തളിപ്പറമ്പ: തൃച്ചംബരം പൂക്കോത്ത് നടക്ക് സമീപത്തുള്ള ബിഎംഎസ് മേഖലാ ഓഫീസിനു നേരെ അക്രമം. ഇന്നലെ രാത്രിയാണ് അക്രമം നടത്തിയത്. ഓഫീസിന്റെ ബോര്ഡും പോസ്റ്ററുകളും കൊടികളും നശിപ്പിച്ചു.
തൃച്ചംബരത്തെ ആര്എസ്എസ് കാര്യാലയത്തിന് സമീപത്തുള്ള സ്വര്ഗ്ഗീയ മാരാര്ജി സ്തൂപത്തില് നിന്നും കൊടിയും എടുത്തുകൊണ്ടുപോയി. പുളിമ്പറമ്പില് സ്ഥാപിച്ച ബിജെപിയുടെ കൊടിമരവും പിഴുതെടുത്ത് കൊണ്ടുപോയിട്ടുണ്ട്. തളിപ്പറമ്പിലും പരിസരപ്രദേശങ്ങളിലും സ്ഥാപിച്ച നിരവധി കൊടിമരങ്ങളാണ് ഇന്നലെ രാത്രി നശിപ്പിച്ചത്.
സര്വ്വകക്ഷി സമാധാനയോഗത്തിലെ തീരുമാനങ്ങളുടെ മഷിയുണങ്ങും മുന്പ് വീണ്ടും അക്രമങ്ങള് നടത്തിയത് മനഃപൂര്വ്വം പ്രശ്നങ്ങള് ഉണ്ടാക്കാന് ഉള്ള സാമൂഹ്യ വിരുദ്ധരുടെ ശ്രമമാണെന്ന് ബിഎംഎസ് ജില്ലാ സെക്രട്ടറി സി.പി. തമ്പാന് പറഞ്ഞു. അക്രമികളെ നിയമത്തിന് മുന്നില് കൊണ്ടുവന്നില്ലെങ്കില് ശക്തമായി പ്രതിരോധിക്കേണ്ടി വരുമെന്നും അദ്ദേഹം കൂട്ടിച്ചേര്ത്തു.
സിപിഎം നടത്തിക്കൊണ്ടിരിക്കുന്ന ജാഥകളില് സംഘപരിവാര് സംഘടനകള്ക്ക് നേരെ നടത്തുന്ന പ്രകോപനപരമായ പ്രസംഗങ്ങളുടെ ഭാഗമാണ് അക്രമമെന്ന് സംശയിക്കേണ്ടിയിരിക്കുന്നതായും അദ്ദേഹം പറഞ്ഞു. പി.എസ്. ബിജു, ചെങ്ങൂനി രമേശന്, എം. രാജീവന് എന്നിവര് സംസാരിച്ചു.
