കോഴിക്കോട്: ദളിത് യുവാക്കളെ തല്ലിച്ചതച്ച സംഭവത്തില് പ്രതിഷേധം ശക്തമാകുന്നു. കായണ്ണ ഗ്രാമപഞ്ചായത്തിലെ ചെറുക്കാട് എരാമ്പൊയില് മീത്തല് ഹരിജന് കുടുംബമായ ചന്ദ്രന്-രാധ ദമ്പതികളുടെ മക്കളായ അശ്വിന്ഷാ, രജിന്ഷാ എന്നിവരെ തല്ലിച്ചതച്ച സിപിഎമ്മിന്റെയും പോലീസിന്റെയും നടപടിയിലാണ് പ്രതിഷേധം ശക്തമാകുന്നത്. ഇക്കഴിഞ്ഞ 12 ന് വൈകിട്ടായിരുന്നു സിപിഎം ക്രിമിനലുകള് ഇവരെ ആസൂത്രിതമായി ആക്രമിച്ച് ഗുരുതരമായി പരിക്കേല്പ്പിച്ചത്. ദളിത് യുവാക്കളെ തല്ലിച്ചതച്ച സിപിഎം ക്രിമിനലുകള്ക്കെതിരെയും കൂട്ടുനിന്ന കൂരാച്ചുണ്ട് പോലീസിന് എതിരെയുമാണ് ജനരോഷം ശക്തമാകുന്നത്. സംഭവം പുറംലോകമറിഞ്ഞതോടെയാണ് പ്രതിഷേധം വ്യാപകമായത്. വിവിധ സംഘടനാ പ്രതിനിധികള് ഇന്നലെ രജിന്ഷായുടെ വീട്ടിലെത്തിയിരുന്നു. പൗരാവകാശവും മനുഷ്യാവകാശവും പാടേ ഇല്ലാതാക്കിയ സംഭവമാണ് നടന്നതെന്നും കുറ്റക്കാര്ക്കെതിരെ കര്ശന നടപടി സ്വീകരിക്കണമെന്ന ആവശ്യവും ഉയര്ന്നിട്ടുണ്ട്. സംഭവം മനുഷ്യാവകാശ കമ്മീഷന്റെ ശ്രദ്ധയില്പ്പെടുത്തുവാനുള്ള ശ്രമവും ആരംഭിച്ചിട്ടുണ്ട്.
നിര്ധന കുടുംബാംഗങ്ങളായ ദളിത് യുവാക്കളെ മര്ദ്ദിച്ചവശരാക്കിയ സംഭവത്തില് ബിജെപി ജില്ലാ പ്രസിഡന്റ് ടി.പി. ജയചന്ദ്രന് പ്രതിഷേധിച്ചു. ദളിത് യുവാക്കള്ക്കെതിരെയുള്ള ഈ അക്രമത്തിലൂടെ സിപിഎമ്മിന്റെ യഥാര്ത്ഥ മുഖമാണ് വെളിവായതെന്നും അദ്ദേഹം പറഞ്ഞു. പ്രതികള്ക്കെതിരെയും ഒത്താശ ചെയ്ത പോലീസുകാര്ക്കെതിരെയും ശക്തമായ നടപടി സ്വീകരിക്കണമെന്നും ജയചന്ദ്രന് ആവശ്യപ്പെട്ടു.
ദളിത് യുവാക്കള്ക്കെതിരെയുള്ള ആക്രമണത്തില് ബിജെപി കായണ്ണ പഞ്ചായത്ത് സമിതിയോഗം പ്രതിഷേധിച്ചു. പി.സി. ബാലന് അധ്യക്ഷത വഹിച്ചു. സുനീഷ് പുതുക്കുടി, സാജന്, ശ്രീജിത്ത്,ജയപ്രകാശ് കായണ്ണ എന്നിവര് പ്രസംഗിച്ചു.
