ജോഷി ഭാര്യ മറിയാമ്മയ്ക്കൊപ്പം
ചേര്ത്തല: ഇരുകാലുകള്ക്കും സ്വാധീനമില്ലാത്ത അനാഥയായ മറിയാമ്മയെ ജീവിതത്തിലേക്ക് കൈപിടിച്ച് നയിച്ച ജോഷിയെ പാതിവഴിയില് വിധി തളര്ത്തി. അഴീക്കല് അറയ്ക്കല് എ.ജോഷി (44) ഉദരസംബന്ധമായ അസുഖത്തെ തുടര്ന്ന് ഏഴ് വര്ഷമായി ചികിത്സയില് കഴിയുന്നത്. കൂലിപണിക്കാരനായ ജോഷിക്ക് ജോലിചെയ്യാന് കഴിയാതായതോടെ കുടുംബം പട്ടിണിയിലായി. ചികിത്സക്കായി കിടപ്പാടം വിറ്റതോടെ വാടക വീട്ടില് കഴിയുകയാണ് കുടുംബം. ഇരുപത് വര്ഷം മുന്പായിരുന്നു ഇവരുടെ വിവാഹം. വൈകല്യങ്ങള് മനസിലാക്കിയാണ് ജോഷി മറിയാമ്മയെ വിവാഹം കഴിച്ചത്. മറിയാമ്മ അന്ധകാരനഴി കടപ്പുറം റോഡിനരുകില് തട്ടുകട നടത്തിയാണ് കുടുംബം പുലര്ത്തുന്നത്. ചായയും കാപ്പിയും ലഘുഭക്ഷണങ്ങളുമാണ് ഇവിടെയുള്ളത്. ചില ദിവസങ്ങളില് നൂറു രൂപ പോലും കടയില് നിന്ന് കിട്ടാറില്ല. പ്ലസ്ടുവിന് പഠിക്കുന്ന മക്കള് അഭിഷേകിനും അമലിനും ഫീസും കുടിശിഖയാണ്. പലപ്പോഴും നാട്ടുകാരാണ് സഹായിക്കുന്നത്. തിരുവനന്തപുരം മെഡിക്കല് കോളജ് ആശുപത്രിയിലാണ് ജോഷിയുടെ ചികിത്സ. ശസ്ത്രക്രിയ നടത്തണമെന്നാണ് ഡോക്ടര്മാര് നിര്ദേശിച്ചിട്ടുള്ളത്. ഇതിന് വകയില്ലാതെ കുടുംബം വലയുകയാണ്. ഇവരെ സഹായിക്കുവാന് സന്മനസുള്ളവര്ക്ക് മറിയാമ്മയുടെ പേരിലുള്ള ഫെഡറല് ബാങ്ക് തുറവൂര് ശാഖയിലെ 16270100080291 നമ്പര് അക്കൗണ്ടില് പണം നിക്ഷേപിക്കാവുന്നതാണ്. ഐ.എഫ്.എസ്.സി കോഡ് എഫ്.ഡി.ആര്.എല് 0001627. ഫോണ്: 9496693175
