സജ്ജനസംഗമത്തിന്റെ ഉല്കൃഷ്ടമായൊരു മാതൃക സംഭാഷണമാണ്. ഒരേ സംഭാഷണംതന്നെ ശത്രുക്കളെയും മിത്രങ്ങളെയും സൃഷ്ടിക്കും. സംഭാഷണപൂര്വമാഹുഃ എന്നു കാളിദാസനും രഘുവംശത്തില് സ്ഥാപിക്കുന്നു. നല്ലവാക്കുകള് കൊണ്ടാണ് സുഹൃത്തുക്കളാകുന്നത്. ചീത്ത വാക്കുകള്കൊണ്ട് ശത്രുക്കളുമാകും. ‘മനിഷിഭിഃ സാപ്തദിനമുച്യതേ’ എന്ന് സപ്തപദികൊണ്ട് സുഹൃത്തുക്കളാകുമെന്ന് കാളിദാസന് വീണ്ടും ഉദ്ബോധിപ്പിക്കുന്നു. സമാനമായ ഖ്യാതികള് ഉള്ളവര് സുഹൃത്തുക്കളാണ്. സദ്ഗുണങ്ങള്കൊണ്ട് തുല്യപ്രശസ്തര് എന്നര്ത്ഥം. നല്ല വാക്കുകള് സംസ്കാരത്തെ അളക്കുവാനുള്ള പ്രമുഖമായ മാനദണ്ഡമാണ്. വ്യക്തികളുടെ ഉള്ളിലിരിക്കുന്ന ആശയങ്ങള് പുറത്തുകൊണ്ടുവരുവാന് ഭാഷയെന്ന ഒറ്റ ഉപാധിയേയുള്ളൂ.
”തന്നതില്ല പരനുള്ളുകാട്ടുവാന്
ഒന്നുമേ ഉപായമീശ്വരന്
ഇന്നുഭാഷയത് അപൂര്ണമാമഹോ
വന്നുപോം പിഴയുമര്ത്ഥശങ്കയാല്”
എന്ന് കുമാരനാശാനും ഉദ്ബോധിപ്പിക്കുന്നു. സജ്ജനങ്ങളെ തിരിച്ചറിയുവാനും ഭാഷതന്നെയാണ് ഉപായമെന്ന് അദ്ധ്യാത്മരാമായണത്തില് എഴുത്തച്ഛനും സമര്ത്ഥിക്കുന്നു.
മുനികുമാരന്മാരായ രാമലക്ഷ്മണന്മാരെ ആയുധധാരികളായി കണ്ട സുഗ്രീവന് ഋഷ്യമൂകാചലത്തില്നിന്ന് ഹനുമാനെ ബ്രഹ്മചാരി വേഷത്തില് പറഞ്ഞയക്കുന്നു. താഴെയെത്തിയ ഹനുമാന് അഞ്ജലീബദ്ധനായ കുമാരന്മാര് ആരെന്നും എവിടെനിന്ന് എങ്ങോട്ടുപോകുന്നു, മുനികുമാരന്മാരായ നിങ്ങളുടെ കൈയില് ആയുധം കാണുമ്പോള് ആശയുണ്ടെന്നും മധുരമായ ഭാഷയില് ചോദിക്കുന്നു. അപ്പോള് രാമന്റെ പ്രതികരണം നോക്കൂ!
”ഇല്ലാ ഒരപശബ്ദമെങ്ങുമേ വാക്കിങ്കല്
നല്ല വൈയ്യാകരണല് വടുനിര്ണയം”
ഒരു ദുഷ്ടശബ്ദംപോലും പ്രയോഗിക്കാതെ ഋതവും ഋജുവും മൃദുവും സ്ഫുടവുമായ വാക്കുകള് മധുരമായി ഒഴുകിവരുന്നു. ഇത് സജ്ജനങ്ങളുടെ മഹിമയാണ്. അവരില്നിന്ന് നല്ലവാക്കുകളേ ഉണ്ടാകൂ. അവരെ വിശ്വസിക്കാം.
വാണ്യേകാ സമലംകരോതി പൂരുഷം
യാ സംസ്കൃതാ ധാര്യതേ
ക്ഷിയന്തേഖലഭൂഷണാനി
സതതം വാഗ്ഭൂഷണം ഭൂഷണം
എന്ന് ഭര്ത്തൃഹരിയും മനുഷ്യനും ഏറ്റവും വലിയ ആഭരണം വാക്കുകള് ആണെന്ന് ബോധ്യപ്പെടുത്തുന്നു.
സംസ്കരിച്ച വാക്കുകള് ആഭരണം തന്നെയാണ്. അതൊരിക്കലും നശിക്കില്ല. മറ്റാഭരണങ്ങള് നശ്വരങ്ങളാണ്. ഒരു ദിവസത്തോളമേ നിലനില്ക്കുകയുള്ളൂ. കുളിയും ഒരുക്കങ്ങളുമെല്ലാം അപ്പോഴത്തേക്കു മാത്രം.
വാക്കാണ് അനശ്വരമായ ഭൂഷണം. വാക്കുകള്കൊണ്ടുണ്ടാകുന്ന മുറിവ് മരണംവരെയും കരിയുകയില്ല. ആയുധംകൊണ്ടുണ്ടാകുന്ന മുറിവിന് ചികിത്സയുണ്ട്. അതുകൊണ്ട് വ്യക്തികള് തമ്മില് കണ്ടുമുട്ടുമ്പോള് നല്ല ഭാഷയില് മധുരമായ വാക്കുകള് കൈമാറണം. ഇത് സത്സംഗത്തിന്റെ മഹനീയമായ തുടക്കമാണ്. നല്ല വാക്കുകള് മനസ്സിനെയും ബുദ്ധിയെയും നന്നാക്കിയെടുക്കും. സംസ്കരിക്കേണ്ടത് ബുദ്ധിയേയും മനസ്സിനെയുമാണ്. അത് നല്ല വാക്കുകള്കൊണ്ടേ സാധിക്കുകയുള്ളൂ. ഇന്നുള്ള സമസ്ത കലഹങ്ങളുടെയും കാരണം നല്ല വാക്കുകളുടെ കുറവാണ്. ”നല്ല വാക്കോതുവാന് ത്രാണിയുണ്ടാകണേ” എന്ന പ്രാര്ത്ഥന ഭാരതീയര് ആവര്ത്തിച്ചു ചൊല്ലിയുറപ്പിക്കട്ടെ!
