പൂച്ചാക്കല്: ഉളവയ്പ്പിന് ആവേശം പകര്ന്ന് ഉഷവതുരുത്ത് കരിനിലത്തില് കൊയ്ത്ത് ഉത്സവം. തൈക്കാട്ടുശ്ശേരി ഗ്രാമപഞ്ചായത്തിലെ ഉളവയ്പ്പ് ഒന്നാം വാര്ഡിലെ ഉഷവതുരുത്ത് പാടശേഖരത്തിലെ 20 ഏക്കറില് കൃഷി ചെയ്ത ജ്യോതി വിത്തിനത്തില്പ്പെട്ട ഞാറ് ആണ് കൊയ്ത്തുപ്പാട്ടിന്റെ താളത്തില് കര്ഷകര് കൊയ്തെടുത്തത്.
വേമ്പനാട്ട് കായലിനോട് ചേര്ന്ന് സ്ഥിതി ചെയ്യുന്ന ഈ പാടശേഖരത്തിന് ഉളവയ്പ്പ് മഹാദേവ ക്ഷേത്രവുമായി ബന്ധമുണ്ട്. ഉളവയ്പ്പ് ക്ഷേത്രത്തിലെ മഹാദേവന് മുന്നില് ” ഉഷപൂജയ്ക്കു ”നേദിക്കുവാനുള്ള അരി ഉല്പാദിപ്പിക്കുന്ന പാടശേഖരമായതുകൊണ്ടാണ് ഇത് ഉഷവതുരുത്ത് പാടശേഖരമെന്ന് വിളിപ്പേര് വന്നത്. ഉഷവ് തുരുത്ത് നെല്ലുത്പാദക സംഘത്തില് നിന്നും പാട്ടത്തിലെടുത്ത് കര്ഷകരായ ടി.എന്.ഉണ്ണികൃഷ്ണന്, കെ. എം.മനോജ്, എസ്.പ്രമോദ് തുടങ്ങിയവരുടെ നേതൃത്വത്തില് ഒരു നെല്ലു ഒരു മീനും പദ്ധതിയിലാണ് നെല്കൃഷി നടത്തി ഉളവയ്പ്പില് പൊന്നു വിളയിച്ചത് നെല്ലറയായ ഉളവയ്പ്പ് മേഖലയില് 450 ഏക്കറോളം വരുന്ന പാടശേഖരമാണുള്ളത്.
കൊയ്ത്തുകാര്ക്ക് ആവേശം പകര്ന്ന് കൊയ്ത്ത് കാണാനെത്തിയ ഇംഗ്ലണ്ടുകാരായ വിദേശ ദമ്പതികളും കൊയ്ത്തുത്സവത്തില് പങ്കെടുത്തു. തൈക്കാട്ടുശ്ശേരി ഗ്രാമപഞ്ചായത്ത് പ്രസിഡന്റ് ശാന്തമ്മ പ്രകാശ് കൊയ്ത്തുത്സവം ഉദ്ഘാടനം ചെയ്തു. വാര്ഡ് മെമ്പര്മാരായ വിമല് രവീന്ദ്രന്, അംബികാ ശശിധരന്, കൃഷി ഓഫീസര് എം.സിന്ധു, കര്ഷകരായ ടി.എന്. ഉണ്ണികൃഷ്ണന്, കെ എം.മനോജ് , എസ്.പ്രമോദ് തുടങ്ങിയവര് നേതൃത്വം നല്കി
