാസം ഓണ്ലൈന് മുഖാന്തിരം കണ്ടെത്തി ജില്ലാകളക്ടറുമായി ബന്ധപ്പെട്ടു. കളക്ടറുടെ ഇടപെടലിനെ തുടര്ന്ന് കുട്ടിയുടെ അമ്മാവനും അമ്മയും ടെലഫോണില് ദേവസ്വം ഓഫീസുമായി ബന്ധപ്പെട്ടു.
തമിഴ്നാട്ടിലെ തീര്ത്ഥാടകര്ക്കൊപ്പം കുട്ടിയും പിതാവും തനിച്ചാണ് ദര്ശനത്തിന് എത്തിയതെന്ന് അവര് അറിയിച്ചു. പിതാവിന് അല്പം മനോവൈകല്യം ഉണ്ടെന്നും ഗുരുസ്വാമിക്കൊപ്പം കുട്ടിയെ തിരികെവിടണമെന്നും അമ്മ ആവശ്യപ്പെട്ടു. ഇവരില്നിന്നു ശേഖരിച്ച ഗുരുസ്വാമിയുടെ ഫോണ് നമ്പരില് വിളിച്ച് അവര്ക്കൊപ്പം ഇന്നലെ കുട്ടിയെ തിരികെ അയച്ചു. സോപാനം എസ്ഒ ഉപ്പിലിഅപ്പന്, ദേവസ്വം ഗാര്ഡുമാര് എന്നിവരുടെ സാന്നിദ്ധ്യത്തിലാണ് കുട്ടിയെ തിരികെ അയച്ചത്.
