കണ്ണൂര്: റിമാന്റ് പ്രതിയുടെ ജയിലിനകത്തുള്ള ദൃശ്യങ്ങള് സമൂഹമാധ്യമ്യങ്ങളില് പ്രചരിക്കുന്നുവെന്ന പരാതിയില് ജയില് സൂപ്രണ്ടിന് കൂത്തുപറമ്പ് ഫസ്റ്റ് ക്ലാസ്സ് ജുഡീഷ്യല് മജിസ്ട്രേട്ട് നോട്ടീസയച്ചു. ആര്എസ്എസ് പ്രവര്ത്തകന് മാഹി ചെമ്പ്രയിലെ സുബീഷിന്റെ പരാതിയിലാണ് കോടതി നോട്ടീസയച്ചത്. വാളാങ്കിച്ചാലിലെ മോഹനന്റെ മരണവുമായി ബന്ധപ്പെടുത്തി സുബീഷിനെ പോലീസ് കസ്റ്റഡിയിലെടുത്ത് മൂന്നാം മുറക്ക് വിധേയനാക്കിയത് ഏറെ വിവാദമാവുകയും അഭിഭാഷകന്റെയും പോലീസിന്റെയും സഹായത്തോടെ സുബീഷ് കോടതിയില് ഹാജരായത് മാധ്യമങ്ങള് പ്രസിദ്ധീകരിക്കുകയും ചെയ്തിരുന്നു. ഇതിന് ശേഷം ജയിലിനകത്തുള്ള സുബീഷിന്റെ ദൃശ്യങ്ങള് നവമാധ്യമങ്ങളില് പ്രചരിക്കുന്നതാണ് ഇപ്പോള് വിവാദമായിരിക്കുന്നത്.
മൊബൈല് ഫോണ് ഉപയോഗിക്കുന്നതിന് കര്ശന നിയന്ത്രണമുള്ള സ്ഥലമാണ് ജയിലുകള്. ഇന്റര് നെറ്റ് ഉള്പ്പടെയുള്ള മികച്ച സൗകര്യങ്ങളുള്ള ഫോണുകള് ഉപയോഗിച്ച് മാത്രമേ ജയിലിനകത്ത് വിഷ്വല്സ് പകര്ത്തി സമൂഹമാധ്യമങ്ങളില് കൂടി പ്രചരിപ്പിക്കാന് സാധിക്കുകയുള്ളു. ഇത്തരമൊരു സാഹചര്യത്തില് ജയിലിനകത്ത് എങ്ങിനെ മൊബൈല് ഫോണ് എത്തിയെന്നത് സംശയാസ്പദമാണ്. നേരത്തെ ടി.പി.ചന്ദ്രശേഖരന് വധക്കേസില് ജയിലില് കഴിയുന്ന കൊടി സുനിയുള്പ്പടെയുള്ളവര് മൊബൈല് ഫോണ് ഉപയോഗിച്ചത് ഏറെ വിവാദമായിരുന്നു. ഇടത് അനുകൂല സംഘടനയില്പ്പെട്ട ഉദ്യോഗസ്ഥരുടെ സഹകരണത്തോടെയാണോ വിഷ്വല്സ് ഷൂട്ട് ചെയ്ത് ഇന്റര് നെറ്റിലൂടെ പ്രചരിപ്പിച്ചതെന്നും സൂചിപ്പിക്കേണ്ടതുണ്ട്.
