കോഴിക്കോട്: ജില്ലാ സ്കൂള് കായികമേളയുടെ രണ്ടാം ദിനം പിന്നിട്ടപ്പോഴും മുക്കം ഉപജില്ലയുടെ മുന്നേറ്റം തുടരുകയാണ്. മുക്കം ഉപജില്ലയുടെ സ്വര്ണ്ണവേട്ടയില് നിര്ണ്ണായക പങ്കുവഹിക്കുന്ന പുല്ലൂരാംപാറ സെന്റ്ജോ സഫ് ഹൈസ്കൂള് സ്കൂള് തലത്തില് ഒന്നാം സ്ഥാനവും നിലനിര്ത്തി കുതിക്കുകയാണ്. പതിനാല് സ്വര്ണവും ഇരുപത് വെള്ളിയും ഇരുപത് വെങ്കലവുമുള്പ്പെടെ 173.5 പോയിന്റ് നേടിയാണ് മുക്കം ഉപജില്ല മുന്നേറ്റം തുടരുന്നത്. ഏഴ് സ്വര്ണവും പതിനൊന്ന് വെള്ളിയും എട്ട് വെങ്കലവും നേടി 78.5 പോയിന്റ്നേടിയ താമരശ്ശേരി ഉപജില്ലയാണ് രണ്ടാം സ്ഥാനത്ത്. അഞ്ച് സ്വര്ണത്തിന്റെയും എട്ട് വെള്ളിയുടെയും അഞ്ച് വെങ്കലത്തിന്റെ പകിട്ടില് 66 പോയിന്റ് കരസ്ഥമാക്കിയ കൊയിലാണ്ടി ഉപജില്ലയാണ് മൂന്നാമത്. 65 പോയിന്റ് നേടിയ ബാലുശ്ശേരി ഉപജില്ല നാലാം സ്ഥാനത്തും 57 പോയിന്റ് നേടിയ പേരാമ്പ്ര ഉപജില്ല അഞ്ചാം സ്ഥാനത്തും 45 പോയിന്റ് നേടിയ കുന്നമംഗലം ഉപജില്ല ആറാം സ്ഥാനത്ത് നില്ക്കുന്നു. കൊടുവള്ളി(22 പോയിന്റ്), കോഴിക്കോട് സിറ്റി(17), വടകര(15), കോഴിക്കോട് റൂറല്(15), നാദാപുരം(11), ഫറോക്ക്(10), ചേവായൂര്(3), മേലടി(3), തോടന്നൂര്(2), ചോമ്പാല(1) എന്നിങ്ങനെയാണ് മറ്റ് ഉപജില്ലകളുടെ സ്ഥാനം. നാല്പത് ഇനങ്ങളിലാണ് ഇന്നലെ ഫൈനല് മത്സരങ്ങള് അരങ്ങേറിയത്. ഇതോടെ രണ്ട് ദിവസങ്ങളിലായി 64ല് പരം ഫൈനല് മത്സരങ്ങള് നടന്നു.
എട്ട് സ്വര്ണവും പതിനൊന്ന് വെള്ളിയും അഞ്ച് വെങ്കലവും കൈപ്പിടിയിലൊതുക്കി 74.5 പോയിന്റ് നേടിയാണ് പുല്ലൂരാംപാറ സെന്റ് ജോസഫ്സ് ഹൈസ്കൂള് ഒന്നാം സ്ഥാനത്ത് തുടരുന്നത്. അഞ്ച് വീതം സ്വര്ണവും വെള്ളിയും മൂന്ന് വെങ്കലവും നേടിയ പൂവമ്പായി എ എം എച്ച് എസും, എട്ട് സ്വര്ണവും ഒരു വെള്ളിയും നേടിയ കുളത്തുവയല് സെന്റ്ജോര്ജ്ജ്സ് എച്ച് എസ് എസും 43 പോയിന്റ് വീതം നേടി രണ്ടാം ദിനത്തില് രണ്ടാം സ്ഥാനം പങ്കിടുകയാണ്. എട്ട് സ്വര്ണവും ഒരു വെള്ളിയും രണ്ട് വെങ്കലവും നേടി 35 പോയിന്റ് സ്വന്തമാക്കിയ കട്ടിപ്പാറ ഹോളി ഫാമിലി എച്ച് എസാണ് മൂന്നാം സ്ഥാനത്ത്. എംകെഎച്ച്എംഎം ഒവിഎച്ച്എസ്എസ് ഫോര് ഗേള്സ് മുക്കം(27), കൊയിലാണ്ടി പൊയില്കാവ് എച്ച് എസ്(20), ചാത്തമംഗലം ആര്ഇസിജിവിഎച്ച്എസ്എസ് (19), നെല്ലിപ്പൊയില് സെന്റ് ജോണ്സ് എച്ച്എസ് (15) എന്നിവയും സ്കൂള് തലത്തില് മികച്ച മത്സരം കാഴ്ച വെക്കുന്നുണ്ട്. മൂന്ന് ദിനങ്ങളിലായി കോഴിക്കോട് നഗരത്തില് അലയൊലി സൃഷ്ടിച്ച കായികമേളയ്ക്ക് ഇന്ന് സമാപനമാവും.
