കൊട്ടാരക്കര: വിനോദയാത്രക്ക് പോയി മടങ്ങിയ യുവാക്കള് വാഹനാപകടത്തില് മരിച്ചു. കൊട്ടാരക്കര പുലമണ് നീലാംവിള അരുണ് ഭവനത്തില് വൈ.രാജുവിന്റേയും ആനിയുടേയും മകന് അരുണ് രാജു (23), നീലേശ്വരം പാലവിള തെക്കതില് സാബു ഹെലന് ദമ്പതികളുടെ മകന് സുമിത് ക്രിസ്റ്റി (20) എന്നിവരാണ് മരിച്ചത്. എംസി റോഡില് മൈലത്ത് ഞായറാഴ്ച രാത്രി 10.30നായിരുന്നു സംഭവം.
ബൈക്കില് ചാലക്കുടിയിലും അതിരപ്പള്ളിയിലും വിനോദയാത്രയ്ക്കു പോയ ആറംഗ സംഘത്തില്പ്പെട്ടവരായിരുന്നു മരിച്ച യുവാക്കള്. മടങ്ങിവരുന്ന വഴിയാണ് അപകടം.
ബൈക്ക് അപകടത്തില്പെട്ട് രണ്ടു യുവാക്കള് റോഡരികില് കിടക്കുന്നതായി വഴിയാത്രക്കാരാണ് പോലീസില് അറിയിച്ചത്. പോലീസ് എത്തി അപകടത്തില്പ്പെട്ടവരെ തിരുവനന്തപുരം മെഡിക്കല് കോളേജിലേക്ക് കൊണ്ടുപോയെങ്കിലും സുമിത് ക്രിസ്റ്റി വഴിമധ്യേയും അരുണ് രാജു തിങ്കളാഴ്ച പുലര്ച്ചെ നാലിനും മരിച്ചു. ഒപ്പമുണ്ടായിരുന്നവര് ബൈക്കില് മുമ്പേ പോയിരുന്നു. മറ്റു വാഹനങ്ങള് ഇടിച്ചതാണോ സ്വയം അപകടത്തില്പ്പെട്ടതാണോ എന്ന കാര്യത്തില് വ്യക്തത കൈവന്നിട്ടില്ല. പോലീസ് അന്വേഷണം ആരംഭിച്ചു. മൃതദേഹങ്ങള് തിരുവനന്തപുരം മെഡിക്കല് കോളേജ് ആശുപത്രിയില് നിന്നും പോസ്റ്റുമാര്ട്ടത്തിനു ശേഷം കൊട്ടാരക്കര താലൂക്കാശുപത്രയില് മോര്ച്ചറിയിലേക്ക് മാറ്റി. അനൂപ് രാജുവാണ് മരിച്ച അരുണ് രാജിന്റെ സഹോദരന്. വിനീഷ് സാബു, സിബിന് ക്രിസ്റ്റി എന്നിവരാണ് സുമിത് ക്രിസ്റ്റിയുടെ സഹോദരങ്ങള്.
