കണ്ണൂര്: മലബാര് കാന്സര് കെയര് സൊസൈറ്റിയുടെ ആഭിമുഖ്യത്തില് ലോകാരോഗ്യ സംഘടനയുടെ ഗവേഷണ വിഭാഗമായ ഐഎആര്സിയുടെ സഹകരണത്തോടെ ഉത്തരമലബാറില് സ്തനാര്ബുദ നിയന്ത്രണത്തിനായുള്ള നൂതന പദ്ധതിയായ ബ്രസ്റ്റ് കാന്സര് ബ്രഗേഡിന് 29 ന് വൈകുന്നേരം 5.30 ന് സാധു കല്ല്യാണ മണ്ഡപത്തില് ബ്രാന്റ് അംബാസിഡര് നടി മഞ്ജു വാര്യര് തുടക്കം കുറിക്കും. മന്ത്രി കെ.കെ.ശൈലജ, കണ്ണൂര് യൂനിവേഴ്സിറ്റി വൈസ് ചാന്സിലര് ഖാദര് മാങ്ങാട്, ഡിഐജി ദിനേന്ദ്ര കശ്യപ്, തിരുവന്തപുരം ആര്സിസി മെഡിക്കല് സൂപ്രണ്ട് ഡോ.കെ.രാംദാസ്, ഡോ.ചന്ദ്രമോഹന് തുടങ്ങിയവര് ചടങ്ങില് സംബന്ധിക്കും.
കേരളത്തില് ആശങ്കാജനകമായി വര്ദ്ധിച്ച് വരുന്ന സ്തനാര്ബുദം നിയന്ത്രണ വിധേയമാക്കാന് കണ്ണൂര് മലബാര് കാന്സര് കെയര് സൊസൈറ്റിയുടെ ബ്രസ്റ്റ് കാന്സര് ബ്രിഗേഡ് പദ്ധതി രണ്ട് ഘട്ടങ്ങളിലായാണ് നടപ്പിലാക്കുക, ഒന്നാംഘട്ടത്തില് സ്തനാര്ബുദ ബോധല്ക്കരണ പ്രവര്ത്തനങ്ങളും സ്തനാര്ബുദ ലക്ഷണങ്ങള് മുന്കൂട്ടി കണ്ടെത്തുന്നതിനുള്ള ചെലവുകുറഞ്ഞതും ഫലപ്രഥവുമായ സ്വയം സ്തനപരിശോധനയും സ്ത്രീകളില് ശീലമാക്കുക എന്നതാണ്. വിദ്യാര്ത്ഥികള്, എന്എസ്എസ് വളണ്ടിയര്മാര്, സ്റ്റുഡന്റ് പോലീസ്, ആശാവര്ക്കര്മാര് തുടങ്ങിയ വര്ക്ക് ഇതിനാവശ്യമായ പരിശീലനം നല്കും. സ്തന പരിശോധനയില് ലക്ഷണങ്ങള് കണ്ടെത്തുന്നവര്ക്ക് ഗ്രാമതല ക്യാമ്പുകളില് സഞ്ജീവിനി മൊബൈല് ടെലിമെഡിസിന് യൂനിറ്റിന്റെ സേവനം ഉപയോഗപ്പെടുത്തി മാമോഗ്രാഫി പരിശോധന നല്കുകയാണ് രണ്ടാം ഘട്ടം കൊണ്ട് ലക്ഷ്യമിടുന്നത്. വര്ധിച്ച് വരുന്ന സ്തനാര്ബുദ നിരക്കും തുടര്ന്നുണ്ടാകുന്ന മരണങ്ങളും കുറച്ച് കൊണ്ടുവരികയെന്നതാണ് പദ്ധതികൊണ്ട് ലക്ഷ്യമിടുന്നത്. സ്തനാര്ബുദം വരാതെ തടയുവാനുള്ള ജീവിത ശൈലി സ്വായത്തമാക്കാനുള്ള ബോധവല്ക്കരണവും ഇതോടൊപ്പം നടത്തും. കാന്സര് കെയര് സൊസൈറ്റി പ്രസിഡണ്ട് കൃഷ്ണനാഥ പൈ, എം.പി.ഇര്ഷാദ്, യു.വിജയന്, ബി.വി.ഭട്ട് തുടങ്ങിയവര് വാര്ത്താസമ്മേളനത്തില് പങ്കെടുത്തു.
