അമ്പലത്തറ: കണ്ണൂര്‍ ഉള്‍പ്പെടെ കേരളം മുവുവന്‍ സിപിഎം ഏകപക്ഷീയ അക്രമമാണ് നടത്തുന്നതെന്ന് ആര്‍എസ്എസ് കണ്ണൂര്‍ ജില്ലാ പ്രചാരക് പ്രമുഖ് അഡ്വ.ജയപ്രകാശ് പറഞ്ഞു.
മാര്‍ക്‌സിസ്റ്റ് അക്രമ വിരുദ്ധ ജനകീയ സമിതി കോടോം-ബേളൂര്‍ പഞ്ചായത്ത് സമിതി അമ്പലത്തറയില്‍ നടത്തിയ പൊതുയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സിപിഎം അധികാരത്തില്‍ വരുമ്പോഴാണ് കൂടുതല്‍ അക്രമ സംഭവങ്ങള്‍ നടക്കുന്നത്. അങ്കക്കലി പൂണ്ട പാര്‍ട്ടി നേതാക്കള്‍ പോലീസിനെ കൂട്ടുപിടിച്ച് ഏകപക്ഷീയ അക്രമങ്ങള്‍ നടത്തി അശാന്തി പരത്തുകയാണ്. സംഘത്തെയും, അനുബന്ധ പ്രസ്ഥാനങ്ങള്‍ക്കും നേരെ മാത്രമല്ല മറ്റ് പ്രസ്ഥാനങ്ങള്‍ക്കു നേരെയും അക്രമം അഴിച്ചുവിട്ട് ഭീകരാന്തരീക്ഷം സൃഷ്ടിക്കുകയാണ്. ജനാധിപത്യ സംവിധാനത്തെ പോലും വെല്ലു വിളിച്ചു കൊണ്ട് യുഡിഎഫ് മുഖ്യമന്ത്രിയായിരുന്ന ഉമ്മന്‍ചാണ്ടി അതിഭീകരമായി കണ്ണൂരില്‍ അക്രമിക്കപ്പെട്ടിട്ടുണ്ട്. കണ്ണൂര്‍ ജില്ലയില്‍ ശാന്തിയും സമാധാനവും വേണമെന്ന് ആഗ്രഹിച്ച ഇ.കെ.നായനാര്‍ക്കു പോലും സ്വന്തം പാര്‍ട്ടിയില്‍ നിന്ന് നീതി ലഭിച്ചില്ല. സംഘ പ്രസ്ഥാനങ്ങളുടെ നിരവധി പ്രവര്‍ത്തകരാണ് സിപിഎമ്മിന്റെ അക്രമങ്ങളില്‍ കൊല ചെയ്യപ്പെട്ടത്. ഒരാക്രമിയും ചെയ്യാത്ത അതിക്രൂരമായ രീതിയിലാണ് ജയകൃഷ്ണന്‍ മാസ്റ്ററെ പിഞ്ചുകുഞ്ഞുങ്ങളുടെ കണ്‍മുന്നില്‍ വെച്ച് വെട്ടിനുറുക്കിയത്. ജീവനു വേണ്ടി അദ്ദേഹം പിടയുമ്പോള്‍ ഒരു കൂസലും ഇല്ലാതെ കേസില്‍ സാക്ഷി പറഞ്ഞാല്‍ ഇതേ ഗതി വരുമെന്ന് ചോക്കുകൊണ്ട് ബോര്‍ഡില്‍ എഴുതിച്ചേര്‍ത്തത് സിപിഎം ക്രിമിനലുകളുടെ ദുര്‍ബുദ്ധി മാത്രമല്ല, എകെജി സെന്ററില്‍ നിന്നും വന്ന ഭീകരത ഉളവാക്കുന്ന സന്ദേശവുമാണ്. ഇതാണ് ഇന്നത്തെ കമ്മ്യൂണിസമെന്നും അദ്ദേഹം പറഞ്ഞു.
ബിജെപി മണ്ഡലം ജനറല്‍ സെക്രട്ടറി പ്രേംരാജ് കാലിക്കടവ് അധ്യക്ഷത വഹിച്ചു. ആര്‍എസ്എസ് കണ്ണൂര്‍ വിഭാഗ് കാര്യകാരി അംഗം കെ.ബി.പ്രജില്‍ മുഖ്യപ്രഭാഷണം നടത്തി. ആര്‍എസ്എസ് ജില്ലാ കാര്യവാഹ് ശ്രീജിത്ത്, ബിജെപി മണ്ഡലം ജനറല്‍ സെക്രട്ടറി മനുലാല്‍ മേലത്ത്, യുവമോര്‍ച്ച മണ്ഡലം ജനറല്‍ സെക്രട്ടറി കെ.വി.ശ്രീജിത്ത് എന്നിവര്‍ സംബന്ധിച്ചു. ബിഎംഎസ് മേഖലാ ജോ.സെക്രട്ടറി ദാമോദരന്‍ സ്വാഗതവും, ബിജെപി പഞ്ചായത്ത് സെക്രട്ടറി കെ.വിജയന്‍ നന്ദിയും പറഞ്ഞു
പ്രതികരിക്കാൻ ഇവിടെ എഴുതുക: