ജില്ലയിലെ ജലവിതരണം തടസ്സപ്പെടില്ല പഴശ്ശി പദ്ധതിയിലെ പുനുരുദ്ധാരണ പ്രവര്‍ത്തനങ്ങള്‍ 15ന് പൂര്‍ത്തിയാകും. ഷട്ടുകള്‍ ഉടന്‍ അടക്കും

ഇരിട്ടി: ജില്ലയില്‍ ഈ വര്‍ഷവും കുടിവെള്ള വിതരണം കാര്യക്ഷമമായി നടക്കുമെന്നും പഴശ്ശിഡാംഷട്ടറുകളുടെ അറ്റകുറ്റ പണികള്‍ തീര്‍ത്ത് ഈ മാസം 15ന് തന്നെ അടയ്‌ക്കുമെന്നും പഴശ്ശി ഇറിഗേഷന്‍ വെളിയമ്പ്ര അസിസ്റ്റന്റ്എഞ്ചിനീയര്‍ ഷാജി പറഞ്ഞു. ഡാമിന്റെ സുരക്ഷയുടെ ഭാഗമായിട്ടുള്ള ചോര്‍ച്ച അടക്കല്‍ ഉള്‍പ്പെടെയുള്ള പണികളാണ് ഇപ്പോള്‍ നടക്കുന്നത്. കൂടാതെ 2012ല്‍ ഉണ്ടായ വെള്ളപൊക്കത്തെ തുടര്‍ന്ന് ഒലിച്ചു പോയ കനാലിന്റെ ഭാഗങ്ങള്‍, ഗാര്‍ഡന്റെ ഭാഗങ്ങള്‍ പുനര്‍നിര്‍മ്മിക്കുക. റിസര്‍വോയറിലെ അതിര്‍ത്തി അളന്ന് സര്‍വ്വേകല്ലുകള്‍ പതിപ്പിച്ച് വേലികെട്ടിവേര്‍തിരിക്കുക തുടങ്ങിയ പ്രവര്‍ത്തികളും ഇപ്പോള്‍ നടക്കുന്നതായി അദ്ദേഹം പറഞ്ഞു. മാത്രമല്ല ഷട്ടറിന്റെ പ്രധാന ഭാഗങ്ങളും മോട്ടറും ബന്ധിപ്പിക്കുന്ന പ്ലാറ്റ് ഫോമിന്റെ പുനരുദ്ധാരണ പ്രവര്‍ത്തികളും തകൃതിയായി ഇപ്പോള്‍ നടക്കുന്നുണ്ട്. ഏകദേശം എട്ടുകോടി ചിലവ് പ്രതീക്ഷിക്കുന്ന നിര്‍മ്മാണ പ്രവര്‍ത്തനം തീര്‍ക്കേണ്ടത് ഡിസംബറിലാണെങ്കിലും ഈ മാസം 15ന് മുമ്പ് തന്നെ പണിതീര്‍ത്ത് ഷട്ടറുകള്‍ അടക്കാനാണ് ഉദ്ദേശിക്കുന്നതെന്നും അദ്ദേഹം പറഞ്ഞു. പഴശ്ശിഡാമില്‍ 16 ഷട്ടറുകളാണ് ഉള്ളത്. ഇതില്‍ ഒമ്പത് ഷട്ടറുകള്‍ അടച്ചതായും അദ്ദേഹം പറഞ്ഞു. അതേസമയം ജില്ലയില്‍ കുടിവെള്ളം പമ്പു ചെയ്യുന്നതില്‍ ഇതുവരെ പ്രശ്‌നമുണ്ടായില്ലെങ്കിലും ഷട്ടറുകള്‍ ഉടന്‍ അടച്ചില്ലെങ്കില്‍ ഏത്‌സമയവും പമ്പിംഗ് നടത്താന്‍ കഴിയാത്ത സ്ഥിതി സംജാതമാകുമെന്ന് ചാവശ്ശേരിപറമ്പ് അസിസ്റ്റന്റ്എഞ്ചിനീയര്‍ ജയപ്രകാശ് പറഞ്ഞു. കഴിഞ്ഞ വര്‍ഷംകൊടും വേനലിലും ജില്ലയിലെ കുടിവെള്ളവിതരണം കാര്യക്ഷമമായി നടത്താന്‍ കഴിഞ്ഞിരുന്നു. 26.7 മീറ്റര്‍ ഉയരത്തില്‍ വെള്ളം അന്ന്‌സ്‌റ്റോക്ക് ചെയ്തിരുന്നു. പഴശ്ശി റിസര്‍വോയറിലെ ഇന്‍ഡേക്ക് പമ്പ് ഹൗസില്‍ നിന്നും വെള്ളം ബൂസ്റ്റ് ചെയ്ത് ചാവശ്ശേരി പറമ്പിലെ ട്രീറ്റ്‌മെന്റ് പ്ലാന്റില്‍ എത്തിക്കുകയാണ ്‌ചെയ്യുന്നത്. ഇവിടെ നിന്നും അനേകം ശുദ്ധീകരണ പ്രക്രിയക്ക് വിധേയമാക്കുന്ന വെള്ളം കണ്ണൂര്‍, പെരളശ്ശേരി, കൊളച്ചേരി തുടങ്ങിയസ്ഥലങ്ങളിലെ ടാങ്കുകളില്‍ എത്തിച്ച് അവിടെ നിന്നാണ് വിവിധ പ്രദേശങ്ങളിലേക്ക് വിതരണം ചെയ്യുന്നത്. കണ്ണൂര്‍ ടാങ്കില്‍നിന്നും എളയാവൂര്‍ പൂഴാതി, പള്ളിക്കുന്ന്, ചിറക്കല്‍, വളപട്ടണം, അഴീക്കോട്, എടക്കാട്, കണ്ണൂര്‍ കോര്‍പ്പറേഷന്‍ തുടങ്ങിയസ്ഥലങ്ങളിലും കൊളച്ചേരി ടാങ്കില്‍നിന്നും കുറ്റിയാട്ടൂര്‍, കൊളച്ചേരി, നാറാത്ത്, കൂടാളി, കീഴല്ലൂര്‍, മട്ടന്നൂര്‍ തുടങ്ങിയസ്ഥലങ്ങളിലും പെരളശ്ശേരിടാങ്കില്‍ നിന്നും സമീപത്തെ പത്ത് പഞ്ചായത്തുകളിലേക്കും പഴശ്ശി ജലം വിതരണത്തിനായി എത്തിക്കുന്നുണ്ട്. ഷട്ടറുകള്‍അടയ്‌ക്കുന്നത് താമസിച്ചാല്‍ ജില്ലയില്‍ കൊടുംവരള്‍ച്ച ഉണ്ടാകുമെന്ന ഭീതിയിലാണ് അധികൃതരും പൊതുജനങ്ങളും.