കല്പ്പറ്റ: മൂപ്പൈനാട് ഗ്രാമപഞ്ചായത്തില് അജീഷണല് ട്രൈബല് സബ് പ്ലാന് പദ്ധതി പ്രകാരം ഏറ്റവും പിന്നോക്കാവസ്ഥയിലുണ്ടായിരുന്ന ആറ് ആദിവാസി കോളനികളില് നടപ്പാക്കുന്ന വികസന ക്ഷേമകാര്യ പദ്ധതികളുടെ ഭാഗമായി പൂര്ത്തീകരിച്ച ഭവനങ്ങളുടെ താക്കോല് ദാനം കൃഷിമന്ത്രി വി.കെ. സുനില്കുമാര് നിര്വഹിക്കുമെന്ന് അധികൃതര് പത്ര സമ്മേളനത്തില് അറിയിച്ചു. 24ന് രാവിലെ ഒമ്പതിന് പുല്ലുകുന്ന് പണിയ കോളനിയില് നടക്കുന്ന പരിപാടിയില് കല്പ്പറ്റ നിയോജക മണ്ഡലം എംഎല്എ സി.കെ. ശശീന്ദ്രന് അധ്യക്ഷത വഹിക്കും. മൂപ്പൈനാട് പഞ്ചായത്തിന്റെയും ജില്ലാ മണ്ണ് സംരക്ഷണ ഓഫീസിന്റെയും നേതൃത്വത്തില് തെരഞ്ഞെടുത്ത കോളനികളില് ഭവന നിര്മ്മാണം, ഭവന പുനഃരുദ്ധാരണം, കുടിവെള്ള പദ്ധതികള്, റോഡുകള്, നടപ്പാതകള്, വൈദ്യുതീകരണം, ജലസേചന പദ്ധതികള്, കല്വര്ട്ടുകള്, മണ്ണ് സംരക്ഷണ പദ്ധതികള്, പശു, ആട്, കോഴി, താറാവ് വളര്ത്തല് പദ്ധതികള്, തോഴില് നൈപുണ്യ വികസനത്തിന്റെ ഭാഗമായി ഡ്രൈവിംഗ് പരിശീലനം, പ്ലമ്പിംഗ്, വയറിംഗ്, മേഴ്സണറി, കാര്പ്പെന്ററി, തയ്യല് എന്നിവയുടെ പരിശീലനവും, പണി ആയുധങ്ങള്, തയ്യല് മെഷീനുകള്, മുച്ചക്ര വാഹനങ്ങള് എന്നിവയുടെ വിതരണം തുടങ്ങി സമഗ്രവും സമ്പൂര്ണ്ണവുമായാണ് പദ്ധതി ആസൂത്രണം ചെയ്തിട്ടുള്ളത്.
മൂപ്പൈനാട് പഞ്ചായത്തിന്റെ നേതൃത്വത്തില് ജില്ലാ മണ്ണ് സംരക്ഷണ ഓഫീസര് പി.യു. ദാസ് നിര്വഹണം നടത്തുന്ന പദ്ധതി മറ്റുള്ള ആദിവാസി വികസന പദ്ധതികളില് നിന്നും വ്യത്യസ്ഥമാണ്. ഓരോ കോളനികളിലും പഞ്ചായത്തിന്റെയും മണ്ണ് സംരക്ഷണ വകുപ്പിന്റെയും മേല്നോട്ടത്തില് ഇടപെടലുകള് നടത്തുകയും കെഎസ്ഇബി, വാട്ടര് അതോരിറ്റി, കൃഷി വകുപ്പ്, മൃഗസംരക്ഷണ വകുപ്പ്, വനം വകുപ്പ്, അമൃത്, മീനങ്ങാടി ഗവണ്മെന്റ് പോളിടെക്നിക് തുടങ്ങിയ നിര്വഹണ ഏജന്സികളുടെ ഏകോപനത്തിലൂടെ പദ്ധതി നിര്വഹണം കാര്യക്ഷമമായും മാതൃകാപരമായും നടപ്പാക്കി.
നീലിമല, ശേഖരന്കുണ്ട്, മാന്കുന്ന്, ജയ്ഹിന്ദ്, പുല്ല്കുന്ന് കോളനികളില് സമ്പൂര്ണ്ണ വികസനമാണ് പദ്ധതി പൂര്ത്തിയാകുന്നതോടെ സാധ്യമാകുന്നത്.
ആദിവാസി വികസന മേഖലയില് എന്നും കടുത്ത വെല്ലുവിളിയായിരുന്ന ഭവന നിര്മ്മാണം ഏറ്റവും അനുകരണീയമായ രീതിയിലാണ് ഇവിടെ പൂര്ത്തീകരിച്ചിട്ടുള്ളത്. 400 ചരുരശ്രയടി വിസ്തീര്ണ്ണത്തില് പണികള് പൂര്ത്തീകരിച്ച് ഭവനങ്ങളാണ് നിര്മ്മിച്ചിട്ടുള്ളത്. ഓരോ വീടുകളുടേയും ടോയ്ലറ്റും ടൈലുകള് പതിച്ച് പെയിന്റിംഗ് ജോലികളും പൂര്ത്തീകരിച്ചിട്ടുണ്ട്. ഇത്തരത്തിലുള്ള വീടുകളാണ് ഗുണഭോക്താക്കള്ക്ക് കൈമാറുന്നത്. പദ്ധതിയുടെ ഭാഗമായി തൊഴില് സംരംഭങ്ങളുടേയും നൈപുണ്യ വികസന പ്രവര്ത്തനങ്ങളുടേയും പൂര്ത്തീകരണത്തോടെ ആദിവാസി വികസനത്തിന് അനുകരണീയ മാതൃകയായിരിക്കും മൂപ്പൈനാട് പഞ്ചായത്തിലെ ആറ് ആദിവാസി കോളനികള്. പട്ടിക വര്ഗ്ഗ വികസന വകുപ്പിന്റെ ഫണ്ട് ഉപയോഗിച്ച് അഡീഷണല് ട്രൈബല് സബ് പ്ലാന് പദ്ധതി പഞ്ചായത്തിന്റെയും മണ്ണ് സംരക്ഷണ വകുപ്പിന്റെയും നേതൃത്വത്തിലാണ് നടപ്പാക്കിയത്. വാര്ത്താസമ്മേളനത്തില് മൂപ്പൈനാട് പഞ്ചായത്ത് പ്രസിഡന്റ് ഷഹര്ബാന് സൈതലവി, ജില്ലാ മണ്ണ് സംരക്ഷണ ഓഫീസര് പി.യു. ദാസ്, മൂപ്പൈനാട് പഞ്ചായത്ത് വൈസ് പ്രസിഡന്റ് ഹരിഹരന്, മൂപ്പൈനാട് പഞ്ചായത്ത് ചെയര്മാന് യഹ്യാഖാന് തലക്കല്, സെക്രട്ടറി കെ. രാമചന്ദ്രന് എന്നിവര് പത്ര സമ്മേളനത്തില് പങ്കെടുത്തു.
