കണ്ണൂര്: ഉത്തര മലബാര് മേഖലയിലെ ടൂറിസം വ്യവസായം ശക്തിപ്പെടുത്തുവാന് ചെറുകിട-ഇടത്തരം സംരംഭകര്ക്ക് മുന്തൂക്കം കൊടുത്തുകൊണ്ട് പുത്തന് പരിപാടികള് ആവിഷ്കരിക്കുന്നു. സംരംഭകര്ക്കുള്ള അവസരങ്ങള് കണ്ടെത്തുക, ഏകോപിപ്പിക്കുക, മാര്ഗ്ഗ നിര്ദ്ദേശങ്ങള് നല്കുക, മുതലായവ ഉള്ക്കൊള്ളുന്നതാണ് പദ്ധതി. കേരളത്തില് ആദ്യമായാണ് ചെറുകിട-ഇടത്തരം സംരംഭകര്ക്ക് വേണ്ടി ടൂറിസം രംഗത്ത് ഇത്തരമൊരു പദ്ധതി. ഇതോടനുബന്ധിച്ചുള്ള പ്രാരംഭ ശില്പശാല ഡിസംബര് 11, 12 തിയ്യതികളില് നീലേശ്വരത്ത് വെച്ച് നടക്കും. സംസ്ഥാന ടൂറിസം വകുപ്പിന് കീഴിലുള്ള ബേക്കല് റിസോര്ട്ട് ഡെവലപ്മെന്റ് കോര്പ്പറേഷന് ലിമിറ്റഡ് (ബിആര്ഡിസി) കാസര്ഗോഡ് പ്രസ് ക്ലബ്ബിന്റെ സഹകരണത്തോടെയാണ് ശില്പശാലാ സംഘടിപ്പിക്കുന്നത്.
ബഡ്ജറ്റ് റിസോര്ട്ടുകള്, ഹോംസ്റ്റേകള്, ഫാം ടൂറിസം, ആയുര്വ്വേദ കേന്ദ്രങ്ങള്, ഹൗസ് ബോട്ടുകള്, ടൂര് ഓപ്പറേഷന്സ്, ഉത്തരവാദിത്ത ടൂറിസം, തനത് കലാരൂപങ്ങള്, കളരിപ്പയറ്റ്, യോഗ കേന്ദ്രങ്ങള്, കരകൗശല സ്മരണികകള് (സുവനീര് വ്യവസായം), ഇത്യാദി മേഖലകളിലെ നിക്ഷേപ-വിപണന അവസരങ്ങള്കക്ക് ഊന്നല് നല്കുന്നതാണ് ശില്പശാല. വിവിധ മേഖലകളില് വിജയം കണ്ടെത്തിയ സംരംഭകരും വിദഗ്ധരും പുതിയ സംരംഭകരുമായി തങ്ങളുടെ അനുഭവങ്ങള് പങ്കുവെക്കും. കോഴിക്കോട് ജില്ലയിലെ വടകര താലൂക്ക് മുതല് കണ്ണൂര്, കാസര്ഗോഡ് ജില്ലകള് വരെയുള്ള പ്രദേശത്ത് ടൂറിസം സംരംഭങ്ങള് തുടങ്ങാന് ഉദ്ദേശിക്കുന്ന ഏത് പ്രദേശത്തുള്ളവര്ക്കും ശില്പശാലയില് പങ്കെടുക്കാന് അപേക്ഷിക്കാം. താല്പര്യമുള്ളവര് ംംം.യലസമഹീtuൃശൊ.രീാ എന്ന വെബ്സൈറ്റില് മുന്കൂട്ടി രജിസ്റ്റര് ചെയ്യണം. ഫോണ്: 9447518950.
