ചെന്നൈ: ജയലളിതയുടെ ഉറ്റതോഴി ശശികല നടരാജന് എഐഎഡിഎംകെയുടെ അടുത്ത ജനറല് സെക്രട്ടറിയാകുമെന്നും ഇതിനാവശ്യമെങ്കില് പാര്ട്ടി ഭരണഘടന ഭേദഗതി ചെയ്യുമെന്നും വക്താവ് സി. പൊന്നയ്യന് അറിയിച്ചു. ജയലളിതയുടെ മരണത്തെത്തുടര്ന്ന് ഈ പദവി ഒഴിഞ്ഞുകിടക്കുന്നു.
അതിനിടെ ശശികലയെ അടുത്ത നേതാവാക്കുന്നതിനെച്ചൊല്ലി പാര്ട്ടിയില് കടുത്ത ഭിന്നത. ഒരു വിഭാഗം ഈ നീക്കത്തെ ശക്തമായി എതിര്ക്കുന്നു. ശശികലയെ അനുകൂലിക്കുന്നവര് നാട്ടിലെങ്ങും ശശികലയുടേയും ജലളിതയുടേയും ചിത്രങ്ങള് അടങ്ങിയ ഫ്ളക്സുകള് വച്ചുകഴിഞ്ഞു.
ജയലളിതയുടെ സഹോദര പുത്രി ദീപ ജയകുമാറിനെ അനുകൂലിക്കുന്നവര് അവരുടേയും ജയയുടേയും ചിത്രങ്ങള് അടങ്ങിയ ഫ്ളക്സുകളും പോസ്റ്ററുകളും സംസ്ഥാനത്തെങ്ങും വച്ചു തുടങ്ങി. അമ്മയെപ്പോലെ ചിന്നമ്മ (ശശികല) ഇനി പാര്ട്ടിയെയും സംസ്ഥാനത്തെയും നയിക്കുമെന്നാണ് ഒരു വിഭാഗം പറയുന്നത്.
മൃതദേഹം പോസ്റ്റ്മോര്ട്ടം ചെയ്യണമെന്ന്
ചെന്നൈ: ജയലളിതയുടെ മൃതദേഹം പുറത്തെടുത്ത് പോസ്റ്റ്മോര്ട്ടം ചെയ്ത് മരണകാരണം കണ്ടെത്തണമെന്നാവശ്യപ്പെട്ട് ഹര്ജി. ജയലളിതയുടെ ആരോഗ്യത്തെപ്പറ്റി തമിഴ്നാട് സര്ക്കാര് കൃത്യമായ വിവരം പുറത്തുവിടണമെന്നാവശ്യപ്പെട്ട് മുന്പ് ഹര്ജി നല്കിയ ട്രാഫിക് രാമസ്വാമി തന്നെയാണ് ഇത്തവണയും കോടതിയിലെത്തിയത്. മരണത്തില് ദുരൂഹതയുണ്ടെന്ന ആരോപണം ശക്തമായ സാഹചര്യത്തിലാണ് ഹര്ജി.
ജയലളിതയുടെ ദുരൂഹ മരണം അന്വേഷിക്കണമെന്ന് പ്രശസ്ത താരം ഗൗതമി ആവശ്യപ്പെട്ടിരുന്നു. ദുരൂഹത പുറത്തു കൊണ്ടുവരണമെന്നാവശ്യപ്പെട്ട് ഡിഎംകെ നേതാവ് എം. കെ. സ്റ്റാലിനും രംഗത്തുവന്നു. മരണം, അവര്ക്ക് നല്കിയ ചികിത്സ എന്നിവ സംബന്ധിച്ച് തമിഴ്നാട് സര്ക്കാര് ധവളപത്രം പുറപ്പെടുവിക്കണമെന്ന് ഡിഎംകെ ആവശ്യപ്പെട്ടു.
