തിരുവനന്തപുരം: മെഡിക്കല് കോളേജിന്റെ 65-ാം വാര്ഷികത്തോടനുബന്ധിച്ച് ആരോഗ്യ സര്വകലാശാല വിദ്യാര്ത്ഥി യൂണിയനും തിരുവനന്തപുരം മെഡിക്കല് കോളേജും സംയുക്തമായി സംഘടിപ്പിക്കുന്ന ഗ്ലോബല് മെഡിക്കല് എക്സിബിഷന് മെഡക്സിന്റെ ഉദ്ഘാടനം മുഖ്യമന്ത്രി പിണറായി വിജയന് നിര്വഹിച്ചു. ടൂറിസം, ദേവസ്വം വകുപ്പ് മന്ത്രി കടകംപള്ളി സുരേന്ദ്രന് അധ്യക്ഷത വഹിച്ച ചടങ്ങില് ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് മുഖ്യ പ്രഭാഷണം നടത്തി.
തിരുവനന്തപുരം ഗവ. മെഡിക്കല് കോളേജിനെ ലോകോത്തര നിലവാരത്തിലുള്ള സ്ഥാപനമാക്കി മാറ്റുമെന്ന് ആരോഗ്യ, കുടുംബക്ഷേമ വകുപ്പ് മന്ത്രി കെ.കെ. ഷൈലജ മുഖ്യപ്രഭാഷണത്തില് പറഞ്ഞു. ലോകത്തിലെ 10 മെഡിക്കല് കോളേജുകളില് ഒന്നായി തിരുവനന്തപുരം മെഡിക്കല് കോളേജിനെ മാറ്റുകയാണ് തന്റെ ലക്ഷ്യമെന്നും മന്ത്രി പറഞ്ഞു.
സര്ക്കാര് ആശുപത്രികളെ മികവിന്റെ കേന്ദ്രമാക്കി മാറ്റാനുള്ള ശ്രമങ്ങള് തുടങ്ങിക്കഴിഞ്ഞു. രോഗീ സൗഹൃദ ആശുപത്രികളാക്കി മാറ്റുകയാണ് സര്ക്കാരിന്റെ ലക്ഷ്യം. ഇതിന്റെ ഭാഗമായി തിരുവനന്തപുരം മെഡിക്കല് കോളേജിലെ ഒ.പി. സമ്പ്രദായത്തില് സമൂല മാറ്റം വരുത്തി ക്യൂ സമ്പ്രദായം അവസാനിപ്പിക്കും. ആധുനിക ഉപകരണങ്ങളോടുകൂടി അത്യാഹിത വിഭാഗം അത്യാധുനികമാക്കും. മള്ട്ടി സ്പെഷ്യാലിറ്റി ബ്ലോക്കും എസ്.എ.ടി. ആശുപത്രിയിലെ പുതിയ മാതൃശിശു മന്ദിരവും ഉടന് പ്രവര്ത്തനമാരംഭിക്കുമെന്നും മന്ത്രി പറഞ്ഞു.
മൂന്ന് മുതല് 31 വരെയാണ് മെഡക്സ് നീണ്ടുനില്ക്കുന്നത്. മെഡിക്കല് കോളജിലെ വിവിധ മന്ദിരങ്ങളെ കൂട്ടിയിണക്കി രണ്ടുലക്ഷം ചതുരശ്ര അടി സ്ഥലത്ത് 55 പവലിയനുകളിലായാണ് പ്രദര്ശനം സജ്ജമാക്കിയിരിക്കുന്നത്. ആന്തരികാവയവങ്ങളുടെ ഭീമാകാര മോഡലുകള്, തത്സമയ ശസ്ത്രക്രിയകള്, വിര്ച്വല് റിയാലിറ്റി, ഓഗമെന്റഡ് റിയാലിറ്റി, പ്രൊജക്ടര് പ്രസന്റേഷന്, പ്രദര്ശന വസ്തുക്കളുടെ മ്യൂസിയം പ്രസന്റേഷന് കൂടാതെ നിരവധി വ്യത്യസ്തമായ ആശയങ്ങള് മെഡക്സില് ആസ്വദിക്കാനാകും. മനുഷ്യന്റെ ഉത്പ്പത്തി മുതല് ജനനം, വളര്ച്ച, രോഗങ്ങള്, മരണം തുടങ്ങി ആധുനിക വൈദ്യശാസ്ത്രത്തിന്റെ അനന്തസാധ്യതകള് വരെ ഇവിടെ ദൃശ്യമാകും.
ഇതോടൊപ്പം സെന്ട്രല് ഗാര്ഡനില് വച്ച് എല്ലാ ദിവസവും വൈകുന്നേരങ്ങളില് ഐ.എം.എ.യുടെ സഹകരണത്തോടെ വിവിധ വിഷയങ്ങളെ ആസ്പദമാക്കി മെഡ് ടോക്ക് (Med Talk) എന്നപേരില് പ്രഭാഷണ പരമ്പരയും ഉണ്ടായിരിക്കുന്നതാണ്. ആരോഗ്യ രംഗത്തെ അശാസ്ത്രീയതകള്ക്കും തട്ടിപ്പുകള്ക്കുമെതിരെ ജനങ്ങളെ ബോധവത്ക്കരിക്കുക എന്നതാണ് മെഡി ടോക്കിന്റെ ലക്ഷ്യം.
