കണ്ണൂര്: കേരളത്തിലെ മുഴുവന് സര്ക്കാര്-എയ്ഡഡ് ഹൈസ്കൂള് ഹയര് സെക്കണ്ടറി-വൊക്കേഷണല് ഹയര് സെക്കണ്ടറി ക്ലാസ് മുറികളും ഐടി ലാബുകളും ഹൈടെക് ആക്കാനുളള പ്രവര്ത്തനങ്ങള് നടന്നു വരികയാണെന്ന് ഐടി @ സ്കൂള് എക്സി.ഡയറക്ടര് കെ. അന്വര് സാദത്ത് പറഞ്ഞു. ഹൈടെക് ആക്കുന്നതിന് മുന്നോടിയായി ഓണ്ലൈന് സര്വെയില് വിവരങ്ങള് നല്കുന്നതിനായി ജില്ലയിലെ വിവിധ കേന്ദ്രങ്ങളില് സംഘടിപ്പിച്ച സ്കൂള് ഐടി കോ-ഓര്ഡിനേറ്റര്മാരുടെ ശില്പശാലയില് വീഡിയോ പ്രഭാഷണം നടത്തുകയായിരുന്നു അദ്ദേഹം. ഹൈടെക് വിദ്യാലയങ്ങള് ആക്കുന്നതിന്റെ മുന്നോടിയായി ഐടി @ സ്കൂളിന്റെ നേതൃത്വത്തില് കമ്പ്യൂട്ടര് ലാബ്, ബ്രോഡ് ബാന്റ് ഇന്റര്നെറ്റ്, ക്ലാസ് മുറികളില് ലാപ്ടോപ്-പ്രൊജക്ടര്-ശബ്ദസംവിധാനം, നെറ്റ് വര്ക്കിങ്ങ് എന്നിവ ഏര്പ്പെടുത്തും. എന്നാല് ഇതിന് സജ്ജമാക്കുന്ന വിധം ക്ലാസ് മുറികളും ലാബും സുരക്ഷിതമാക്കല്, പെയിന്റിങ്ങ്, പൊടിശല്യമില്ലാത്ത ക്ലാസ് മുറികള് സജ്ജീകരിക്കല്, സുരക്ഷിതമായ വൈദ്യുതീകരണം, മേല്ക്കൂരകള് എന്നിവ അതത് സ്കൂളുകള് പൂര്ത്തിയാക്കണം. ജനപ്രതിനിധികളുടെയും തദ്ദേശ സ്ഥാപനങ്ങളുടെയും, പിടിഎ, പൂര്വ്വ വിദ്യാര്ത്ഥികള്, മറ്റു സ്ഥാപനങ്ങള് എന്നിവയുടെയും സഹായത്തോടെ ഇത് ചെയ്യാവുന്നതാണ്. മുഴുവന് അധ്യാപകര്ക്കും കമ്പ്യൂട്ടറിലുളള അടിസ്ഥാന പരിശീലനം, എല്ലാ വിഷയങ്ങളും ഐസിടി ഉപയോഗിച്ച് പഠിപ്പിക്കാനുളള പരിശീലനം, ഡിജിറ്റല് ഉളളടക്ക വിന്യാസം, വിഭവ പോര്ട്ടലുകള്, ഇ ഗവേര്ണന്സ് അധിഷ്ഠിത മോണിറ്ററിങ്ങ്, ഇ ലേണിങ്ങ്, എം ലേണിങ്ങ് തുടങ്ങിയ അക്കാദമിക് പ്രവര്ത്തനങ്ങളും ഹൈടെക് സ്കൂള് പ്രൊജക്ടിന്റെ ഭാഗമായി നടപ്പാക്കും.
ഡിസംബര് 5 ന് മുമ്പാണ് സ്കൂളുകള് ഓണ്ലൈന് വിവരങ്ങള് നല്കേണ്ടത്. ആദ്യം സജ്ജമാകുന്ന സ്കൂളുകള്/ക്ലാസ്മുറികള് ആദ്യഘട്ടത്തില് പരിഗണിക്കും. ജില്ലാതല ശില്പശാലകള് ജില്ലാ റിസോഴ്സ് സെന്റര്, ഐടി @ സ്കൂള് കണ്ണൂര്, ബിഇഎംപിഎച്ച്എസ് തലശ്ശേരി, സീതി സാഹിബ് എച്ച്എസ്എസ് തളിപ്പറമ്പ് തുടങ്ങിയ കേന്ദ്രങ്ങളിലായാണ് നടന്നത്.
