കരുനാഗപ്പള്ളി: കുടുംബത്തില് ശാന്തി ഉണ്ടായെങ്കില് മാത്രമെ സമൂഹത്തിലും ശാന്തി ഉണ്ടാകുവെന്നും അശാന്തി കുടുംബത്തിലുണ്ടാകാതിരിക്കാന് വ്യക്തികള് സ്വഭാവശുദ്ധി ഉള്ളവരാകണമെന്നും ഭാരതീയ വിചാര കേന്ദ്രം അസിസ്റ്റന്റ് ഡയറക്ടര് ആര്.സഞ്ജയന്.
ദീപാവലിയോട് അനുബന്ധിച്ച് രാഷ്ട്രീയ സ്വയംസേവക സംഘം കരുനാഗപ്പള്ളി താലൂക്കിന്റെ നേതൃത്വത്തില് ചങ്ങന്കുളങ്ങരയില് നടത്തിയ കുടുംബസംഗമത്തില് സംസാരിക്കുകയായിരുന്നു അദ്ദേഹം.
കുടുംബം ദുര്ബലമാകുന്ന കാഴ്ചയാണ് എവിടെയും കാണുന്നത്. വിദ്യാഭ്യാസരംഗം വ്യവസായവല്ക്കരിച്ചിരിക്കുന്നു. അതിനാല് നിലവാരമുള്ള വിദ്യാഭ്യാസം കുട്ടികള്ക്ക് കിട്ടുന്നില്ല. അതുകൊണ്ട് കുടുംബത്തില് നിന്നു തന്നെ അവരിലേക്ക് നല്ല ഗുണങ്ങള് പകരാനാകണം. അതിന് പണ്ട് അറിവും അനുഭവവുമുള്ള മുത്തച്ഛന്മാരും, മുത്തശിമാരും ഉണ്ടായിരുന്നു. രണ്ടുകുട്ടികള് എന്നുള്ളത് ഒന്നായും കുട്ടികള് വേണ്ടെന്ന സ്വാര്ത്ഥചിന്തയിലേക്കും മനുഷ്യര് എത്തിതുടങ്ങിയിരിക്കുന്നു. പണ്ട് അപൂര്വ്വമായിരുന്ന വിവാഹമോചനങ്ങള് വര്ദ്ധിക്കുകയാണ്. പതിനായിരകണക്കിന് വിവാഹമോചനങ്ങളാണ് ഓരോ ജില്ലയിലും നടക്കുന്നത്. സ്ത്രീകളും പുരുഷന്മാരും പരസ്പരം വിട്ടുവീഴ്ചയ്ക്ക് തയ്യാറാകുന്നില്ല. വൈകാരികക്ഷമത ഇല്ലാത്തതുമൂലം നിസാരകാര്യങ്ങള്ക്കു പോലും ആത്മഹത്യക്ക് തയ്യാറാകുന്ന കാഴ്ചയാണ് എവിടെയും കാണുന്നത്. ആത്മബന്ധം ഇല്ലാത്തതിനാല് അച്ഛനമ്മമാരെ അനാഥാലയത്തില് തള്ളുന്നു. നാളെ അവരുടെ സ്ഥിതി എന്തെന്ന് അവര് ചിന്തിക്കാന് പോലും തയ്യാറാകുന്നില്ല. സമാധാനവും ശാന്തിയും സമൂഹത്തിലുണ്ടാകാന് കുടുംബം ശക്തിപെടേണ്ടതുണ്ട്. ഭാരതസംസ്കാരം ഈശ്വരനെ അടിസ്ഥാനമാക്കി ഉള്ളതാണ്. ഈശ്വരശക്തി വളര്ത്തുവാനും, കര്ത്തവ്യബോധം വളര്ത്താനും കഴിയണം. കുട്ടികളില് ചെറുപ്പത്തില് തന്നെ ഈശ്വരഭക്തിയും, മാതൃഭക്തിയും, പിതൃഭക്തിയും, ദേശഭക്തിയും ഉള്ളവരായി വളര്ത്തിയാല് നാം ഇന്ന് അഭിമുഖീകരിക്കുന്ന പ്രശ്നങ്ങള്ക്ക് പരിഹാരമാകുമെന്ന് ആര്.സഞ്ജയന് പറഞ്ഞു.
ദീപാവലി ആഘോഷം പടക്കം പൊട്ടിയ്ക്കുന്നതിലും, മധുരം വിതരണത്തിലും മാത്രം ശ്രദ്ധിക്കാതെ ദീപാവലിയുടെ സന്ദേശം ഉള്കൊണ്ട് മനുഷ്യമനസുകളെ യോജിപ്പിക്കുന്ന ഉത്സവമാക്കാന് എല്ലാവരും ശ്രദ്ധിക്കണമെന്ന് കുടുബസംഗമം ഉദ്ഘാടനം ചെയ്തു കൊണ്ട് മാതാ അമൃതാനന്ദമയീ മഠത്തിലെ സ്വാമി വേദാമൃതചൈതന്യ പറഞ്ഞു.
കരുനാഗപ്പള്ളി താലൂക്കില് നിന്നും അടിയന്തിരാവസ്ഥക്കെതിരെ പ്രവര്ത്തിച്ച് ജയില് ശിക്ഷ അനുഭവിച്ച വേണുഗോപാല്, മോഹനന്, ഇന്ദ്രാത്മജന്, രാജേന്ദ്രന്, ജയചന്ദ്രന് എന്നിവരെ ചടങ്ങില് ആദരിച്ചു. കുട്ടികളുടെ കലാപരിപാടികളും അരങ്ങേറി. ആര്.മോഹനന്, ഓമനക്കുട്ടന്, ജഗനാഥന് രതീഷ്, സന്തോഷ്, ഗിരീഷ്, ഷിജു തുടങ്ങിയവര് ചടങ്ങില് സംബന്ധിച്ചു.
