പേരാമ്പ്ര: പേരാമ്പ്രയുടെ സമഗ്ര വികസനം എന്ന പേരില് നടക്കുന്ന സെമിനാറും അനുബന്ധ പരിപാടികളും സിപിഎമ്മിന്റെ പോഷക സംഘടനകളുടെ കൈകളിലൊതുങ്ങിയതായി ആരോപണം. മൂന്ന് മന്ത്രിമാര് ഒരേ സമയം പങ്കെടുക്കുന്ന പരിപാടികളില് വിഷയവതാരകരും ഇടതുപക്ഷ സഹയാത്രികര് തന്നെ. പേരാമ്പ്ര നിയോജക മണ്ഡലം ഉള്പ്പെടുന്നവടകര പാര്ലമെന്റ് മണ്ഡലത്തെ പ്രതിനിധാനം ചെയ്യുന്ന മുല്ലപ്പള്ളി രാമചന്ദ്രനെ പരിപാടിയില് നിന്നൊഴിവാക്കിയതില് പ്രതിഷേധിച്ച് കോണ്ഗ്രസ് ചടങ്ങ് ബഹിഷ്ക്കരിക്കും.
ചടങ്ങിലേക്ക് ക്ഷണിച്ച മറ്റ് രാഷ്ട്രീയ പാര്ട്ടി പ്രതിനിധികള്ക്ക് കാര്യമായ ഒരു റോളും തന്നെ നല്കിയിട്ടില്ല. വിഷന് പേരാമ്പ്ര 2025 ന്റെ ആദ്യ സംഘാടക സമിതി പേരാമ്പ്ര സെന്റ് തെരേസ കോളേജില് ചേര്ന്നപ്പോള് മുഴുവന് രാഷ്ട്രീയ പാര്ട്ടികളെയും ക്ഷണിച്ചിരുന്നു എന്നാല് സിപിഎം ഒഴികെയുള്ള രാഷ്ട്രീയ പാര്ട്ടികളെ വെറും നോക്കുകുത്തികളാക്കി കമ്മിറ്റി ഏകപക്ഷീയമായി രൂപീകരിച്ചതില് ബിജെപി മണ്ഡലം കമ്മറ്റി ശക്തമായി പ്രതിഷേധിച്ചിരുന്നു. 1980 മുതല് തുടര്ച്ചയായി പേരാമ്പ്ര നിയോജക മണ്ഡലത്തെ പ്രതിനിധാനം ചെയ്യുന്നത് സിപിഎം ആണ്. ഇക്കാലങ്ങളിലെല്ലാം തന്നെ മണ്ഡലത്തിന് വേണ്ടി ഒന്നും ചെയ്യാതെ ഇപ്പോള് വികസന സെമിനാര് നടത്തുന്നത് അപഹാസ്യമാണെന്നാണ് ആരോപണമുയരുന്നത്.
യുഡി എഫ് കേരളം ഭരിച്ചപ്പോഴും പേരാമ്പ്രയില് കാര്യമായ ഒരു വികസനവും നടന്നിട്ടില്ല. പേരാമ്പ്ര പഞ്ചായത്തിനെ മുന്സിപ്പാലിറ്റി ആയി ഉയര്ത്തുന്ന കാര്യത്തിലും കേരളം മാറി മാറി ഭരിച്ച ഇടത് വലതു മുന്നണികള് തികഞ്ഞ അലംഭാവമാണ് കാണിച്ചത്. കേരളത്തിലെ മറ്റ് ജില്ലകളില് പേരാമ്പ്രയെക്കാള് ജനസംഖ്യയിലും നികുതി വരുമാനത്തിലും പിന്നോക്കം നില്ക്കുന്ന പഞ്ചായത്തുകളെ മുന്സിപ്പാലിറ്റി ആക്കി മാറ്റിയപ്പോള് പേരാമ്പ്രയെ കയ്യൊഴിഞ്ഞതിന് ഉത്തരവാദികള് ഇടതു വലതു മുന്നണികള് തന്നെയാണ്. പേരാമ്പ്ര താലൂക്ക് രൂപീകരണം. ബൈപ്പാസ്, ബസ് സ്റ്റാന്റ് നവീകരണം, പുഴിത്തോട് ഗോണി കുപ്പ മൈസൂര് ബംഗളുരു റോഡ്, ടൗണ് റോഡ് വികസനം, ഗവ. ഐടിഐ തുടങ്ങിയവയെല്ലാം പ്രകടനപത്രികളില് ഉള്പ്പെടുത്താറുണ്ടെങ്കിലും ജയിച്ചു വന്ന് അവയെല്ലാം അവഗണിക്കുകയാണ് പതിവ്. ജനങ്ങളില് നിന്ന് ശക്തമായ പ്രതിഷേധം ഉയര്ന്ന് വന്ന സാഹചര്യത്തിലാണ് സമഗ്ര വികസനമെന്ന പേരില് ഈ സെമിനാര് സംഘടിപ്പിക്കുന്നത്. സുഭിക്ഷയുടെ ചെയര്മാന് എന്ന നിലയില് സാമ്പത്തിക അഴിമതി കേസില് കോടതി കയറേണ്ടി വന്ന മുന് പേരാമ്പ്ര ബ്ലോക്ക് പഞ്ചായത്ത് പ്രസിഡണ്ട് എം. കുഞ്ഞമ്മദ് ആണ് വികസന സെമിനാറിന്റെ മുഖ്യസംഘാടകന്.
സുഭിക്ഷയെ പ്രൈവറ്റ് ലിമിറ്റഡ് ഫുഡ് പ്രൊസസ്സിങ്ങ് യൂണിറ്റ് തുടങ്ങാന് വന് തോതില് സാമ്പത്തിക സഹായം നല്കാനും വികസന സമിതിയുടെ പേരില് നീക്കം നടക്കുന്നുണ്ട്.
ബിജെപി യുടെ നേതൃത്വത്തില് സുഭിക്ഷ അഴിമതിക്കെതിരെ ഉപവാസ സമരം നടത്തിയിരുന്നു.
രാഷ്ട്രീയ അഭിപ്രായ വ്യത്യാസങ്ങളും സെമിനാറുകളിലെ രാഷ്ട്രീയ വേര്തിരിവുകള് ഉണ്ടെങ്കിലും പേരാമ്പ്രയുടെ സമഗ്രവികസനത്തിന് ബിജെപി ശക്തമായ പിന്തുണ നല്കുമെന്നും പാര്ട്ടിയുടെ തെരഞ്ഞെടുത്ത മെമ്പര്മാര് പരിപാടിയില് സജീവമായി പങ്കെടുക്കുമെന്നും ബിജെപി മണ്ഡലം പ്രസിഡണ്ട് എന്.ഹരിദാസും സംസ്ഥാന സമിതി അംഗം എം. മോഹനനും അറിയിച്ചു. കോണ്ഗ്രസ് സെമിനാര് ബഹിഷ്ക്കരിക്കുമ്പോള് യുഡിഎഫ് ഘടകകക്ഷികളായ മുസ്ലീം ലീഗും, ജനതാദളും സജീവമായി പങ്കെടുക്കും യുഡി എഫിലെ അനൈക്യം ഇതോടെ മറനീക്കി പുറത്ത് വന്നിരിക്കുകയാണ്.
