പത്തനംതിട്ട: കോന്നിയിലെ മൂന്ന് പ്ലസ് ടു വിദ്യാര്‍ത്ഥിനികളുടെ തിരോധാനവും മരണവും സംബന്ധിച്ച അന്വേഷണം ക്രൈംബ്രാഞ്ചിന് കൈമാറി.
തിരുവനന്തപുരം എസ്.പിയുടെ നേതൃത്വത്തില്‍ ക്രൈം ബ്രാഞ്ചിന്റെ ആലപ്പുഴ യൂണിറ്റിനാണ് അന്വേഷണ ചുമതല. സംഭവം നടന്ന് ഒരുവര്‍ഷം കഴിഞ്ഞിട്ടും ഇതുസംബന്ധിച്ച ദുരൂഹത വെളിച്ചത്തുകൊണ്ടുവരാന്‍ പോലീസിന് കഴിയാതിരുന്നത് വ്യാപക പ്രതിഷേധത്തിന് ഇടയാക്കിയിരുന്നു. കോന്നി തെങ്ങുംകാവ് പുത്തന്‍ പറമ്പില്‍ രവികുമാറിന്റെ മകള്‍ എസ്.രാജി, ഐരവണ്‍ തോപ്പില്‍ ലക്ഷം വീട് കോളനിയില്‍ സുരേഷിന്റെ മകള്‍ ആര്യ.കെ.സുരേഷ് , മുരിങ്ങമംഗലം തിരുമല രാമചന്ദ്രന്‍നായരുടെ മകള്‍ ആതിര എസ് നായര്‍ എന്നിവരാണ് ദുരൂഹസാഹചര്യത്തില്‍ മരിച്ചത്. കോന്നി ഗവ.ഹയര്‍സെക്കന്ററി സ്‌കൂളിലെ പ്ലസ് ടു വിദ്യാര്‍ത്ഥികളും കൂട്ടുകാരുമായിരുന്നു മൂവരും.
ഏറെ വിവാദങ്ങളുയര്‍ത്തിയ സംഭവത്തിന്റെ പിന്നിലെ ദൂരൂഹത കണ്ടെത്താന്‍ മാറിമാറിവന്ന അന്വേഷണ സംഘത്തിന് കഴിഞ്ഞിരുന്നില്ല.
കുട്ടികള്‍ ലൈംഗിക അതിക്രമത്തിന് ഇരയായിട്ടില്ലെന്നും സംഭവത്തിന് പുറത്തുനിന്നുള്ള ആരുടേയും ഇടപെടല്‍ ഇല്ലെന്നുമാണ് അന്വേഷണം നടത്തിയ വിവിധ പോലീസ് ഉദ്യോഗസ്ഥര്‍ പറയുന്നത്. മൊബൈല്‍ഫോണും കുട്ടികള്‍ ഉപയോഗിച്ചിരുന്ന ടാബ്‌ലെറ്റ് കമ്പ്യൂട്ടറും പോലീസ് വിശദമായി പരിശോധിച്ചെങ്കിലും ഇതില്‍ നിന്നും ലഭ്യമായ വിവരങ്ങള്‍ പുറത്തുപറയാന്‍ പോലീസ് തയ്യാറായില്ല. മൂവരേയും 2015 ജുലൈ 9 നാണ് കാണാതായത്. സ്‌കൂളിലേക്കെന്ന് പറഞ്ഞ് വിട്ടില്‍ നിന്നും ഇറങ്ങിയ ഇവരെ പിന്നീട് മരിച്ച നിലയില്‍ കണ്ടെത്തുകയായിരുന്നു.
13 ന് ഒറ്റപ്പാലത്ത് റെയില്‍വേ പാളത്തില്‍ രാജിയുടേയും ആതിരയുടേയും മൃതദേഹവും പരിക്കേറ്റ നിലയില്‍ ആര്യയേയും കണ്ടെത്തുകയായിരുന്നു. തൃശൂര്‍ മെഡിക്കല്‍ കോളേജില്‍ അത്യാഹിത വിഭാഗത്തില്‍ ചികിത്സയിലിരിക്കെ 20 നാണ് ആര്യമരിച്ചത്.
കുട്ടികളെ കാണാതായി മണിക്കൂറുകള്‍ക്കകം ബന്ധുക്കളും സ്‌കൂള്‍ അധികൃതരും പോലീസില്‍ പരാതി നല്‍കിയെങ്കിലും ഇവരെ കണ്ടെത്താനായില്ല. കുട്ടികള്‍ വീട് വിട്ട ശേഷം തുടര്‍ച്ചയായി ട്രെയിനില്‍ യാത്ര ചെയ്തതായും രണ്ടുതവണ ബംഗലൂരുവിലെത്തിയിരുന്നതായും അന്വേഷണത്തില്‍ കണ്ടെത്തിയിരുന്നു.
ആര്യയുടെ കൈവശമുണ്ടായിരുന്ന ലാബ് ലെറ്റ് കമ്പ്യൂട്ടര്‍ ബംഗലൂരുവില്‍ വില്‍ക്കുകയും ഇത് പിന്നീട് പോലീസ് കണ്ടെത്തുകയും ചെയ്തിരുന്നു. പോലീസിന്റെ പല സംഘങ്ങളും അന്വേഷിച്ചെങ്കിലും സംഭവം സംബന്ധിച്ച കൂടുതല്‍ വിവരങ്ങള്‍ കണ്ടെത്താനായില്ല. തുടര്‍ന്ന് സിബിഐ അന്വേഷണം ആവശ്യപ്പെട്ട് രാജിയുടേയും ആതിരയുടേയും ബന്ധുക്കള്‍ ഹൈക്കോടതിയില്‍ ഹര്‍ജി നല്‍കിയിരുന്നു.
പ്രതികരിക്കാൻ ഇവിടെ എഴുതുക: