കോഴിക്കോട്: ഒട്ടേറെ പരിമിതികളാല് വീര്പ്പു മുട്ടുന്ന കോഴിക്കോട് മെഡിക്കല് കോളജിനെ രക്ഷിക്കുവാന് സംസ്ഥാന സര്ക്കാര് അടിയന്തരമായി ഇടപെടണമെന്ന് ബിജെപി കോഴിക്കോട് ജില്ലാ സമിതി യോഗം പ്രമേയത്തിലൂടെ ആവശ്യപ്പെട്ടു. നിത്യേന ഇവിടെയെത്തുന്ന രോഗികള് ആവശ്യമായ മരുന്നു കിട്ടാതെ പ്രയാസപ്പെടുന്നു. തൃശൂര് മുതല് കാസര്കോട് വരെയുള്ള പ്രദേശങ്ങളിലെ ഒട്ടേറെ രോഗികള് ആശ്രയിക്കുന്ന ഇവിടെ കിടത്തി ചികിത്സക്ക് ആവശ്യമായ സൗകര്യം ഒരുക്കുന്നതില് കാലാകാലങ്ങളായി സംസ്ഥാന സര്ക്കാരുകള് കാണിച്ച അലംഭാവം കുറ്റകരവും പ്രതിഷേധാര്ഹവുമാണ്. ഡോക്ടര്മാര് ഉള്പ്പെടെ ആവശ്യമായ ജീവനക്കാരെ നിയമിക്കാത്തതും സ്ഥിതിഗതികള് സങ്കീര്ണ്ണമാക്കുന്നു.
മെഡിക്കല് കോളജിനെ രക്ഷിക്കുന്നതിനും മികവിന്റെ കേന്ദ്രമാക്കുന്നതിനും യോജിച്ച മുന്നേറ്റം ആവശ്യമാണ്. ഇക്കാര്യത്തില് നരേന്ദ്ര മോദി സര്ക്കാര് തികച്ചും അനുഭാവപൂര്ണ്ണമായ സമീപനം സ്വീകരിക്കുന്നത് അഭിനന്ദനാര്ഹമാണെന്നും പ്രമേയം ചൂണ്ടിക്കാട്ടി. പ്രശ്നത്തിന്റെ ഗൗരവം തിരിച്ചറിഞ്ഞ് പരിഹാര നടപടികള്ക്കായി സംസ്ഥാന ആരോഗ്യ വകുപ്പ് മന്ത്രി പ്രത്യേക താല്പ്പര്യം കാണിക്കണമെന്നും പ്രമേയം തുടര്ന്നാവശ്യപ്പെട്ടു.
ലക്ഷക്കണക്കിന് രൂപയുടെ ഉപകരണങ്ങള് നിസ്സാര കാരണം പറഞ്ഞ് പ്രവര്ത്തന രഹിതമായിരിക്കുകയാണെന്നും ചൂണ്ടിക്കാട്ടിയ പ്രമേയം കാഷ്വാലിറ്റിയില് സ്കാനിംഗ് യന്ത്രം സ്ഥാപിക്കണമെന്നും ആവശ്യപ്പെട്ടു.
ജില്ലാ പ്രസിഡന്റ് ടി പി ജയചന്ദ്രന് അദ്ധ്യക്ഷത വഹിച്ചു. എം.സി. ശശീന്ദ്രന്, ടി കെ പത്മനാഭന്, സി. അമര്നാഥ്, എന്.പി രാമദാസ്, സി.പി. സതീശന്, പൊക്കിണാരി ഹരിദാസന്, അഡ്വ. കെ.വി. സുധീര്, ടി വി ഉണ്ണികൃഷ്ണന്, അനിതാ ഏറങ്ങാട്, സി. ബിന്ദു, ജിഷാഗിരീഷ്, ഷൈമ പൊന്നത്ത് എന്നിവര് പ്രസംഗിച്ചു. പി. ജിജേന്ദ്രന് സ്വാഗതവും ടി. ബാലസോമന് നന്ദിയും പറഞ്ഞു.
