തിരൂരങ്ങാടി: ബീഫ് രാഷ്‌ട്രീയം പറഞ്ഞ് അധികാരത്തിലേറിയ പിണറായിയും കൂട്ടരും പാവങ്ങളുടെ കഞ്ഞിയില്‍ മണ്ണിടുകയാണെന്ന് ബിജെപി സംസ്ഥാന സെക്രട്ടറി വി.കെ സജീവന്‍ പറഞ്ഞു. ബിജെപി തിരുരങ്ങാടി താലൂക്ക് സപ്ലൈ ഓഫീസിലേക്ക് നടത്തിയ ബഹുജന മാര്‍ച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 2013 ജൂലൈയില്‍ കേന്ദ്രം നടപ്പിലാക്കി തുടങ്ങിയ ഭക്ഷ്യ സുരക്ഷാ പദ്ധതിക്കു നേരെ മുഖംതിരിച്ച ഇടതുവലത് സര്‍ക്കാരുകളുടെ കൊള്ളരുതായ്മകളുടെ ഫലമാണ് ഇന്ന് മലയാളികള്‍ അനുഭവിക്കുന്നത്. മുഴുവന്‍ വിഭാഗം ജനങ്ങളെയും ഒരുപോലെ ദുരിതത്തിലാക്കുന്ന ഈ നടപടിയില്‍ നിന്നും സര്‍ക്കാര്‍ പിന്നോട്ട് പോയില്ലെങ്കില്‍ ശക്തമായ സമരത്തിന് ബിജെപി നേതൃത്വം നല്‍കുമെന്നും അദ്ദേഹം കൂട്ടിച്ചേര്‍ത്തു.
റേഷന്‍ മുന്‍ഗണനാ ലിസ്റ്റിലെ അനര്‍ഹരെ ഒഴിവാക്കി അപാകതകള്‍ പരിഹരിക്കുക, റേഷന്‍ രംഗത്തെ അഴിമതി അവസാനിപ്പിക്കുക, സിവില്‍ സപ്ലൈസ് കോര്‍പ്പറേഷനിലെ കെടുകാര്യസ്ഥതക്കെതിരെ വകുപ്പുതല നടപടിയെടുക്കുക, തുടങ്ങിയ വിവിധ ആവശ്യങ്ങള്‍ ഉന്നയിച്ചായിരുന്നു സമരം. തൃക്കുളം അമ്പലപ്പടിയില്‍ നിന്നും ആരംഭിച്ച മാര്‍ച്ച് മിനി സിവില്‍ സ്റ്റേഷന്‍ ഗേറ്റില്‍ പോലീസ് തടഞ്ഞു. ജില്ലാ ജനറല്‍ സെക്രട്ടറി രവിതേലത്ത്, കെ.പി.വത്സരാജ്, ജയനിദാസന്‍, ഗണേശന്‍ വള്ളിക്കുന്ന്, സുബ്രമണ്യന്‍, പി.ജഗന്നിവാസന്‍, രവി കാച്ചടി തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: