മലപ്പുറം: ജില്ലയിലെ വിവിധ സ്ഥലങ്ങളില് നിന്നായി സ്കൂള് വിദ്യാര്ത്ഥികളെ തട്ടികൊണ്ടുപോകാനുള്ള ശ്രമം നടന്ന സാഹചര്യത്തില് പോലീസ് അന്വേഷണം ഊര്ജ്ജിതമാക്കി. കല്പകഞ്ചേരി, തിരൂര്, താനൂര് തുടങ്ങിയ പൊലീസ് സ്റ്റേഷന് പരിധികളിലായാണ് കഴിഞ്ഞ ദിവസങ്ങളില് തട്ടിക്കൊണ്ടുപോകല് ശ്രമം നടന്നത്. സംഭവം ആവര്ത്തിക്കുന്നത് ജനങ്ങളെ ഭീതിയിലാക്കിയിരിക്കുകയാണ്. കഴിഞ്ഞ ഒരാഴ്ചക്കിടെ നാലു കുട്ടികളെയാണ് തട്ടിക്കൊണ്ടു പോകാന് ശ്രമിച്ചതായി പോലീസില് പരാതി ലഭിച്ചത്. താനാളൂര് ചുങ്കം സ്വദേശിയും വളവന്നൂര് ബാഫഖി യതീംഖാന ഹൈസ്കൂള് പത്താം ക്ലാസ് വിദ്യാര്ത്ഥിയുമായ പതിനഞ്ചുകാരന് രാവിലെ സ്കൂളിലേക്കു പോകാന് ബസ് സ്റ്റോപ്പിലേക്ക് നടക്കുമ്പോഴാണ് ഓമ്നി വാനിലെത്തിയ സംഘം തട്ടിക്കൊണ്ടുപോകാന് ശ്രമിച്ചത്.
ആളൊഴിഞ്ഞ റോഡില് വച്ചായിരുന്നു സംഭവം. ബസ് കയറാന് നടന്നു പോകുകയായിരുന്ന വിദ്യാര്ത്ഥിക്ക് മുന്നില് വാന് നിര്ത്തി സംഘം ഒരു മൊബൈല് പുറത്തേക്കിട്ട ശേഷം വിദ്യാര്ത്ഥിയോട് അതെടുത്തുകൊടുക്കാന് പറഞ്ഞു. മൊബൈലുമായി അടുത്തെത്തിയ കുട്ടിയെ വാനിലേക്ക് വലിച്ചുകയറ്റാന് ശ്രമിച്ചു. കുട്ടി കുതറിമാറാന് ശ്രമിച്ചു, ആ സമയം എതിര് ഓട്ടോറിക്ഷ വന്നതിനാല് സംഘം ശ്രമം ഉപേക്ഷിക്കുകയും കുട്ടിയെ ശക്തിയോടെ പുറത്തേക്ക് തള്ളിയിടുകയും ചെയ്തു. റോഡരികില് വീണ വിദ്യാര്ത്ഥിക്ക് പരിക്കേറ്റു. നടുവിനും കാലിനും പരിക്കേറ്റ വിദ്യാര്ത്ഥിയെ തിരൂര് ജില്ലാ ആശുപത്രിയില് പ്രവേശിപ്പിച്ചിരുന്നു. വാന് നീല നിറത്തിലുള്ളതാണെന്നും കെഎല് 11 111 എന്ന നമ്പറാണെന്നും വിദ്യാര്ത്ഥി പറഞ്ഞു. താടി വച്ച രണ്ടു പേരാണ് വാനിലുണ്ടായിരുന്നത്. ഇവര് തമിഴ് കലര്ന്ന മലയാളമാണ് സംസാരിച്ചിരുന്നതെന്നും വിദ്യാര്ത്ഥി പറഞ്ഞു. സംഭവം നടന്നയുടനെ പൊലീസില് വിവരമറിയിച്ചിരുന്നു. തുടര്ന്ന് നീല ഓമ്നി വാനിനായി പൊലീസ് തിരച്ചില് നടത്തിയെങ്കിലും കണ്ടെത്താന് സാധിച്ചിട്ടില്ല. വിദ്യാര്ത്ഥിയുടെ രക്ഷിതാക്കള് താനൂര് പൊലീസില് നല്കിയ പരാതിയെ തുടര്ന്ന് കേസെടുത്ത് അന്വേഷണം ആരംഭിച്ചിട്ടുണ്ട്.
രണ്ട് ദിവസം മുമ്പ് ഓമ്നി വാനിലെത്തിയ സംഘം രണ്ട് സ്കൂള് കുട്ടികളെ തട്ടിക്കൊണ്ടു പോകാന് ശ്രമിച്ചിരുന്നു. തുവ്വക്കാട്, കന്മനം ഭാഗങ്ങളിലായിരുന്നു ഈ സംഭവങ്ങള്. സ്കൂളിലേക്കു പോകുകയായിരുന്ന കന്മനം എഎംയുപി സ്കൂളിലെ നാലാം ക്ലാസ് വിദ്യാര്ത്ഥിനിയെയും ഇതേ സ്കൂളിലെ അഞ്ചാം ക്ലാസ് വിദ്യാര്ത്ഥിയെയുമാണ് ഓംനി വാനിലെത്തിയ സംഘം അന്ന് തട്ടിക്കൊണ്ടു പോകാന് ശ്രമിച്ചത്. രാവിലെയും ഉച്ചയ്ക്കുമായിട്ടായിരുന്നു ഇരു സംഭവങ്ങളും നടന്നത്. രാവിലെ സ്കൂളിലേക്കു പോകുന്നതിനിടെ ആളൊഴിഞ്ഞ റോഡില് വാഹനം നിറുത്തി നാലംക്ലാസുകാരിയായ വിദ്യാര്ത്ഥിയോട് വാഹനത്തില് നിന്നിറങ്ങിയ രണ്ടു പേര് പാടത്തേക്കുള്ള വഴി ചോദിച്ചു. ഇറങ്ങിയ രണ്ടു പേര് അല്പം മുന്നോട്ടേക്കു നടന്നു. പെണ്കുട്ടി മറുപടി പറയാന് ശ്രമിക്കുന്നതിനിടെ കുട്ടിയെ വാഹനത്തിലേക്കു വലിച്ചിട്ടു. ഈ സമയം ഇയാള്ക്ക് ഫോണ് വന്നിരുന്നതായും സാര് എന്ന് അഭിസംബോധനം ചെയ്താണ് സംസാരിച്ചതെന്നും കുട്ടി പറഞ്ഞു. ഫോണില് സംസാരിക്കുന്നതിനിടെ കാറിലുണ്ടായിരുന്നയാള് കുട്ടിയുടെ കൈ വിട്ടിരുന്നു. ഉടന് കുതറിയോടിയ കുട്ടി ഇവിടെ നിന്നും രക്ഷപ്പെടുകയായിരുന്നു. വാഹനത്തിനു പുറത്തുണ്ടായിരുന്ന രണ്ടു പേര് കുട്ടിയെ പിന്തുടരാന് ശ്രമിച്ചെങ്കിലും കുട്ടി തൊട്ടടുത്തുള്ള അങ്ങാടിയിലെത്തിയതോടെ സംഘം ശ്രമം ഉപേക്ഷിച്ചു.
വഴിചോദിച്ചായിരുന്നു അഞ്ചാം ക്ലാസുകാരനെയും സംഘം വാഹനത്തില് കയറ്റാന് ശ്രമിച്ചത്. സ്കൂളിലെത്തിയ കുട്ടികള് അദ്ധ്യാപകരോട് വിവരം പറഞ്ഞതോടെയാണ് സംഭവം പുറത്തറിഞ്ഞത്. തുടര്ന്ന് അദ്ധ്യാപകര് കുട്ടികളുടെ രക്ഷിതാക്കളെയും കല്പകഞ്ചേരി പൊലീസിലും വിവരം അറിയിച്ചു. കേസ് രജിസ്റ്റര് ചെയ്ത് ഇരു കുട്ടികളുടെയും വീടുകളിലെത്തി പൊലീസ് മൊഴിയെടുത്തു. തന്നെ വാനിലേക്കു വലിച്ചിട്ട സമയം മുന്സീറ്റിലിരുന്ന ആളുടെ മടിയില് ഒരു കുട്ടി ഉണ്ടായിരുന്നതായും ഈ കുട്ടിയുടെ വായ അമര്ത്തിപ്പിടിച്ചിരുന്നതായും നാലാം ക്ലാസ് വിദ്യാര്ത്ഥിനി പൊലീസിനോടു പറഞ്ഞു. വാഹനത്തിലുള്ളവരെ കണ്ടാല് അറിയുമെന്നും കുട്ടി പറഞ്ഞു. അതേസമയം ഇതുവരെ എവിടെയും മിസ്സിങ് കേസ് റിപ്പോര്ട്ട് ചെയ്തിട്ടില്ലെന്ന് പൊലീസ് പറഞ്ഞു.
പ്രതികളെയും സംഘം സഞ്ചരിച്ച മാരുതി ഓമ്നി വാനും പിടികൂടാനുമുള്ള തെരച്ചില് ഊര്ജിതമാക്കിയതായി പോലീസ് പറഞ്ഞു.
