ആലുവ: ആലുവ പോലീസ് അഞ്ച് മണിക്കൂര് നടത്തിയ സ്പെഷ്യല് ഡ്രൈവില് മുന്നൂറിലേറെ കേസെടുക്കുകയും കോടതിയില് ഹാജരാകാതെ ഒളിവില് കഴിഞ്ഞിരുന്ന 18 പേരെ അറസ്റ്റ് ചെയ്യുകയും ചെയ്തു. ശനിയാഴ്ച്ച രാത്രി പത്ത് മുതല് ഇന്നലെ പുലര്ച്ചെ മൂന്ന് വരെ പ്രിന്സിപ്പല് എസ്ഐ ഹണി കെ. ദാസിന്റെ നേതൃത്വത്തില് ആറ് സ്ക്വാഡുകളായി തിരിഞ്ഞായിരുന്നു പരിശോധന.
ഗതാഗത നിയമങ്ങള് ലംഘിച്ച് വാഹനം ഓടിച്ചതിന് 250 ഓളം പേര്ക്കെതിരെ കേസുണ്ട്. മദ്യപിച്ച് വാഹനം ഓടിച്ചതിന് പത്ത് പേര്ക്കെതിരെയും പൊതുസ്ഥലത്തിരുന്ന് മദ്യപിച്ചതിന് നാല് പേര്ക്കെതിരെയും പൊതുസ്ഥലത്ത് നിന്നും പുകവലിച്ചതിന് 40 പേര്ക്കെതിരെയും സ്കൂള് പരിസരത്ത് പുകയില ഉത്പന്നങ്ങള് വില്പ്പന നടത്തിയ രണ്ട് കേസുകളുമാണ് രജിസ്റ്റര് ചെയ്തത്.
കോടതിയില് നിന്നും സമന്സ് ലഭിച്ചിട്ടും കോടതിയില് ഹാജരാകാതെ മുങ്ങി നടന്ന 19 പേരില് 18 പേരെയും അറസ്റ്റ് ചെയ്തു.
ഉളിയന്നൂര്, മാറമ്പിള്ളി. യു.സി. കോളേജ്, ബൈപ്പാസ്, റെയില്വേ സ്റ്റേഷന്, മണപ്പുറം പരിസരങ്ങളിലായി നടന്ന പരിശോധനയില് അഡീഷണല് എസ്.ഐമാരായ എം.വി. യാക്കൂബ്, ശശികുമാര്, എ.എസ്.ഐ വര്ഗീസ്, പോലീസുകാരായ മനോജ്, അബ്ദുള് റഹ്മാന്, സുധീഷ്, രാജീവ്, സന്വര്, മുഹമ്മദ് അലി, ശ്രീനി, അബ്ദുള് സത്താര്, വിജയകൃഷ്ണന്, നവീന്ദാസ്, ജോയി ചെറിയാന് എന്നിവരും പങ്കെടുത്തു.
