കാസര്കോട്: കേന്ദ്ര തോട്ട വിള ഗവേഷണ കേന്ദ്രത്തിന്റെ ശതാബ്ദി ആഘോഷത്തോടനുബന്ധിച്ച് നാളികേര കൃഷിയില് മഹത്തായ നേട്ടങ്ങള് കൈവരിച്ച 100 കര്ഷകരെ ആദരിച്ചു. കേരളം, തമിഴ്നാട്, കര്ണ്ണാടകം, ആന്ധ്ര പ്രദേശ്, മഹാരാഷ്ട്ര, ഗോവ, വെസ്റ്റ് ബംഗാള്, അസ്സാം, ലക്ഷദ്വീപ്, ആന് ഡമാന് നിക്കോബാര് ദ്വീപ്, ഒറീസ്സ, ഗുജറാത്ത് തുടങ്ങിയ സംസ്ഥാനങ്ങളില് നിന്നുള്ള കര്ഷകരാണ് മേളയില് പങ്കെടുക്കുന്നത്. ഭാരതീയ കാര്ഷിക ഗവേഷണ കൗണ്സില് ഡയറക്ടര് ജനറല് ഡോ. ത്രിലോചന് മഹാപത്ര, ഉത്തര കന്നട പാര്ലമെന്റ് അംഗം അനന്തകുമാര് ദത്താത്രേയ ഹെഗ്ഡെ തുടങ്ങിയവര് കര്ഷകരെ ആദരിക്കുകയും തെങ്ങ്, കവുങ്ങ്, കൊക്കൊ തുടങ്ങിയവയുടെ കൃഷിയില് കര്ഷകര് നേരിടുന്ന പ്രശ്നങ്ങളെക്കുറിച്ച് ചര്ച്ച ചെയ്യുകയും ചെയ്തു. ഗവേഷണ പദ്ധതികള്ക്ക് രൂപം നല്കുമ്പോള് കര്ഷകരുടെ അനുഭവഞ്ജാനത്തിന് മുന് തൂക്കം നല്കുകയും കൂടെ തുല്യ പ്രാധാന്യത്തോടെ തന്നെ പരിസ്ഥിതി സംരക്ഷണം ഉറപ്പാക്കുകയും ചെയ്യേണ്ടത് അനിവാര്യമാണെന്ന് ഡോ മഹാപാത്ര വ്യക്തമാക്കി.
പ്രത്യേകിച്ചും കാലാവസ്ഥാ വ്യതിയാനവും വില വ്യതിയാനവും ഏറെ പ്രശ്നങ്ങള് സഷ്ടിച്ചു കൊണ്ടിരിക്കുന്ന ഈ കാലഘട്ടത്തില് കര്ഷകരുടെ പരിചയസമ്പത്തിലൂടെ വികസിപ്പിച്ചെടുത്ത പരിസ്ഥിതി സൗഹൃദ കൃഷി രീതികള്ക്ക് ഏറെ പ്രാധാന്യമുണ്ടെന്ന് അദ്ദേഹം പറഞ്ഞു. തെങ്ങ്, കവുങ്ങ്, കൊക്കൊ തുടങ്ങിയവയുടെ കൃഷിയില് മെച്ചപ്പെട്ട നടീല് വസ്തുക്കള് ലഭിക്കുന്നതിനും വര്ദ്ധിച്ച് വരുന്ന കീട-രോഗ പ്രശ്നങ്ങള് നേരിടുന്നതിനുമുള്ള പരിഹാരം തീര്ച്ചയായും കണ്ടെത്തുമെന്ന് അദ്ദേഹം കര്ഷകര്ക്ക് ഉറപ്പു നല്കി. തെങ്ങ് കൃഷി വികസന പ്രവര്ത്തനങ്ങളെക്കുറിച്ച് കര്ഷകരില് കൂടുതല് അവബോധം സൃഷ്ടിക്കേണ്ടതിന്റെ ആവശ്യകതയെക്കുറിച്ച് ചടങ്ങില് പങ്കെടുത്ത നാളികേര വികസന ബോര്ഡ് ചെയര്മാന് ഡോ ഏ കെ സിംഗ് സംസാരിച്ചു. സാമൂഹ്യ ശാസ്ത്ര വിഭാഗം മേധാവിയും പ്രിന്സിപ്പല് സയിന്റിസ്റ്റുമായ ഡോ: സി. തമ്പാന് സ്വാഗതമരുളുകയും പ്രിന്സിപ്പല് സയിന്റിസ്റ്റ് ഡോ: എസ്. കലാവതി നന്ദി രേഖപ്പെടുത്തുകയും ചെയ്തു.
