പാനൂര്: കണ്ണൂരില് സമാധാനകമ്മറ്റി വിളിച്ചു ചേര്ക്കാന് ബോധപൂര്വ്വം വൈകിപ്പിച്ച് വീണ്ടും അക്രമത്തിനു സിപിഎം നീക്കം. എല്ഡിഎഫ് സര്ക്കാര് അധികാരമേറ്റ ശേഷം രാഷ്ട്രീയ അക്രമങ്ങളില് ഏഴ് ജീവനുകള് പൊലിഞ്ഞതോടെ ദേശീയശ്രദ്ധ നേടിയ കണ്ണൂരിലെ അക്രമരാഷ്ട്രീയത്തിനു വിരാമമിടാന് മുഖ്യമന്ത്രി പിണറായി വിജയന് ഇടപ്പെടണമെന്ന് ബിജെപിയും പ്രതിപക്ഷവും ആവശ്യപ്പെട്ടിട്ടും നിസ്സംഗത പുലര്ത്തുന്ന മുഖ്യമന്ത്രി സിപിഎം അണികള്ക്ക് അക്രമം നടത്താനുളള അവസരമൊരുക്കലാണെന്ന് വ്യക്തമാകുന്നു.
ഏറെ ചര്ച്ച ചെയ്ത കൊലപാതകമായിരുന്നു പിണറായി ടൗണില് സിപിഎം സംഘം വെട്ടിക്കൊന്ന ബിജെപി പ്രവര്ത്തകനായ രമിത്തിന്റെത്. 2002ല് രമിത്തിന്റെ അച്ഛന് ഉത്തമനെയും സിപിഎം അക്രമിസംഘം വെട്ടിക്കൊന്നിരുന്നു. ഇതു ദേശീയതലത്തില് വന്പ്രതിഷേധത്തിനു കാരണമായിരുന്നു. ജില്ലയിലെ അക്രമങ്ങളെക്കുറിച്ച് കേന്ദ്രവും ഗവര്ണ്ണറും റിപ്പോര്ട്ട് തേടിയിരുന്നു. ഇതിനെ തുടര്ന്ന് മുഖ്യമന്ത്രി നേരിട്ട് സമാധാനകമ്മറ്റി യോഗം വിളിക്കണമെന്ന ആവശ്യം ശക്തമായിരിക്കുകയാണ്. എന്നാല് സിപിഎം ജില്ലാനേതാക്കളുടെ ഇടപെടലില് സമാധാനകമ്മറ്റി യോഗം വിളിച്ചു ചേര്ക്കാന് വൈകിപ്പിക്കുകയാണ്. ഇതു വീണ്ടും രാഷ്ട്രീയകലാപത്തിനുളള ശ്രമമാണെന്നാണ് സൂചന.
കൊലപാതക പരമ്പരകള് ആവര്ത്തിക്കുമ്പോഴും മനംമടുക്കാതെ സിപിഎം സായുധസംഘം വീണ്ടും അരുംകൊലകള്ക്ക് കോപ്പുകൂട്ടുകയാണ്. മുഖ്യമന്ത്രിയുടെ മൗനം ഇവര്ക്ക് ആവേശമായാണ് മാറിയിരിക്കുന്നത്. ഭരണത്തണലില് ജില്ലയെ കലാപകലുഷിതമാക്കി അണികളുടെ ചോര്ച്ച തടയാനാണ് പാര്ട്ടിനേതാക്കളുടെ തീരുമാനം. പോലീസ് സംവിധാനത്തെ നോക്കുകുത്തിയാക്കിയത് ഇതിന്റെ ഭാഗമായാണ്.
